Mwanda Waka Majika-kanwa Endelela?

“Muntu ubikadila muntu mukwabo mwanda wa kumumwesha malwa.”—MUSAPUDI 8:9, Dibuku Dijila.

BINO binenwa bilombola patōka mānga ya mwikadile umbikalo wa muntu. Umbikalo wa muntu i mutentekwe masusu ne malwa keaneneka. Mu bitatyi byonso, bantu basakila bakwabo biyampe bātompele kutūla’ko boloke mu bantu, divule dine bāponene mu lwiso ne majika-kanwa. Mwanda waka bidi namino? Mwanda waka majika-kanwa endelela? Nakampata i pa mwanda wa ino mpusa mibi isatu.

1. Lupusa lwa bubi.

Bible unena patōkelela amba “bonso i babipya-mambo.” (Loma 3:9) Bubi “bwikēle” motudi pamo bwa misongo keibeluka yotupyene. Bubi i ‘bubikale’ bulopwe pa muzo wa muntu mu tununu na tununu twa myaka. “Kijila” kyabo kingilanga nyeke motudi. Lupusa lwa bubi lutononanga bantu bavule batūle tumweno twabo pa kifuko kibajinji, kwimika būmi bwabo’nka mu kukimba bintu bya ku ngitu nansha kwikala na lupusa pa bintu bya bene.—Loma 5:21; 7:17, 20, 23, 25, DD.

2. Lupusa lwa ntanda mibi yotwikele’mo.

Ntanda yotudi’mo i miyule lwiso ne kwisakila. Mu kifuko kya uno muswelo, bantu bamo i bakomenwe kwishīla na bantu bebajokolokele. Pa kuludikwa na mutyima wa kwisakila, bano bantu bafwilanga lupusa. Kadi batamijanga mutyima wa kwikala na lupeto ne bituntwa bivule—kupita ne byobasakilwa bine. I kya bulanda, mwanda baloñanga bintu na budimbidimbi mwanda wa kufikidija bino bitungo. Pa kyaba kya kukomena ino mpusa imbi, ino bano bantu ‘balondanga kibumbo mwanda wa kulonga bubi.’—Divilu 23:2.

3. Lupusa lwa Satana Dyabola.

Satana, kipangwa kya ku mushipiditu kitomboke i “ñongoji wa panopantanda ponso.” (Kusokwelwa 12:9) Usangalanga mpata kitatyi kyaongola bantu. Ubwanya kwingidija na bunwanwa kwabila kwa muntu kwa kipangila kwa kukimba bituntwa ne lupeto kufika’nka ne bilonga muntu bintu na budimbidimbi.

Le kino kishintulula amba tudi’tu bwa bapopi badi mu makasa a Satana—banenwe kumukōkela kitatyi kyaetutompa? Tukatana malondololo mu kishinte kilonda’ko.