Kine Kisakila Leza Tumulombe

Leza ubalanga dikasa dyandi dya bulunda.

Balunda besambanga umo ku mukwabo mwanda wa kuningisha bulunda bwabo. Mo monka, Leza nandi usakanga twisambe nandi, ne kushilula muswelo wa kupwana nandi bininge. Unena amba: “Mukangita, kadi mukenda ne kulombela ko ndi, nami nkateja ko mudi.” (Yelemia 29:12) Powisamba na Leza, ‘ukafwena kudi Leza, nandi ukakufwena.’ (Yakoba 4:8) Bible witukulupija amba: “Yehova udi pabwipi na boba bonso bamwitanga.” (Ñimbo 145:18) Potwendelela na kumulomba, po pene kipwano kyetu nandi nakyo kyenda kiningila’ko.

Leza usaka kukukwasha.

Yesu wānene amba: “Le i muntu’ka momudi’mo, shi wandi mwana wamulombe mukate, aye amupe’ko dibwe? Nansha kadi shi wamulombe mwita wa lui, le ukamupa nyoka’ni, a? Penepo, shi banwe’ko, . . . muyukile kupa benu bana byabuntu biyampe, le Shenu udi mūlu papo ke pepi, mwene ukapāna bintu biyampe ku boba bamulomba!” (Mateo 7:9-11) Bine, Leza usaka umulombe ke-pantu ‘ukutele mutyima’ ne kadi usakanga kukukwasha. (1 Petelo 5:7) Kadi usakanga umulombole makambakano obe. Bible witulombola amba: “Kemwakikambakanyai mityima pa kintu nansha kimo, inoko umbyonso yukijai Leza byomulomba mu milombelo ne kwabija pamo ne kufwija’ko.”​—Fidipai 4:6.

Bantu basakilwa bukwashi bwa ku mushipiditu.

Bashayuka batala mwikadilo wa bantu bajingulwile amba bantu midiyo tutwa na tutwa bemonanga bu bafwaninwe kulombela. Nansha ke bantu batuna kwikala’ko kwa Leza ne boba batatana kwikala’ko kwandi nabo babadilwa mu bano bantu.a Kino kilombola na bubine amba bantu bāpangilwe na kyumwa kya kwifunda myanda ya Leza. Yesu wānene amba: “Ba katōkwe i boba bayukile amba bafwaninwe kwifunda myanda ya Leza.” (Mateo 5:3) Muswelo umo otubwanya kuvuija kino kisakibwa i kwisamba na Leza kitatyi ne kitatyi.

Shi twitabije kulombela Leza mu milombelo, le tukatengela kumona bika?