Le Kino Kikasangela Ani Kutabuka?

1. Kitatyi kyotutanga Kiteba kya Mulami ne Réveillez-vous ! i myanda’ka yotufwaninwe kulangulukila’po ne mwanda waka?

¹ Kiteba kya Mulami ne Réveillez-vous ! biteakanibwanga mwanda wa kukwasha bantu ba ntanda yonso. O mwanda mudi bishinte bishileshile bisambila pa myanda ya koku ne koku. Kitatyi kyotutanga kishinte ne kishinte mu dipepala, tufwaninwe kulangulukila pa bantu bakokeja kusangela’kyo kutabuka, kupwa twaenda kukebapa’kyo.

2. Le i bishinte’ka bya mu mapepala etu bikokeja kusangela bantu bakwabo kutabuka?

² Le Kiteba kya Mulami kya panopano kisambilanga pa kipangujo kimanine pa Bible kyobakwipangwile kudi bakwenu ku kaji? Lelo mudi kishinte kisambila būmi bwa kisaka kyosaka kukwasha nakyo babutule? Le kudi muntu omwiyukile nandi ukimba kwenda mu ntanda ingi yobesambile’po mu Réveillez-vous ! ? Le kudi dipepala disangaja bansunga, bantu bengila ku sosiete imo nenki ya Leta mu wenu mwaba? Kimfwa mapepala alombola mwa kulwila na makambakano a bununu, akokeja kusangaja boba badi ku mobo a kilelo. Bantu bengila mu Leta padi bakokeja kusangela mapepala esambila pa bukalabale.

3. Sekununa myanda mimweke ilombola kamweno kadi mu kupāna mapepala ku boba bakokeja kusangela myanda idi’mo.

³ Bipa bilupukile’ko: Ba mulume ne mukaji ba mu Afrika wa Kunshi pobatambwile Réveillez-vous ! wa Kweji 10, 2011 unena’mba: “Faites de vos enfants des adultes responsables,” balombele ku masomo 25 a mu mwaba wa kipwilo kyabo. Masomo makumi abidi ne abidi aitabije uno Réveillez-vous ! abanibwe ku bana ba masomo. Ba mulume ne mukaji bakwabo mu ntanda imo yonka nabo baabenye uno Réveillez-vous ! ku masomo mu wabo mwaba. Ku masomo amo, badimu batyibile mbila ya kubweja’ye mu mpangiko ya ku masomo ya butangi bwa yenga ne yenga. Bano ba mulume ne mukaji pobalombwele’mo mutadi wa kipindi. Kupwa nandi wakankamika bipwilo bya mu kyandi kipindi nabyo bilonge uno muswelo mu wabo mwaba. Bilo ya musambo pa kutambula makomande a ntentekelo, byalengeja batampulule’o monka.

4. Mwanda waka bitulomba kupāna mapepala mavule kutabuka?

⁴ Mapepala etu ashintululanga kine kikadile’ko binkumenkume byotumona dyalelo ne kuludikila bantu ku Bible ne ku Bulopwe bwa Leza. I mapepala amo kete, ntanda yonso ela “lubila lwa lupandilo.” (Is. 52:7) Nanshi tusakilwa kupāna ano mapepala mu kibalwa kivule kutabuka. Muswelo muyampe wa kulonga kino i na kwiipangula’mba, ‘Le kino kikasangela ani kutabuka?’