Bingelengele Bisa Kulongeka
SHI dokitele upasulanga i mukulaye kukupasula lupasulo lukomo, le ukeivwana namani shi ubayuka amba kashā kapaswile lupasulo lwa uno muswelo? Na bubine ukasela mutyima kūlu. Ino shi pakwabo napo, ubayuka amba uno dokitele ye dokitele upasulanga biyampe ne amba ke mupasule kala biyampe mpasulo tutwa na tutwa na lotengele kupasulwa? Le ubulwe’po kukulupila bininge amba ukakukwasha?
Ino ntanda ya misongo yotwikele’mo dyalelo isakilwa “kupasulwa.” Kupityila ku Bible, Kinenwa kyandi, Yehova Leza i mulaye amba ukaluja Paladisa pano pa ntanda. (2 Petelo 3:13) Ino pa kusaka kino kilongeke, dibajinji bidi bibi bisa kutalulwa’ko, ko kunena’mba kufundulwa’ko lonso. (Mitōto 37:9-11; Nkindi 2:21, 22) Ngikadilo yonso ya bulanda yotumona ifwaninwe kufundulwa’ko kumeso kwa paladisa kujokejibwa. Bine kino pokikalongeka kikekala kingelengele!—Kusokwelwa 21:4, 5.
Batumoni ba Yehova bakulupile amba kuno kushinta kukatampe kusa kulongeka panopano ponka. Mwanda waka? Mwanda bingelengele bilongele kala Yehova Leza bilombola amba udi na bukomo bwa kufikidija milao yandi. Dingakanya’tu bidi bingelengele bisamba bisonekelwe mu Bible na milao yalaile mu mafuku āya kumeso.
Nanshi wifunde nyeke Milao ya mu Bible itala mafuku a kumeso. Kitatyi kyonso kitama lwitabijo lobe, lukulupilo lobe nalo lukatama—lukulupilo lwa kwikala’ko kitatyi kyokemwena byabuyabuya bitamba ku bingelengele bilonga Yehova.
[Kapango/Bifwatulo pa paje 7]
KINGELENGELE:
YESU WĀDISHISHE TUNUNU NA TUNUNU TWA BANTU NA MIKATE NE TWITA TWA LUI TUBALA-TUNGA.—MATEO 14:13-21; MAKO 8:1-9; YOANO 6:1-14.
MULAO:
“Ntanda ībapana bivule byayo; Leza, ke Leza wetu, bātwe bene kadi, uketweselanga dyese.”—MITŌTO. 67:6.
MOBISHINTULWILA KOTUDI:
I KUTUPU MUNTU NANSHA UMO UKAFWA NZALA.
KINGELENGELE:
YESU WĀPŪTWILE MPOFU MESO.—MATEO 9:27-31; MAKO 8:22-26.
MULAO:
“Meso a bampofu akapūtulwa.”—ISAYA 35:5.
MOBISHINTULWILA KOTUDI:
BAMPOFU BONSO BAKAMONA.
KINGELENGELE:
YESU WĀBELWILE BILEMA.—MATEO 11:5, 6; YOANO 5:3-9.
MULAO:
“Usunkuta ukatumbuka’nka bwa kasha kalume.”—ISAYA 35:6.
MOBISHINTULWILA KOTUDI:
BULEMA BONSO BWA KU NGITU BUKABELULWA.
KINGELENGELE:
YESU WĀBELWILE MISONGO MISHILESHILE.—MAKO 1:32-34; LUKA 4:40.
MULAO:
“Mwikadi kakanenapo’mba: Nabela.” —ISAYA 33:24.
MOBISHINTULWILA KOTUDI:
MISONGO YONSO IZOZEJA NGITU IKAFUNDULWA’KO. TUKEKALA NA BUKOMO BWA NGITU BUBWANININE.
KINGELENGELE:
YESU WĀNEKENYE BINTU BYONSO.—MATEO 8:23-27; LUKA 8:22-25.
MULAO:
“Bakōbaka mobo ne kwikala monka; kadi bakadima madimi a mañanza ne kudya bipa byayo. Kebakengilapo bitupubitupu.”—ISAYA 65:21, 23.
“Ukakomejibwa mu boloke; ukekalanga kulampe na disusu, ino kukakwatwapo moyo, nansha nzuba mine, mwanda kebikafwenapo kodi.”—ISAYA 54:14.
MOBISHINTULWILA KOTUDI:
BIMPENGELE BYA KIPANGILA KEBIKEKALAKOPO DIKWABO.
KINGELENGELE:
YESU WĀSANGWILE BAFWE.—MATEO 9:18-26; LUKA 7:11-17.
MULAO:
‘Bonso badi mu bibundu . . . Bakatamba’mo.’—YOANO 5:28, 29.
“Kalunga ka mema kalubula bafu badi monka; ne lufu ne Kalunganyembo nabo balubula bafu badi monka.”—KUSOKWELWA 20:13.
MOBISHINTULWILA KOTUDI:
BASWE BETU BAFWILE BAKASANGULWA.