FWENAI KUDI LEZA

“Talai! Nalonga Bintu Byonso Ke Bipya”

Le usakanga abe ne kyobe kisaka mwikale na būmi bwa ngitu buyampe kadi bulampe? Le usakanga kwikala mu ntanda keikekala’mopo misanshi, masusu, ne lufu? Ino ntanda ke kintupo kya kufwatakanya. Inoko, ntanda mipya ya boloke isa kwikala’ko panopano ponka, mwanda Yehova Leza wālaile kwiileta. Tala muswelo ulombwelwe kufikidila kwa mpango yandi mu Kusokwelwa 21:3-5.​—Tanga.

“[Leza] ukapampulanga impolo yonso ku meso abo.” (Kusokwelwa 21:4) Le i impolo ya muswelo’ka yakapampula? Ke impolopo ya nsangaji nansha impolo ikiñanga meso etu. Mulao wa Leza ufunkila pa impolo itamba ku masusu ne mutyima kupepa. Leza kakomijapo’tu’nka ino impolo; ino ukeipampula lonso na kutalula’ko bintu bibi bilengejanga’yo​—ke masusu ne mutyima kupepa kadi.

“Lufu kelukekala’kopo dikwabo.” (Kusokwelwa 21:4) Le i bintu’ka bibi bilengejanga impolo kupita lufu walwana? Yehova ukanyongolola bantu ba kikōkeji mu bupika bwa lufu. Namani? Na kutalula’ko kine kilengejanga lufu: bubi bupyenwe kudi Adama. (Loma 5:12) Yehova ukafikija bantu ba kikōkeji ku bubwaninine kupityila ku kitapwaa kya kikūlwa kya Yesu. Kupwa, lufu walwana wa mfulo “lukajimankanibwa fututu.” (1 Kodinda 15:26) Bantu ba kikōkeji bakekala mungya mpango ya Leza​—ke ya kwikala na bukomo bwa ngitu bubwaninine kadi.

“Nansha misanshi mine keikekala’kopo.” (Kusokwelwa 21:4) Le i misanshi ya muswelo’ka keikekala’kopo monka? Misanshi yonso ya mu ñeni, mu malango ne ku ngitu itambile ku bubi ne ku kubulwa kubwaninina, kadi ibipija būmi bwa midiyo ne midiyo ya bantu dyalelo keikekala’kopo dikwabo.

Būmi bwampikwa kudila impolo, lufu, ne misanshi busa kwikala’ko panopano ponka. Ino ubwanya padi kwiipangula’mba ‘kwepi?’ ‘Lelo Leza wādi padi ulaya būmi bwa momwa mūlu?’ Mhm. Tubandaulei kine kyotwanenena namino. Dibajinji, mulao ushilula na binenwa bya amba ‘kipema kya Leza kidi na bantu,’ ne bantu bekele pano panshi. (Kusokwelwa 21:3) Dya bubidi, mulao utela ntanda ‘kekukekalapo lufu dikwabo’​—ntanda idi’mo lufu ino lukaleka kwikala’mo. Lufu keludipo mūlu, ino ke lwije mu kwikala pano pa ntanda. Nanshi, na bubine mulao wa Leza wa būmi bulumbuluke ukafikidila pano pa ntanda.

Yehova witusakila tukulupile mu mulao wandi wa kuleta ntanda mipya ya boloke. Aye pa kupwa’tu kutela madyese akaya’ko, witukulupija mulao wandi amba: “Talai! Nalonga bintu byonso ke bipya.” Kupwa ubweja’ko amba: “Ino myanda’i i ikulupilwa kadi ya bine.” (Kusokwelwa 21:5) Ubulwe’po kwifunda bivule pa muswelo obwanya abe ne baswe bobe kubadilwa mu batōtyi ba nsangaji bakamona mulao wa Leza ufikidila?

Butangi bwa Bible bwa mu Kweji 12

1 Petelo 1–Kusokwelwa 22

[Kunshi kwa dyani]