MALONDOLOLO KU BIPANGUJO BIMANINE PA BIBLE

Lelo umbuo wetu wa ntanda udi’ko na kitungo kampanda?

Umbuo wetu wa ntanda i mupangwe biyampe mwanda wa kukwatakanya būmi. Udi na mema mavule, mene a kamweno ku būmi. Kujina kwa ntanda, kujokoloka kwayo ne kweji ne dyuba bikankajanga tulunga lui tuleke kwikala na mashika bininge nansha kukaba bininge. Luvula lujokolokele ntanda ne bukomo bukokela bintu panshi, biikiñanga ku bukomo bufwana butamba ku mikejima. Kwioba kwa imbuo ne būmi bwa banyema pano pa ntanda i bitulumukwa. Bilengejanga umbuo wetu wa ntanda wikale bu kifuko kya pa bula kifwaninwe kwikala’po bantu. O mwanda bantu bavule bafudile ku kunena’mba, umbuo wetu wa ntanda wāpangilwe na kitungo kampanda.—Tanga Isaya 45:18.

Inoko, ubwanya kwiipangula amba: ‘le masusu ne bukondame bibadilwa mu kino kitungo?’—Tanga Kupituluka 32:4, 5.

Lelo mpango itala ntanda ikafikidila?

Ntanda yāpangilwe mwanda wa ikale bu kifuko kya nsangaji kya bantu belēmekele abo bene na bene kadi basenswe Umpangi wabo. Mu uno muswelo, būmi bwa muntu budi na kitungo kikatampe kupita būmi bwa mutyi nansha bwa nyema. Tubwanya kuyuka Umpangi wetu i ani, kadi tubwanya kusangela ne kwiula buswe ne boloke bwandi.—Tanga Musapudi 12: 13; Mika 6:8.

Mulongi wetu ubwanya kufikidija byonso byapangile kulonga. Nanshi, tubwanya kukulupila’mba ukatalula’ko masusu ne bukondame ne kwikadija umbuo wetu wa ntanda ke kifuko kya nsangaji ya binebine kya muzo wa muntu.—Tanga Mitōto 37:11, 29; Isaya 55:11.