Lamata Kudi Yehova

1, 2. Mwanda waka bulunda bwa ba Yonafane na Davida i kimfwa kitendelwa kya lulamato?

YONAFANE ye uno wātulumukile pa kumona bukankamane bwa Davida. Davida wāipaile Ngodiata kampangala ne kuleta “mutwe wa mwine Fidishitia” ku meso a Solo, mulopwe wa Isalela, shandya Yonafane. (1 Samwele 17:57) Yonafane kātatenepo amba Leza udi na Davida, kadi tamba papo, Yonafane ne Davida basambile bulunda bwa pa mutyima. Bekulupije amba bakashala nyeke belamate umo ku mukwabo. (1 Samwele 18:1-3) Yonafane wāshele nyeke mulamate kudi Davida.

² Yonafane wālamete Davida nansha Yehova byaāmutongele Davida kwikala bu mu mulopwe mpingakani wa Isalela pa kyaba kya Yonafane. Kadi Solo paādi usaka kwipaya Davida, Yonafane wākingile mulunda nandi. Wādi uyukile’mba Davida ufyeme mu ntanda mutuputupu ya Holesha, penepa Yonafane wāenda kukamukankamika akulupile nyeke mudi Yehova. Yonafane wāsapwidile Davida amba: “Kokatyina moyo, mwanda kuboko kwa tata Solo kekukakutanapo, ehe; kabidi ukabikalanga bulopwe bwa pa Isalela, nami nkekala wakukulonda.”—1 Samwele 23:16, 17.

3. I kintu’ka kyādi na mvubu mpata kudi Yonafane kutabuka lulamato lwa kulamata Davida, ne tubekiyuka namani? (Tala kifwatulo ku ngalwilo.)

³ Tusangelanga nyeke bantu badi na lulamato. Ino, le tusangedile Yonafane’tu mwanda wādi ulamete Davida? Aa, kulamata kudi Leza kyo kyādi kintu kya mvubu mpata mu būmi bwa Yonafane. Ne kadi bidi kino kyo kyāmulengeje alamate Davida ne kuleka kumukwatyilwa mukao, nansha Davida byaādi wa kubikala pa kyaba kyandi. Yonafane wākweshe Davida akulupile Yehova. Bano bana-balume bonso bādi nyeke balamete Yehova ne kwilamata abo bene. Bālamine mulao obelaile wa amba: “Yehova ukekala umbukata bwa ami ne abe, ne umbukata bwa lukunwa lwami ne lobe, nyeke ne nyeke-ke.”—1 Samwele 20:42.

4. (a) Le i bika biketupa nsangaji ne kuloelelwa kwa binebine? (b) I bika byotusa kubandaula mu kino kishinte?

⁴ Netu tufwaninwe kulamata kisaka kyetu, balunda, batutu ne bakaka mu kipwilo. (1 Tesalonika 2:10, 11) Inoko kintu kya mvubu kupita bino byonso i lulamato lotufwaninwe kulamata Yehova. Mwanda Aye bidi ye wētupele būmi! (Kusokwelwa 4:11) Shi tulamate kwadi, tukekala na nsangaji kadi tukaloelelwa. Tuyukile amba tufwaninwe kulamata kudi Leza nansha ke mu bitatyi bikomo bine. Mu kino kishinte, tusa kubandaula kimfwa kya Yonafane mokitukwashisha tulamate nyeke Yehova mu bintu biná: (1) potumona amba muntu upelwe lupusa kakifwaninwe’lopo, (2) potutonga muntu ulamatwa, (3) shi tutu utangidile mingilo wetwimvwana bibi ne kwitulongela bintu na ntondo, ne (4) potumona’mba tubakomenwa kufikidija byotwalaile.

POTUMONA AMBA MUNTU UPELWE LUPUSA KAKIFWANINWE’LOPO

5. Mwanda waka byākomēne bantu ba Isalela kulamata kudi Leza kitatyi kyādi kikibikele Solo?

⁵ Yonafane ne bantu ba Isalela bādi mu ngikadila mikomo. Mulopwe Solo, shandya Yonafane, wātombokele, Yehova nandi wamwela. (1 Samwele 15:17-23) Inoko, Leza wādi ukimulekele endelele kuludika mu myaka mivule. O mwanda byākomēne bantu kulamata kudi Leza kitatyi mulopwe utongelwe kushikata pa “lupona lwa Yehova” ulonga bintu bibi.—1 Bilongwa 29:23.

6. I kika kilombola amba Yonafane wāshele nyeke ulamete kudi Yehova?

⁶ Yonafane wāshele nyeke ulamete kudi Yehova. Langa’po byālongele Yonafane pashilwile’tu Solo kutombokela Leza. (1 Samwele 13:13, 14) Mu kino kitatyi basola bavule bene Fidishitia bāile na makalo 30 000 kutamba Isalela. Solo papo wādi’tu na basola 600, kadi enka aye kete ne Yonafane bo bādi na byabulwi. Inoko Yonafane kākwetwepo moyo. Wāvulukile binenwa bya mupolofeto Samwele bya amba: “Yehova kakazobololapo bandi bantu mwanda wa dijina dyandi dikatakata.” (1 Samwele 12:22) Yonafane wānena sola mukwabo amba: “Kutupu kyakumukankaja Yehova kupandija na bangi nansha na batyetye.” Penepo aye ne sola mukwabo bakatamba kisumpi kya bene Fidishitia ne kwipaya’mo kintu kya basola 20. Yonafane wādi na lwitabijo mudi Yehova, kadi Yehova nandi wāmwesele. Yehova wālengeje ntanda itenkane, bene Fidishitia bakwatwa moyo. Pa kushilula bulwi, bene Fidishitia bāshilula kwitapa abo bene na bene, bene Isalela bānekenya bulwi.—1 Samwele 13:5, 15, 22; 14:1, 2, 6, 14, 15, 20.

7. Lelo Yonafane wādi umwene shandi namani?

⁷ Nansha shi Solo wāendelele na kutombokela Yehova, Yonafane aye wādi nyeke ukōkele shandi ponso pobibwanika. Kimfwa, aye ne shandi bādi balwa mwanda wa kukinga bantu ba Yehova.—1 Samwele 31:1, 2.

8, 9. Le tulamatanga namani kudi Leza potulēmeka bapelwe lupusa?

⁸ Pamo bwa Yonafane, netu tubwanya kulamata Yehova na kukōkela lupusa lwa mu ntanda yotushikete’mo ponso pobibwanika. Yehova ulekele bano “ba lupusa batabukile bukatampe” betuludike, kadi usaka batwe twibalēmeke. (Tanga Loma 13:1, 2.) O mwanda mwine tufwaninwe kulēmeka ba lupusa nansha shi badi na budimbidimbi ne shi tumona amba kulēmekwa kekukibafwaninwepo. Nanshi, tufwaninwe kulēmeka boba bonso bapelwe lupusa na Yehova.—1 Kodinda 11:3; Bahebelu 13:17.

⁹ Kaka Olga, wa mu Amerika wa Kunshi, walamete kudi Yehova na kulēmeka wandi mulume nansha byaadi umususula.^[1] (Tala bilembwa bya ku mfulo.) Kyaba kimo mulumyandi wadi upela kwisamba nandi, shi kanena, i kumushinika binenwa bitapa amba mwanda i Kamoni wa Yehova. Wāmulombwele’nka ne kumulombola amba usa kumunyema amusele ne bana bene. Ino kaka Olga kajokejepo “kibi ku kibi.” Walongele bukomo bwa kwikala mukaji muyampe. Wadi umutēkela, umufudila bisandi, ne kuta mutyima bantu bakwabo mu kisaka. (Loma 12:17) Kadi ponso pobibwanika, wadi utwala mulume kwabo kukapempula ba mu kisaka ne balunda nandi. Kimfwa, mulume paadi usaka kwenda kukadila shandi ku kibundi kikwabo, kaka Olga wateakenye bintu byonso bya mu lwendo. Pa kufika ku kidilo mu kipwilo, kaka wailaija mulume panja. Myaka pa kupita’po, mulumya Olga washilula kulela mukaji biyampe mwanda wa kitūkijetyima kya mukaji ne kumulēmeka kwaadi umulēmekele. Pano mulume ukankamikanga mukaji kukapwila, kyaba kimo ukamutwala’ko. Pamopamo mulume wendanga kukapwila nandi.—1 Petelo 3:1.

POTUTONGA MUNTU ULAMATWA

10. Le Yonafane wāyukile namani muntu wafwaninwe kulamata?

¹⁰ Solo paānene amba usa kwipaya Davida, Yonafane wātenwe na butyibi bukomo bwa kukwata. Wādi usenswe kulamata shandi, ino kadi wādi usaka kulamata Davida. Yonafane wāyukile amba Leza udi na Davida, kākidipo na Solo, o mwanda wālamete Davida. Wādyumwine Davida akafyame ne kusapwila Solo kine kyakafwaninwepo kwipaila Davida.—Tanga 1 Samwele 19:1-6.

11, 12. Le buswe botuswele Leza bwitukwasha namani tutonge kulamata kwadi?

¹¹ Alice, kaka umo wa mu Ostrali, wadi usaka kuyuka i ani wafwaninwe kulamata. Paadi wifunda Bible wasapwidile kyandi kisaka bintu byaadi wifunda. Kadi webalombwele’mba kabwanyapo kufeta nabo Noele ne kwibashintulwila kine kyaapelela kufeta’yo. Kisaka kyafītyilwe, kadi mwenda mafuku kyamulobela bininge. Mwanda bamwene amba Alice kakibatelepo mutyima. Ponka’po inandi wanena’mba, nkikisakepo kadi kumumona Alice monka. Alice unena amba: “Natenekelwe bininge ku mutyima mwanda nadi nsenswe kyami kisaka. Nansha nabya, nasumininwe kutūla Yehova ne wandi Mwana pa kifuko kibajinji mu mutyima wami, ebiya nabatyijibwa ku kitango kyalondele’po.”—Mateo 10:37.

¹² Ketufwaninwepo kulamata bininge ku bintu kimfwa, kisumpi kya makayo, masomo, nansha ntanda yetu, kupita’ko kulamata Yehova. Kimfwa, Henry wadi uta kisolo mu kisumpi kya ku masomo kadi wadi usaka kwikala bingwa wa masomo abo. Byaadi uta kisolo yenga ne yenga, kakidipo kadi na kyaba kya kwenda mu busapudi nansha kukapwila kwine. Henry unena’mba makayo aikele na bulēme bukatampe kwadi, walamata masomo kupita’ko Leza. Ko kukwata wakwata butyibi bwa kuleka kisolo kya ku masomo.—Mateo 6:33.

13. Le lulamato lwetu kudi Leza luketukwasha namani tulwe na bikoleja bya mu kisaka?

¹³ Kyaba kimo bibwanya kwikala bikomo kulamata ku bonso ba mu kisaka. Kimfwa, Ken unena’mba: “Nadi nsaka kyaba ne kyaba kukapempula mama wadi ke mununu ne kushikata nandi dimodimo. Ino mama ne mukajami kebadipo bomvwañana.” Ubweja’ko amba: “Shi nsangaje yeu, nabya nasanshija mukwabo.” Ken walangulukile pa binena Bible ne kumona’mba mu uno mwanda, bifwaninwe kusangaja mukaji ne kumulamata. Ko kukwata wakwata butyibi bwasangeje mukaji. Kupwa, washintulwila mukaji kine kyafwaninwe kwikadila biyampe na muko. Kadi wakashintulwila ne inandi kyafwaninwe kulēmekela wandi mukaji.—Tanga Ngalwilo 2:24; 1 Kodinda 13:4, 5.

SHI TUTU WETWIMVWANA BIBI NE KWITULONGELA BINTU NA NTONDO

14. Le Solo wāsuswile namani Yonafane?

¹⁴ Tubwanya kadi kulamata Yehova shi tutu utangidile mingilo wetulongela bintu na ntondo. Mulopwe Solo wātongelwe na Leza, ino wādi ususula wandi mwana. Kādipo wimvwanije mwanda waka Yonafane usenswe Davida. Yonafane paādi usaka kukwasha Davida, Solo papo mutyima fututu, wafwija wandi mwana bumvu mu kibumbo kya bantu. Nansha nankyo Yonafane wādi’nka ulēmekele shandi. Koku kadi, ulamete kudi Yehova ne kudi Davida, mwine wādi utongelwe na Leza kukekala mulopwe wa Isalela.—1 Samwele 20:30-41.

15. Le tufwaninwe kulonga namani shi tutu wetufwatakenya bibi?

¹⁵ Dyalelo, batutu batangidile mingilo mu bipwilo byetu baloñanga bukomo bwa kulongela bonso biyampe. Inoko i ba kubulwa kubwaninina. O mwanda, babwanya padi kutunya kwimvwanija kyotwalongela kintu kankenge. (1 Samwele 1:13-17) Nanshi shi abetufwatakenya ne kwitwimvwana bibi, batwe tulamatei nyeke kudi Yehova.

POTUMONA’MBA TUBAKOMENWA KUFIKIDIJA BYOTWALAILE

16. Lelo i mu ngikadilo’ka motufwaninwe kulamata kudi Leza ne kubulwa mutyima wa kwisakila?

¹⁶ Solo wādi usaka Yonafane apyane bulopwe pa kyaba kya Davida. (1 Samwele 20:31) Inoko Yonafane wādi usenswe Yehova ne kumulamata. Pa kyaba kya kwisakila, Yonafane wāsambile bulunda na Davida ne kufikidija mulao waāmulaile. Na bubine, muntu yense uswele Yehova ne kumulamata, “shi watyipe mutyipo wa kulonga kintu kikomo, kashintapo kyanene.” (Ñimbo 15:4, Dibuku Dijila.) Shi tulamete kudi Leza, nabya tukalama mutyipo wetu. Kimfwa, Shi tubeivwana mu myanda itala bya busunga, tukalongela monka motwitelekele, nansha shi kulonga namino i kukomo. Ne kadi shi tudi na myanda mu busongi bwetu, tukalombola buswe botuswele Yehova na kulamata mwinē petu.—Tanga Malaki 2:13-16.

17. Lelo bino byotwefunda bibakukwasha namani?

¹⁷ Tusakanga kwikala pamo bwa Yonafane, na kulamata kudi Leza nansha ke mu bitatyi bikomo. Shi ke pano tushalei nyeke balamate ku batutu ne bakaka nansha shi abetufītyija mutyima. Nabya tukasangaja mutyima wa Yehova, ne kino kitupanga nsangaji. (Nkindi 27:11) Tukulupile amba Leza ukendelela nyeke kwitulongela bintu biyampe ne kwituta mutyima. Mu kishinte kilonda’ko, tukamona’mo ñeni yotuboila ku bantu ba mu kitatyi kya Davida bādi na lulamato ne bakwabo kebadipo nalo.