Mwa Kulwila na Bulanda

Kwikalanga madingi mavule mu uno mwanda. Ino ke onsopo a kamweno. Kimfwa, kudi bakakunena’mba kokadila nansha kwimvwana bulanda. Bangi nabo bakakulombola’ko amba i biyampe kudila nansha kwiyaya. Bible udi’po na mumweno mujalale, mwine witabijibwe na bukimbi bwa dyalelo.

Mu bibidiji bimo bapelejanga bana-balume kudila. Lelo kudi kya kwimvwanina bumvu bwa kusumija mipolo pa bantu? Befundi ba bukomo bwa mu bongolo betabije amba kusumija mipolo i kwendele’mo shi muntu udila. Kadi kudila kubwanya kukukwasha utyepeje’ko bulanda. Inoko kuleka kudila kukokeja kubweja’ko misanshi. Bible kakankamikangapo mulangwe wa amba mwana-mulume kafwaninwepo kudila. Kimfwa, vuluka Yesu, nansha byaādi na bukomo bwa kusangula bafwe, inoko wādidile bininge pāfwile mulunda nandi Lazalasa!—Yoano 11:33-35.

Pavule pene bulanda bufītyijanga mutyima, nakampata pa lufu lwa mu kitulumikila. Kudi bubinga buvule bulengejanga ufwidilwe’wa afītwe, kimfwa shi muntu mukulupilwe wanena bintu bya kubulwa kwendela’mo. Mike wa mu Afrika wa Kunshi unena’mba: “Nadi nakidi na myaka 14 pafwile tata. Pa lufu, mwingidi umo wa mu kipwilo kya Anglicane wanenene’mba Leza usakanga bantu bayampe o mwanda wibaselanga bya bukidi.a Kino kyaumfītyije mutyima mwanda tata, twadi tukidi nandi buya. Pano kepapite myaka 63, bikinsansanga.”

Le kwitopeka nako le? Nakampata pa lufu lwa mu kitulumukila, muntu ufwidilwe ubwanya kulanga kitatyi kyonso’mba, ‘Kadipo wa kufwa shi nalongele nenki nansha nabya.’ Nansha padi kumeso kwa afwe mwadi mwipotomeja. Kino kikakulengeja witopeke bininge.

Shi ukifītyilwe ne ukyendelela na kwitopeka, i biyampe kuleka uno mulangilo. Ino, sapwila’mo mulunda nobe ukokeja kukuteja ne kukusenga umone’mba ye mwiivwaninanga bantu bavule bafwilwa. Bible wituvuluja’mba: “Mulunda usanswanga mafuku onso nyeke, mukimonya-malwa wilombola bu-mwanabo.”—Nkindi 17:17.

Yehova Leza Umpangi wetu ye Mulunda muyampe wa yewa ufwidilwe. Mupungulwile mutyima obe mu milombelo mwanda ‘aye ukutele mutyima.’ (1 Petelo 5:7) Kadi ulaile’mba boba bonso bamupungulwila mityima yabo bakatalajibwa na “ndoe ya Leza itabukile milangwe yonso.” (Fidipai 4:6, 7) Kadi itabija Leza akundape na Kinenwa kyandi Bible kine kileta busengi. Lemba bisonekwa bikusenga. (Tala kapango.) Ukokeja ne kulama’mo bimo pa mutwe. Shi wikale na ino milangwe ya kulangulukila’po ikakukwasha bufuku podi bunka ne pakunyema tulo.—Isaya 57:15.

Jack mwana-mulume wa myaka 40 wafwidilwe panopano mukaji na misongo ya dyaya. Jack unena’mba kyaba kivule wivwananga bushiyena bukatampe. Inoko milombelo imukwashanga. Unena’mba: “Ponombanga Yehova, nkimonengapo kadi bu ngidi bunka. Divule nsantamukanga bufuku natunya kulāla monka. Pa kupwa kutanga ne kulangulukila pa milangwe isenga idi mu Bisonekwa ne kupungulwila Yehova mutyima wami mu milombelo, mutyima untukanga kupwa naivwana ndoe, yatalaja ñeni najokela mu tulo.”

Nsongwakaji Vanessa wafwidilwe inandi na misongo. Nandi wemwenine bukomo bwa milombelo. Unena’mba: “Mu kitatyi kyondi mu makambakano ngitanga’tu Yehova naanza kudila. Yehova nandi ungivwananga nyeke ne kunkomeja ponso ponzoza.”

Badingidi ba myanda ya madilo badingilanga divule boba balwa na bulanda bepāne bininge mu kukwasha bakwabo ne kwibengidila. Kulonga namino kubwanya kuleta nsangaji ne kutyepeja’ko bulanda. (Bilongwa 20:35) Bene Kidishitu bavule kebafwilwe bamwene’mba kukwasha bakwabo kwibaseñanga bininge.—2 Kodinda 1:3, 4.