Lelo Udi na Komande Yalonso?

¹ Lelo kasha kwaendele ku kubungakana kwa kwenda mu busapudi pampikwa dipepala nansha dimo mu obe sakoshi wa busapudi? Pa kusaka kwingidija biyampe mapepala obe, i muswelo’ka obwanya kwepuka kino kīlwa? Ikala na komande ya kibalwa kampanda kya mapepala. Pāna komande yobe mibwane kudi tutu upelwe mwingilo wa mapepala mwa kutambwila kibalwa kifikile kya nimelo ne nimelo. Shi ulonge namino, kisaka kyenu ne abe mwine mukekala na buvule bwa mapepala bwimufwaninwe.

² Lelo wabulwa’po kwikala na komande yalonso ya mapepala? Kino kikakupa bukankamane bwa kupāna mapepala yenga ne yenga, kadi ukatana’mo nsangaji mikatampe. Shi udi kala na komande yalonso, bandaula shi kibalwa kyotambulanga i kibwanine pa mwingilo wa kweji mutuntulu. Ko kunena’mba, bitulomba kukasela komande yetu yenga ne yenga, nanshi tufwaninwe kwikala bantu basumininwe. I kiselwa kidi pa mutwe wetu. Shi tusaka kutaluka pa kipwilo mu bula bwa kitatyi kampanda, ne tudi na mulangwe wa amba tutu wimanine mapepala ashale ape’o muntu kampanda kufika ne potukajoka, i biyampe kumuyukija kumeso kwa kitatyi.

³ Tufwaninwe kwitūdila’ko difuku kampanda dya kupāna mapepala. Lelo tukwatakanyanga yenga ne yenga difuku ditungilwe bu dya mapepala? I dya Mposo ne dya Mposo, pamo na mulombwela Kalandadiye ka Batumoni ba Yehova 1999! Ketwakipelulai mwingilo wa kupāna Kiteba kya Mulami ne Amkeni! Udi na mvubu mpata. Shi tulonge buninge bwa kutambila mu uno mwingilo, ‘tukasapula myanda miyampe ya bintu bilumbuluke’ ku bantu netu.​—⁠Is. 52:⁠7.