Lelo Wadi Uyukile Kala?

Mwanda waka Yesu wādi na bubinga bwa kwita bansunga bādi bapoteja banyema mu tempelo ya mu Yelusalema bu “batubwalāla”?

TUTANGA mu Evanjile ya Mateo amba: “Penepo Yesu watwela mu tempelo kapanga boba bonso badi bapoteja ne kupota bintu mu tempelo kadi wakuvumika mameza a badi bashintula lupeto ne bibasa bya boba badi bapoteja bankunda. Kaebanena’mba: “Kilembelwe amba: ‘Njibo yami ikatelwa bu njibo ya milombelo,’ ino banwe mubeyalamuna ke mutá wa batubwalāla.’”​—Mateo 21:12, 13.

Mānga ilombola’mba bansunga ba mu tempelo bādi badimba bampotyi babo na kwibatunga bei mikande. Kimfwa bankunda bādi na bei mitūke, yādi ibwanya ne balanda kupota’ko ba kukalambula bu bitapwa. Inoko, bilembwa bya pa kala bya Bayuda binena’mba kudi kitatyi kimo mu myaka katwa kabajinji kyādi kipota muntu bankunda babidi ku ndenadi imo ya olo. Byādi bilomba muntu engile mafuku 25 pa kusokola luno lupeto. Bankunda bākandile bei, balanda kebakomenwa kwibapota. (Levi 1:14; 5:7; 12:6-8) Labi Shimioni Ngamayela wālobele pa uno mwanda, wātyepejeja’ko Bayuda buvule bwa bitapwa byādi bilombwa kulambula. Ponka na ponka, bei ya bankunda yatūka bininge.

Enka na motwekimwena, bansunga ba mu tempelo bādi na makomwa-meso ne kusaka kumwena pa mitwe ya bampotyi babo. O mwanda Yesu wādi na bubinga bwa kwibeta bu “batubwalāla.”