Boila Ñeni ku Bengidi ba Yehova ba Lulamato

1, 2. Le Davida wālombwele namani amba ulamete kudi Leza? (Tala kifwatulo ku ngalwilo.)

SOLO ne basola bandi 3 000 bākakimbile Davida mu ntanda mutuputupu ya Yuda mwanda wa kumwipaya. Inoko difuku dimo bufuku, Davida ne bana-balume bandi batana Solo ne basola bandi pobādi baladīle. Abo bonso bādi mu tulo bukū, penepa Davida ne Abishai baenda bityebitye bapita basola bafika padi Solo. Abishai wasongola Davida amba: “Ino pano nakwisashila ndeke bidi mutape na mukobe mubambakenye panshi, dimo dyonka kete, kadi nkikamutapepo musungu wa bubidi-ehe.” Ino Davida kāmulekelepo epaye Solo. Wālombola Abishai amba: “Kokamonakanyapo, mhm; mwanda le i ani uyukile kōlola kuboko kwandi padi mushingwe-māni wa Yehova, ne kwikala wampikwa mambo, i ani le, a?” Kadi Davida wāmulombola amba: “Leka! leka! leka! Yehova antale amba nakōlola kuboko kwami padi mushingwe-māni wa Yehova.”—1 Samwele 26:8-12.

² Davida wāivwanije kine kyaādi usakilwa kulamata kudi Yehova. Wājingulwile kine kyaādi ufwaninwe kulēmekela Solo ne kadi kādipo umufwatakenya bibi. Mwanda waka? Mwanda Leza ye wātongele Solo ekale bu mulopwe wa Isalela. Dyalelo, pamo bwa pa kala, Yehova usakanga bengidi bandi bonso bamulamate ne kulēmeka boba bapele lupusa.—Tanga Mika 6:8.

3. Le Abishai wādi ulamete Davida namani?

³ Abishai wādi ulēmekele Davida, mwanda Leza ye wāmutongele bu mulopwe. Davida pa kubikala bu mulopwe, wālonga bubi bukatampe. Wālala na mukaja Udia ne kusapwila Yoabe epaije Udia ku divita. (2 Samwele 11:2-4, 14, 15; 1 Bilongwa 2:16) Yoabe wādi mwanabo na Abishai, padi Abishai wāivwene byālongele Davida, ino wāendelele kulēmeka Davida. Kadi, Abishai wādi mwendeji wa basola, wādi ubwanya kwingidija luno lupusa mwanda wa ekale mulopwe, ino kālongelepo namino nansha dimo. Nansha nabya, wāingidile Davida ne kumulama ku balwana nandi.—2 Samwele 10:10; 20:6; 21:15-17.

4. (a) Lelo Davida wāikele namani bu kimfwa kya muntu ulamete Leza? (b) Le i bimfwa’ka bikwabo byotusa kubandaula?

⁴ Davida wālamete kudi Yehova mu būmi bwandi bonso. Paākidi nkasampe, wāipaile Ngodiata kampangala wādi utuka Yehova ne bene Isalela. (1 Samwele 17:23, 26, 48-51) Davida paādi mulopwe, Natana mupolofeto wa Yehova wāmudingila pangala pa bubi bwaālongele. Bukidi bonka, Davida wāitabija amba i mulonge bubi kupwa wēsāsa. (2 Samwele 12:1-5, 13) Mwenda mafuku, Davida paādi ke mununu, wāletele bintu bivule byabulēme mwanda wa kūbaka tempelo ya Yehova. (1 Bilongwa 29:1-5) I kimweke patōka amba nansha Davida byaālongele bilubo bikatampe mu būmi bwandi, ino wāshele nyeke mulamate kudi Leza. (Ñimbo 51:4, 10; 86:2) Mu kino kishinte, tusa kwisambila’mo pa kimfwa kya Davida ne kya bantu bakwabo bāikele’ko mu kine kitatyi’kya ne kuboila ñeni ku muswelo obādi balamete Yehova bininge kupita’ko muntu ye-yense. Kadi tusa kwisambila ne pa ngikadilo mikwabo mine iketukwasha tulonge namino.

LELO UKALAMATA KUDI YEHOVA?

5. Lelo i ñeni’ka yotuboila ku kilubo kya Abishai?

⁵ Abishai wādi usaka kulamata kudi Davida paāsakile kwipaya Solo. Davida byaādi uyukile amba i kibi kutapa “mushingwe-māni wa Yehova,” o mwanda kālekelepo Abishai epaye mulopwe. (1 Samwele 26:8-11) Kino kitupa bufundiji bwa kamweno bwa amba: Potusaka kuyuka i ani otufwaninwe kulamata dibajinji, tufwaninwe kulangulukila pa misoñanya ya mu Bible moibwaninya kwitukwasha mu uno mwanda.

6. Nansha byo kyendele’mo kulamata bantu ba mu kisaka ne balunda, mwanda waka tufwaninwe kutadija?

⁶ I kyendele’mo kulamata muntu kabidye otusenswe, pamo bwa mulunda nansha muntu wa mu kisaka. Ino byotudi ba kubulwa kubwaninina, milangwe yetu ibwanya kwitudimba. (Yelemia 17:9) Shi muntu otusenswe walonga bintu bibi ne kutamba mu bubine, tufwaninwe kuvuluka’mba kintu kya mvubu i kulamata kudi Yehova bininge kutabuka muntu ye-yense.—Tanga Mateo 22:37.

7. Le i muswelo’ka washele kaka umo ulamete Leza mu ngikadilo mikomo?

⁷ Ubwanya kulombola’mba ulamete kudi Yehova shi muntu kankenge wa mu kyobe kisaka wapangwa mu kipwilo. Kimfwa, difuku dimo Inandya Anne, wadi mupangwe, waita Anne ku telefone amba nsaka ngiye nkupempule.^[1] (Tala bilembwa bya ku mfulo.) Inandya Anne wanena’mba nkikidipo na nsangaji mwanda kisaka kekikisambengapo nami. Kino kyaletele Anne malangatyima, ebiya wamulaya amba nsa kukulondolola kupityila ku mukanda. Kumeso kwa Anne kulemba uno mukanda, walangulukile bidi pa misoñanya imo ya mu Bible. (1 Kodinda 5:11; 2 Yoano 9-11) Mu mwine mukanda’wa washintulwila’mo inandi na kanye amba i abe wapelele kisaka pa kulonga bubi ne kupela kwisāsa. Anne walombola inandi amba muswelo umo’tu kete ofwaninwe kwikala na nsangaji monka i wa kujokela kudi Yehova.

8. Le i ngikadilo’ka iketukwasha tulamate kudi Leza?

⁸ Bengidi ba Leza ba lulamato ba mu kitatyi kya Davida bādi kadi na kwityepeja, kanye ne bukankamane. Nanshi tumonei muswelo ubwanya kwitukwasha ino ngikadilo tulamate kudi Yehova.

TUFWANINWE KWITYEPEJA

9. Mwanda waka Abenele wāsakile kwipaya Davida?

⁹ Yonafane mwanā Solo ne Abenele muludiki wa basola ba Isalela, bāmwene Davida uleta mutwe wa Ngodiata kudi Mulopwe Solo. Yonafane wāsambile bulunda na Davida ne kushala nyeke mulamate kwadi. (1 Samwele 17:57–18:3) Inoko Abenele kālongelepo namino. Mafuku pa kupita’po wēkupa kudi Solo, mwine wādi ukimba kwipaya Davida. (1 Samwele 26:1-5; Ñimbo 54:3) Ba Yonafane ne Abenele bādi bayukile’mba Leza usakanga Davida ekale mulopwe wa Isalela. Ino Solo pa kufwa, Abenele kākwatakenyepo Davida. Ino, Abenele wādi usaka kubikika Ishi-boshete mwanā Solo bu mulopwe. Mwenda mafuku Abenele wāsaka kubikala aye mwine bu mulopwe, pakwabo kino kyo kyāmutonwene alāle na mukaja Mulopwe Solo. (2 Samwele 2:8-10; 3:6-11) Mwanda waka ba Yonafane ne Abenele bādi na mumweno mwishile padi Davida? Mwanda Yonafane wādi mulamate kudi Yehova ne kadi wādi mwityepeje ino Abenele mpikila.

10. Mwanda waka Abisalome kādipo ulamete kudi Leza?

¹⁰ Abisalome mwanā Mulopwe Davida, kālametepo Leza mwanda kādipo mwityepeje. Wādi usaka kubikala, o mwanda wēlongele “dikalo ne tubalwe, ne bana-balume makumi atano bakutangila ku meso andi.” (2 Samwele 15:1) Kadi wābombwele bene Isalela bavule balamate kwadi. Kupwa wāsaka kwipaya’nka ne shandi, nansha byaādi uyukile amba Yehova ye wāmubikikile pa Isalela.—2 Samwele 15:13, 14; 17:1-4.

11. Le i bika byotwifunda mu nsekununi ya mu Bible ya ba Abenele, Abisalome, ne Baluki?

¹¹ Shi muntu ketyepejepo ne usaka kwikala na lupusa lukomo, bikekala bikomo kwadi kushala’ye nyeke mulamate kudi Leza. Na bubine, tuswele Yehova ne kadi ketusakangapo kwikala na mutyima wa kwisakila pamo bwa ba Abenele ne Abisalome. Inoko tufwaninwe kutadija amba twakatamija mutyima wa kusanswa lupeto ne kaji na kwibimona bu bintu bya mvubu mikatampe kotudi. Ne kino kibwanya kuzobolola kipwano kyetu na Yehova. Kitatyi kimo, Baluki mulembi wa Yelemia, wāsenswe bintu byākadipo nabyo ne kujimija lubilo lonka nsangaji ya kwingidila Leza. Penepo Yehova wālombola Baluki amba: “Talapo bidi, kyoki kyo naubakile ami nkatūta’kyo, ne kyoki kyo nakunine ami nkekitukuna; i enka nabya ne mu ntanda yonsololo mwine. Penepa kadi lelo ukimbe bintu bikatakata bya abe mwine’ni, a? Kokikimba’byopo.” (Yelemia 45:4, 5) Baluki wātejeje Yehova. Kadi netu tufwaninwe kumuteja, mwanda panopano ponka usa konakanya ino ntanda mibi.

12. Lombola kine kyoketubwaninyapo kulameta kudi Yehova shi tudi na mutyima wa kwisakila.

¹² Daniel, tutu umo wa mu Meksike, wadi usaka kuyuka i ani wafwaninwe kulamata. Wadi ukimba kusonga nsongwakaji umo ke Kamonipo wa Yehova. Daniel unena amba: “Naendelele kumutumina mikanda nansha ponadi kendi pania.” Ebiya wajingulula’mba wadi na mutyima wa kwisakila. Kadipo ulamate kudi Yehova, kadi wadi ufwaninwe kwityepeja. Kupwa wasapwila’mo mukulumpe umo wa bwino myanda ya uno nsongwakaji. Daniel ushintulula’mba: “Waunkweshe mone’mba pa kulamata kudi Leza, binomba ndeke kutumina uno mwana-mukaji mikanda. Pa kupwa kulombela misunsa mivule koku ndila, penepa naleka’byo kumutumina mikanda. Pano ngidi na nsangaji mivule mu busapudi.” Daniel pano udi na mukaji uswele Yehova, kadi wingila bu mutadi wa kipindi.

KULAMATA KUDI LEZA KWITULENGEJA TWIKALE BIYAMPE

13. Lelo Natana wāshele namani mulamate kudi Leza ne kudi Davida kitatyi kyālubile Davida?

¹³ Shi tulamete kudi Yehova, tubwanya kadi kulamata ne bakwetu ne kwibakwasha mu muswelo mwendele’mo. Mupolofeto Natana wāshele ulamete kudi Yehova ne kudi Davida. Davida pa kupwa kuyata mukaja bene ne kwipaya mulumyandi, Yehova wātuma Natana akamudingile. Natana wādi mukankamane ne wādi ukōkele Yehova. Kadi wālongele bintu na tunangu ne kwisamba na Davida mu muswelo muyampe. Wākweshe Davida evwanije bukatampe bwa bubi bwaālongele. Penepa wāmusekunwina nsekununi ya mwana-mulume umo wāibile kana ka mukōko ka mwana-mulume umo mulanda. Davida pa kwivwana kino, wāfītwa pa kilongwa kya uno mpeta. Kupwa Natana wāmunena amba: “Muntu’wa i enka abe’o.” Ebiya Davida wājingulula’mba i mulubile Yehova.—2 Samwele 12:1-7, 13.

14. Le i muswelo’ka obwanya kulamata kudi Yehova, ku balunda ne ku babutule bobe?

¹⁴ Nobe ubwanya kulamata bidi kudi Yehova ne ku bantu bakwabo na kanye. Kimfwa, shi ubayuka amba mwanetu umo i mulonge bubi bukatampe. Bine, ukasaka kulamata kwadi, nakampata shi i mulunda nobe wa pa mutyima nansha shi i muntu wa mu kisaka. Inoko kadi uyukile’mba kulamata kudi Yehova kyo kintu kya mvubu kutabuka. Pamo bwa Natana, kōkela Yehova ne kwikala na kanye kudi mwanenu. Mulombole amba ufwaninwe kukalomba bukwashi ku bakulumpe ne kadi amba ufwaninwe kukebasapwila kiponka na ponka. Shi wapele, nabya kalombole’mo bakulumpe. Shi ulonge namino, ukashala mulamate kudi Yehova. Kadi mu kino kitatyi, ubalombola kanye kudi mwanenu mwanda bakulumpe bakamukwasha ajokeje monka kipwano kyandi na Yehova. Bine, bakamudingila na butūkanye ne mu muswelo muyampe.—Tanga Levi 5:1; Ngalatea 6:1.

TUFWANINWE KWIKALA BAKANKAMANE PA KULAMATA KUDI LEZA

15, 16. Mwanda waka Hushai wādi usakilwa bukankamane pa kulamata kudi Leza?

¹⁵ Hushai wādi mulunda wādi ulamete Mulopwe Davida. Bantu pobāsakile kubikika Abisalome bu mulopwe, Hushai wālombwele bukankamane na kushala mulamate kudi Davida ne kudi Leza. Wāyukile amba Abisalome wafika mu Yelusalema ne basola bandi ne amba Davida wanyema. (2 Samwele 15:13; 16:15) Ino le Hushai wālongele’po bika? Le wānyemene Davida ne kwilunga kudi Abisalome? Mhm. Nansha Davida byaādi ke mununu kadi bantu bavule byobāsakile kumwipaya, Hushai wālamete kwadi mwanda Yehova ye wābikikile Davida bu mulopwe. O mwanda Hushai wāendele kuketana na Davida ku Lūlu lwa Impafu.—2 Samwele 15:30, 32.

¹⁶ Davida wānene Hushai ajokele ku Yelusalema ne kwimwekeja kudi Abisalome bu mulunda nandi mwanda wa kunekenya Abisalome ateje andi madingi pa kyaba kya kuteja a Ahitofele. Hushai wādi usakilwa bukankamane na kutūla būmi bwandi mu kyaka pa kukōkela Davida ne kushala mulamate kudi Yehova. Davida wālomba Yehova akwashe Hushai, Yehova nandi wāmukwasha. Abisalome wātejeje madingi a Hushai pa kyaba kya Ahitofele.—2 Samwele 15:31; 17:14.

17. Mwanda waka tusakilwa bukankamane pa kwikala na lulamato?

¹⁷ Tusakilwa bukankamane pa kulamata kudi Yehova ne kumukōkela nansha shi bantu ba mu kisaka, bengidi-netu, nansha shi bakatampe ba lupusa betulomba kulonga bika. Kimfwa, Taro wa mu Jampani, tamba pa bwanuke bwandi wadi ulonga bukomo bwa kusangaja bambutwile bandi. Wadi wibakōkele ne kwibalamata, ke mwandapo’tu wadi ufwaninwe kulonga namino, ino i mwanda wadi wibaswele. Ino paashilwile kwifunda na Batumoni ba Yehova, bambutwile bandi bamukankaja. Kino kyamutyumwine mutyima, kadi kino kyaikele kikomo kwadi kwibalombola’mba ke mukwate kala butyibi bwa kukatanwa ku kupwila. Taro unena amba: “Naivwene bululu ku mutyima mu myaka mivule yonalekele kukebapempula. Nalombele ngikale na bukankamane ne kushala mulamate ku butyibi bwami. Pano mumweno wabo ke mushinte, kadi nebapempulanga kitatyi kyonso.”—Tanga Nkindi 29:25.

18. Lelo bino byotwefunda bibakukwasha namani?

¹⁸ Pamo bwa ba Davida, Yonafane, Natana ne Hushai, tuloelelwei kulamata kudi Yehova. Ketufwaninwepo nansha dimo kwikala bwa ba Abenele ne Abisalome bābudilwe lulamato. Bine, twi ba kubulwa kubwaninina kadi tuloñanga bilubo. Shi ke pano, tulombolei amba kulamata kudi Yehova kyo kintu kya mvubu mpata mu būmi bwetu.