MALONDOLOLO KU BIPANGUJO BIMANINE PA BIBLE

Lelo Leza i muntu wa muswelo’ka?

Leza i muntu wa ku mushipiditu kabwanyapo kumweka. Wāpangile diulu, ntanda ne bintu byonso byūmi. Kekudipo muntu wāpangile Leza​—kadipo na ngalwilo. (Mitōto 90:2) Leza ukankamikanga bantu bamukimbe ne kuyuka bubinebine bumutala.​—Tanga Bilongwa 17:24-27.

Leza i muntu otubwanya kuyuka dijina. Tubwanya kuyuka ngikadilo yandi imo na kubandila bintu byapangile. (Loma 1:20) Ino, pa kuyuka Leza biyampe, tufwaninwe kwifunda Bible Kinenwa kyandi. Kino kituyukijanga ngikadilo ya buswe ya Leza.​—Tanga Mitōto 103:7-10.

Le Leza umonanga bukondame namani?

Yehova Umpangi wetu ushikilwe bukondame. Kadi wāpangile bantu mu kimfwa kyandi. (Kupituluka 25:16) O mwanda batwe bonso tushikilwe bukondame. Leza kalengejangapo bukondame botumona dyalelo. Leza wāpele muntu bwanapabo bwa kwitongela. Ino i kya bulanda, mwanda bantu bavule bengidijanga bibi bwanapabo bwabo bwa kwitongela kadi baloñanga bukondame. Yehova kyamufityija ku mutyima.​—Tanga Ngalwilo 6:5, 6; Kupituluka 32:4, 5.

Yehova uswele boloke, kadi kakalekapo bukondame bwikele’ko nyeke. (Mitōto 37:28, 29) Bible ulaile amba, panopano ponka Leza usa kutalula’ko bukondame bonso.​—Tanga 2 Petelo 3:7-9, 13.