Bintu Bibi Bibavula!

Smita,a mwana-mukaji wa myaka 35 wa mu Dhaka, Bangladesh, wadi utumbile bu muntu wa buswe ne utele bantu mutyima. Bantu badi bamuyukile bu nsongwakaji nkanka kadi wa nsangaji, wadi usaka kukwasha bakwabo bayuke myanda yaefundile padi Leza. Bine, kisaka ne balunda nandi bafityilwe kitatyi kyabelele Smita mu kitulumukila ne kufwa mu yenga’tu umo!

Ba James ne wandi mukaji, bansongwa besongele ba myaka 30 ne kupita, badi bayukane na mwadi muyukanikīle Smita. Baendele ku muketeko wa mvula kukapempula balunda nabo ku Mukunkujo wa Kushika kwa États-Unis. Kebajokelēpo nansha dimo ku yabo ntanda ya New York. Pobadi ku kino kifuko, balongele akishida ya lufu na motoka, mine yalengeje baswe babo ne bengidi-nabo bashale mu bushiyena.

Kusakilwapo kutala kulampe pa kumona bibi ne masusu avula dyalelo. Mavita epayanga bantu babitupu ne basola. Bantu ba mpikwa mwanda bafwanga mwanda wa butapani ne bupolapola. Maakishida aleta lufu ne misongo mikatampe bifikilanga bantu pampikwa kubanga myaka yabo nansha ludingo lwa mu būmi. Bimpengele bya kipangila bipayanga bantu mu kitulumukila. Mfwatakani ne bukondame i bisambakane konsokonso. Padi nobe kodi mususuke na bino bintu.

I byendele’mo twiipangule bipangujo pamo bwa bino:

• Mwanda waka bintu bibi bifikilanga bantu bayampe?

• Lelo Leza ufwaninwe kulambikwa bino bintu?

• Lelo bimpengele bilongekelanga’ni nansha bikolonwanga na muntu?

• Lelo i Mfuto ya bilongwa bibi, ko kunena’mba bipa bilupuka ku bilongwa bibi bya muntu bya pa kala, bine bilengejanga muntu asusuke?

• Shi kudi Leza mwine bukomo bonso, mwanda waka kakiñengapo bantu bayampe ku masusu?

• Lelo būmi bukekala bwakubulwa bibi ne masusu?

Pa kulondolola bino bipangujo, tufwaninwe bidi kuyuka malondololo a bino bipangujo bibidi bikatampe: Mwanda waka bintu bibi bifikilanga bantu bonso, ne Leza ukalonga’po bika?