Yonafane, Muntu Mukankamane Kadi wa Lulamato

Yonafane, mwana mukulu wa Mulopwe Solo, wādi sola mukankamane. Davida wānenene amba Yonafane wādi na lubilo kupita mukebo kadi mukomo kupita ntambo. Difuku dimo, Yonafane wāmwene basola pa mukuna. Wāsapwila sola umuselelanga bya bulwi amba: ‘Tusa kukalwa nabo enka shi Yehova wetupe kiyukeno. Shi bene Fidishitia abetwite amba kandai kuno, ebiya ketukalu nabo.’ Bene Fidishitia bēbela mabila’mba: ‘Kandai kuno tulwe!’ Penepo ba Yonafane ne sola wandi’wa bākanda pa mukuna ne kwipaya basola 20.

Yonafane byaādi mwana mukulumpe mu bana ba Solo, aye ye wādi wa kwikala bu mulopwe wa kupingakena shandi. Inoko Yonafane wāyukile’mba Yehova ke mutonge Davida bu mulopwe wa Isalela; nansha nankyo, kāmukwatyilwepo mukao. Ba Yonafane ne Davida bādi balunda ba pa mutyima. Bēlaile amba bakekinga ne kwipandija. Yonafane wāpele’nka ne Davida kotyi, kipete, buta bwa miketo, ne mukaba bu kiyukeno kya bulunda.

Difuku dimo, Davida paādi unyema Solo, Yonafane wāendele kudi Davida wāmusapwila’mba: ‘Wikomeje, kadi kankamana. Yehova i mukutonge bu mulopwe. Kadi ne tata mwine uyukile’kyo.’ Le nobe usakanga kwikala na mulunda muyampe pamo bwa Yonafane?

Yonafane wātūdile būmi bwandi mu kyaka misunsa mivule, mwanda’tu wa kukwasha mulunda nandi. Wādi uyukile’mba Mulopwe Solo ukimbanga kwipaya Davida, o mwanda wāsapwidile shandi amba: ‘Usa kulonga bubi bukatampe shi wipaye Davida; i kutupu kibi kyalongele.’ Solo wālobele Yonafane bininge. Myaka pa kupita’po, ba Solo ne Yonafane bāfwila pamo ku divita.

Yonafane pa kufwa, Davida wākakimbile Mefibosheta, mwanā Yonafane. Davida pa kumusokola, wāsapwila Mefibosheta amba: ‘Nsa kukukwatakanya mu būmi bobe bonso, mwanda shobe wādi mulunda nami wa pa mutyima. Usa kushikata mu njibo yami mikatakata ne kudya ku meza ami.’ Bine, Davida kāidilwepo mulunda nandi Yonafane.