Mwanda Waka Yewa Wivwananga Milombelo Ulekele’ko Masusu?
NANSHA bantu bamo byobabwanya kulombela, ino batatananga kwikala’ko kwa Leza. Mwanda waka batatananga? Padi i pa mwanda wa masusu mavule obamona pano pa ntanda. Le kodi mwiipangule mwanda waka Leza ulekele’ko masusu?
Le bine Leza wāpangile bantu na mobekadile dyalelo—bakubulwa kubwaninina ne babimonya malwa? Byadi bya kwitukomena kulēmeka leza udi na mpango ya kususula bantu. Ino langulukila pa uno mwanda: Shi ubandila koku untendela motoka mupya, ino ubamone amba i moneke pantu kampanda, le ukafula ku kunena’mba i weupungile walongele’o uno muswelo? Nansha dimo! Ukafula ku kunena amba weupungile walongele’o “biyampe” ne amba kudi muntu nansha kintu kampanda kyeonene.
Mu muswelo umo onka, kitatyi kyotubandila bintu bya kutendelwa bipangilwe mu ndudi pano pa ntanda kupwa kadi twamona mususukila kisaka kya muntu, le tufulanga ku kunena bika? Bible ufundija amba Leza wāpangile bantu babajinji babwaninine, ino mwenda mafuku baoneka abo bene. (Kupituluka 32:4, 5) Mwanda muyampe i uno amba, Leza i mulaye kulongolola bintu byonekele—ko kunena’mba kwalwija bantu ba kikōkeji ku bubwaninine. Ino, mwanda waka wilaije kitatyi kilampe nenki?
Mwanda Waka Ulekele Kitatyi Kilampe?
I pa mwanda wa tuyuke i ani ufwaninwe kuludika bantu. Yehova kādipo nansha dimo na mulangwe wa amba bantu bafwaninwe kwiludika abo bene. Wādi wa kwikala Muludiki wabo. Bible unena amba: “Kekidipo mu muntu unañanga kolola matabula andi.” (Yelemia 10:23) Ino i kya bulanda, mwanda bantu babajinji bātombokele buludiki bwa Leza. Kubulwa kukōkela ku kijila kwēbalengeje bekale ba bubi. (1 Yoano 3:4) Mfulo mfulō, bajimija bubwaninine bwabo ne kwiona abo bene pamo ne lutundu lwabo.
Yehova i muleke bantu beludike abo bene mu tununu ne tununu twa myaka, ne kadi mānga ilombola amba bantu kebadipo na bukomo bwa kwiludika. Mānga ilombola’mba, maludiki onso a bantu aletanga masusu. Kekudipo buludiki nansha bumo kebupwe divita, bupolapola, bukondame nansha misongo.
Leza Ukalongolola Namani Bintu Byonekele?
Bible i mulaye amba Leza usa panopano ponka kuleta ntanda mipya myoloke. (2 Petelo 3:13) Boba bakekala’mo i enka boba balombola kupityila ku bwanapabo bwabo bwa kwitongela amba, bakesanswa abo bene na bene ne kuswa Leza.—Kupituluka 30:15, 16, 19, 20.
Kadi Bible unena amba mu “difuku dya kidye” dyafwena bukidibukidi, Leza usa kutalula’ko masusu ne boba balengeja’o. (2 Petelo 3:7) Kupwa, Yesu Kidishitu Mulopwe mutongwe na Leza ukaludika bantu ba kikōkeji. (Danyele 7:13, 14) Le umbikalo wa Yesu ukalonga bika? Bible unena amba: “Bakikōkeji bakapyananga ntanda; kadi bakēsangaja mu bungi bwa ndoe.”—Mitōto 37:11.
Pamo bwa Mulopwe wa momwa mūlu, Yesu ukalongolola bintu byonekele—kubadila’mo ne misongo, bununu ne lufu—bine byālupukile ku butomboki bwa bantu bobātombokēle Yehova, “nsulo ya būmi.” (Mitōto 36:9) Yesu ukondapa boba bonso betabija buludiki bwandi bwa buswe. Mu umbikalo wandi, ino milao ya mu Bible ikafikidila:
◼ “Mwikadi kakanenapo’mba: Nabela, bantu bakekalanga’mo bakalekelwa bukondame bwabo.”—Isaya 33:24.
◼ “Leza ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji bibatukidila.”—Kusokwelwa 21:4.
Lelo ketusengelwepo pa kuyuka amba panopano ponka Leza usa kufikidija milao yandi ya kupwa masusu onso? Pano’ko bidi, nansha byalekele’ko masusu adi’ko dyalelo, ketufwaninwepo kujimija kikulupiji kya amba wivwanga milombelo yetu.
Leza udi’ko. Ubwanya kukwivwana, enka ne kudila kobe kwa misanshi ne bulanda. Ne kadi usakanga kukumona wikele mūmi mwanda wa kusangela kitatyi kekikekalakopo kutatana ne masusu obe onso.