MALONDOLOLO KU BIPANGUJO BIMANINE PA BIBLE

Lelo Difuku dya Butyibi i difuku’ka?

Mu kitatyi kyāsonekelwe Bible, Leza wāingidije batyibi mwanda wa kulama bantu bandi ku bukondame. (Batyibi 2:18) Bible utela Difuku dya Butyibi dya kumeso bu kitatyi kya nsangaji kine Yehova Mutyibi wa ntanda yonso, kyakanyongolola bantu ku bukondame.​—Tanga Ñimbo 96:12, 13; Isaya 26:9.

Leza i mutonge Yesu kutyibila bōmi ne bafwe mambo. (Bilongwa 10:42; 17:31) Bantu bavule bafwile pampikwa kuyuka Leza. Mu Difuku dya Butyibi, Yesu ukasangula bano bantu amba bamone mukenga wa kuyuka ne kusanswa Leza wa bine.​—Tanga Bilongwa 24:15.

Mwanda waka Difuku dya Butyibi dikalonga myaka kanunu?

Bafu bakasangulwa mu bula bwa ino myaka kanunu. (Kusokwelwa 20:4, 12) Bikebalomba kitatyi kya kwifunda mashinda a Leza ne kumukōkela. Na kwishila na mulangila bantu bavule, Bible ulombola amba bantu bakatyibilwa mambo pangala pa byobya byobakalonga pa kupwa kusangulwa.​—Tanga Loma 6:7.

Kadi Bible ulombola difuku dya butyibi dikāya na mu kukopa kwa diso, kumeso kwa myaka kanunu kushilula. Dino difuku nadyo ditwa bu mfulo, monka mokilombwedilwe pa kibalu kya kino Kiteba. Mu dino difuku, Leza ukatalula’ko bantu bonso bampikwa bwine Leza, ko kunena amba bantu babi. (2 Petelo 3:7) Nanshi, tufwaninwe kulonga bukomo bwa kwilombola’mba tusenswe Leza.​—Tanga 2 Petelo 3:9, 13.