MALONDOLOLO KU BIPANGUJO BIMANINE PA BIBLE

Lelo Yesu ukalonga bika mu mafuku āya kumeso?

Yesu wāfwile mu mwaka 33 K.K., wasangulwa mu bafwe kupwa wakanda mūlu enka mu mwaka’wa. Kitatyi kilampe pa kupita’po, Yesu wāpebwa lupusa lwa kuludika bu Mulopwe. (Danyele 7:13, 14) Yesu byadi Mulopwe, usa kulonga’po kintu mu mafuku āya kumeso mwanda wa kutūla’ko ntanda ya ndoe ne kutalula’ko bulanda.​—Tanga Mitōto 72:7, 8, 13.

Yesu byadi Mulopwe ukalongela bantu bintu bya kutendelwa. Ukengidija bukomo bwamupele Shandi mwanda wa kujokeja bantu ku bubwaninine. Bakasangela būmi pano pa ntanda bwa kubulwa kununupa ne kufwa.—Tanga Yoano 5:26-29; 1 Kodinda 15:25, 26.

Le i bika bilonga Yesu dyalelo?

Yesu dyalelo uludikanga mwingilo wa kusapula, ntanda yonso wa balondi bandi ba bine. Bapempulanga bantu mwanda wa kwibalombola binena Bible pa Bulopwe bwa Leza. Yesu wānene amba ukendelela kukwatakanya mwingilo wa bana ba bwanga bandi kufika’nka ne kitatyi kikafudija Bulopwe bwa Leza imbikalo ya bantu.​—Tanga Mateo 24:14; 28:19, 20.

Yesu uludikilanga bantu ku dishinda diyampe dya būmi kupityila ku kipwilo kya bene Kidishitu ba bine. Ukendelela kwibaludika kufika ne pa konakanibwa ngikadilo imbi ya bintu idi’ko dyalelo ne mu ntanda mipya ilaile’ko Leza.—Tanga 2 Petelo 3:7, 13; Kusokwelwa 7:17.