FWENAI KUDI LEZA
Lelo Yehova Ukutele Mutyima Binebine?
“Mobimwekela milangwe ya kwimona bu wakubulwa mvubu, i kijika kikatampe kyononga bukomo bwa kunekenya.” Ye mwānenene mwana-mukaji umo wākomenwe kukulupila amba, Yehova ubwanya kumona bubinga bwa kumutela mutyima. Le nobe udi na milangwe na yandi? Shi i amo, ubwanya kwiipangula’mba, ‘le bine Yehova utele mutōtyi wandi umo ne umo mutyima?’ Malondololo i eyo! Tutana mu binenwa bya Yesu bubinga bulombola’mba, Yehova witutele mutyima.—Tanga Yoano 6:44.
Le i bika byānene Yesu, mwine uyukile biyampe ngikadilo ne kiswa-mutyima kya Yehova kutabuka muntu ye-yense? (Luka 10:22) Yesu wānene amba: “Nansha umo wakwila kwami aye mwine, poso’nka Tata wakuntuma amukokele ko ndi.” Nanshi, ketubwanyapo kwikala balondi ba Kidishitu—ne batōtyi ba Yehova Tata wetu wa mūlu—kwakubulwa Yehova kwitukoka. (2 Tesalonika 2:13) Shi twivwanije byādi bisaka kunena Yesu, nabya tukamona mu binenwa byandi bukamoni bulombola’mba Leza witutele mutyima.
Le kwitukoka kwitukoka Yehova kushintulula bika? Kyubwa kya Kingidiki kyalamwinwe bu ‘kukoka’ kingidijibwanga ne pa mwanda wa kufunkila pa kukoka mwita mu bukonde. (Yoano 21:6, 11) Le Yehova witukokanga pampikwa kiswa-mutyima kyetu, na kwituningila tumwingidile? Mhm. Yehova i mwitupe bwanapabo bwa kwitongela, o mwanda kashitulangapo mutyima wetu ku bukomo. (Kupituluka 30:19, 20) Mufundi umo unena’kyo uno muswelo amba: “Mutyima wa muntu keudipo na kibelo panja. Ufwaninwe kushitulwa munda.” Yehova ubandaulanga mityima ya midiyo ne midiyo ya bantu pano pa ntanda, ukimbanga bantu badi na ngikadilo myoloke. (1 Bilongwa 28:9) Shi watana muntu wa uno muswelo, uloñanga mu muswelo utenga mutyima. Namani?
Yehova ukokanga na buntu, nansha kutenga mutyima wa muntu ‘utongelwe.’ (Bilongwa 13:48) Yehova uloñanga namino mu miswelo ibidi—kupityila ku musapu wa myanda miyampe ya mu Bible witufikila batwe bonso, ne kupityila ku mushipiditu sandu wandi. Kitatyi kimona Yehova mutyima witabija bubinebine bwa mu Bible, wingidijanga mushipiditu wandi mwanda wa kukwasha muntu evwanije bubinebine ne kwingidija’bo mu būmi bwandi. (1 Kodinda 2:11, 12) Pa kubulwa bukwashi bwa Leza, ketubwanyapo nansha dimo kwikala balondi ba bine ba Yesu kadi batōtyi bepāne ba Yehova.
Penepa, le binenwa bya Yesu bisonekelwe mu Yoano 6:44 bitufundija bika padi Yehova Leza? Yehova ukokanga bantu, mwanda umonanga kintu kiyampe mu mityima yabo kadi wibatele mutyima abo bonso. Kwivwanija buno bubinebine bukulupija kwāsengele mwana-mukaji utelelwe ku ngalwilo. Unena amba: “Kwikala mwingidi wa Yehova i dyese dikatampe dibwanya kwikala na muntu ye-yense. Kadi shi Yehova i muntonge kwikala mwingidi wandi, nanshi ndi mulēme ku meso andi.” Le abe nobe? Lelo kuyuka’mba Yehova utele batōtyi bandi mutyima kubakutonona usake kushitula mutyima obe?
Butangi bwa Bible bwa mu Kweji 5
[Bushintuludi pa paje 14]
“Mutyima wa muntu keudipo na kibelo panja. Ufwaninwe kushitulwa munda”