5 Leza Witabijanga Mutōtelo O-Onso Utōtwa na Kusumininwa Lelo I bya Bine?

Byokodi padi mwivwane: “Monka mwikadile tushinda tuvule ne mashinda bitwala ku kifuko kimo kyonka, mo monka mwikadile ne tushinda tuvule tutwala kudi Leza. Muntu ne muntu ufwaninwe kwitanina kashinda kandi kamutwala kudi Leza.”

Bifundija Bible: Tufwaninwe kwikala basumininwe mu mutōtelo wetu, ne kwepuka kwiongola ne buzazangi. Yesu wāsapwidile bendeji ba bipwilo ba mu andi mafuku mwanda mwine wēbapelēle Leza, amba: “I binebine byēmufumikile Isaya, bānwe banzazangi, monka mwalembele’mba: Bano bantu i bandemeke ku milomo konka, nanshi mutyima wabo kungi ami nami kungi.” (Mako 7:6) Eyo kusumininwa konka konka kekulombolapo amba mutōtelo wetu uketabijibwa na Leza.

Yesu wālombwele uno mwanda patōka pa kusokola kato kādi mu mutōtelo wādi utōtwa na bendeji ba bipwilo ne bana babo ba kipwilo. Wāingidije pobadi binenwa bya Leza bya amba: “I bya bitupu byo bantōta, bijila nabyo bajidika, byonka bya bantu, abo’mba byo bya bīne.” (Mako 7:7) Mutōtelo wabo wādi wa “bitupu,” wampikwa bukwashi, mwanda bādi batangidija bisela bya bantu pa kyaba kya bijila bya Leza.

Pa kyaba kya kwitabija mulangwe wa amba kudi mashinda mavule atwala kudi Leza, Bible aye ufundijanga’mba kudi’tu dishinda dimo kete. Mateo 7:13, 14 unena’mba: “Twelelai pa kakibelo katyetye, ke-kintu kyokya kibelo i kikatampe kyenda kukoneka, ne dishinda nadyo monka, kadi bakatwela monka i bangi bangi. Ino kabelo ka kutwala ku bumi a! a! a! butyeko! ne dishinda monka: ne bakwikamona i batyetye.”

Kuyuka bubinebine mokubwaninya kukukwasha: Langa mokokeja kwiimvwanina shi wafundijibwe makayo a kunyema lubilo mu bula bwa myeji mivule, pa kwitāka lubilo ubafika bu umbajinji, ino ku mfulo amba wadi kunyemenepo mungya bijila. Ukamona’mba bukomo bonso bowalonga i bwa bitupu. Lelo kintu kya uno muswelo kikokeja kulongeka mu mutōtelo wetu kudi Leza?

Mutumibwa Polo pa kudingakanya mutōtelo wetu na muntu witāka mu lubilo, wālembele amba: “Wivwane kadi, muntu ulwile pa bya mazua a pa mwaka, kapadibwako mpalo, poso ulwilanga monka mwendele bijila.” (2 Temote 2:5) Tuketabijibwa na Leza shi tumutōta “mwendele bijila,” ko kunena’mba, mu muswelo waitabije. Ketubwanyapo nansha dimo kwitongela kashinda pa kwenda kudi Leza, enka na kemukokejejapo munyemi kupityila konso kwasaka pa kunyema shi usaka ne shi utengele kunekenya lubilo.

Pa kusangaja Leza, tufwaninwe kulama butōtyi bwetu ku bubela bumubepelwa. Yesu wānene amba: “Bakutōta balumbuluke bakatōtanga Tata mu Mushipiditu ne binebine ponka.” (Yoano 4:23) Twifundanga kutana kashinda ka bine katwala kudi Leza kupityila ku Bible, Kinenwa kyandi.—Yoano 17:17.a

[Kunshi kwa dyani]

[Bushintuludi pa paje 8]

Lelo bipwilo byonso bifundijanga bantu batōte Leza mwasakila?