Kwilekela na Mutyima Umo

MUSOÑANYA WA MU BIBLE: “Endelelai . . . kwilekela na mutyima umo nansha shi kudi udi na mwanda na mukwabo. Monka mwemulekēle Yehova na mutyima umo, nenu mufwaninwe kulongela monka.”​—Kolose 3:13.

Le ko kunena namani? Mu Bible, bubi i budingakanibwe na mapu kadi kulekelwa nako na kulekelwa mapu. (Luka 11:4) Dibuku dimo dya kunyemena’ko dinena’mba, mu Bisonekwa bya Kingidiki, kishima kyalamwinwe bu “kulekela” kishintulula “kufwila wa mapu lusa, ne kumulandula’o mpika.” Nanshi, shi tubatonge kulekela muntu kampanda wetulubile, tubamufwila lusa pa byeetulongele ne kutalula mulangwe wa kufutwa na muntu witulubile. Shi tubalekela muntu na mutyima tō ke kunenapo amba tubaitabila kilubo kyandi nansha kutyepeka bibi byaetulongele. Ino, tubatalula’tu kiji ku mutyima, nansha shi tudi na bubinga bwa kutompwela pa ‘mwanda’wa.’

Le udi na kamweno dyalelo? Byotudi bantu ba kubulwa kubwaninina, batwe bonso twi babipya-mambo. (Loma 3:23) Nanshi i kya tunangu kwikala na mutyima wa kulekela bakwetu, mwanda dyakadilwe kantu, netu tukakimba betulekele. Kadi, shi tubalekela, tukamwena’mo batwe bene. Namani le?

Shi tutamije bulobo ne kiji​—ino tuvulaminwe lulekelo​—nabya tubesanshija batwe bene. Ino milangwe mibi ikokeja kwitudīla nsangaji, kwitutyinya mbavu, ne kwitususula. Kadi ibwanya kwituletela misongo mikomo. Lapolo imo ya mu Julunale (Journal of the American College of Cardiology,) ulembelwe na Dokitele Yoichi Chida ne Mwadimu Andrew Steptoe, mwifundi wa bongolo, yanene amba: “Myanda yasokwelwe panopano ilombola kukwatañana kudi pa bukata bwa bulobo ne mfika ne misongo ya dityima itwa bu CHD [coronary heart disease].”

Tala kintu kiyampe kimwenwa mu kulekelañana. Shi tubalekela bakwetu na mutyima umo, tukalama bumo ne ndoe, papo tubashala bapwane. Kya mvubu mpata, tukalombola’mba tubaiula Leza, mwine ulekelanga babipya-mambo na mutyima umo ne mwine witusakila netu tulekele bakwetu.​—Mako 11:25; Efisesa 4:32; 5:1.