‘Tengelai’
1 Pēsambile Yesu binenwa bisonekelwe mu Mateo 26:38-41, wādi kadi pabwipi ponka na kupita mu bitatyi bikomokomo bya umbūmi bwandi bwa bu muntu. Byādi bya kwikala byamvubu mikatampe mu nsekununi yonso. Kupandijibwa kwa bantu bonso kwadi kutengelwe na uno mwanda. Bana-babwanga ba Yesu bādi bafwaninwe ‘kutengela.’
2 Dyalelo tudi pa kitatyi kinekine kya kwiya kwa Yesu kuvuija mingilo yandi ibidi, ya bu mukudi ne bu mutyibi. Byotudi bakristu badimuke batele mutyima ku kupelakana kwa kitatyi, ketuloelelwangapo kuleka kwingila ne kukungila’nka bukudi mhm. Twi bayuke’mba tufwaninwe kwikala beteakanye kitatyi kyonso. Nanshi i kyamvubu amba twendelele na ‘kuputumina mu mingilo ne kulwa’ mu mwingilo wa Yehova. (1 Tem. 4:10) Lelo kidi muswelo’ka ku umo ne umo kasuku kandi umbukata mwetu? Lelo tutengele nyeke?
3 Twibandaulei: Yesu wānene monka kino kidyumu’mba: “Mwikale kudyumuka bānwe bene.” (Luka 21:34, 35) Tufwaninwe kudyumuka batwe bene, na kuta mutyima ku “[kwikala] bampikwa kutopekwa, bakubulwa mwanda ku bantu, . . . umbukata mwa bantu babi ba ino myaka bavutakane.” (Fid. 2:15, MB) Lelo difuku ne difuku twiendejanga bu bakristu, na kwiula Yesu ne kulonda misoñanya isonekelwe mu Kinenwa kya Leza? Tufwaninwe kufundula mwiendelejo onso wakubulwa kukwatañana na bwine-Kristu wa bwine ntanda, idi “munshi mwa lupusa lwa Mubi.” (1 Yoano 5:19, MB; Loma 13:11-14) Lelo kitatyi kyotwibandaulanga kupityila ku Bisonekwa, tumonanga bine amba twi batengele kukwatañana na mwekinenine Yesu?
4 Bakulumpe bafwaninwe kuta mutyima ku kuvuija na bupyasakane biselwa byabo mu kipwilo, na kujingulula’mba bakalandulwa pa muswelo obakwatakanya luombe. (Bah. 13:17) Mitwe yabisaka idi na biselwa byapabula bya kuludika bipango byayo mu mashinda a Yehova. (Ngal. 18:19; Yoshua 24:15; tala 1 Temote 3:4, 5) I kyamvubu kotudi batwe bonso tulonde mbila ya mu Bible ya kwisanswa batwe bene na bene. Kino ye kiyukeno kya pabula kya bwine-Kristu bwabine.—Yoano 13:35.
5 Tutei Mutyima ku Kudyumuna Mukwetu: Kutengela kulomba bintu bivule kupitako kwikala badyumuke kete. Tudi na kiselwa kya kulonga bana-babwanga. (Mat. 28:19, 20) Kusanswa mukwetu kufwaninwe kwitutonona tumudyumune mwanda wākapande ku bonakanyi bukaponena ino ntanda. Kino kiselwa kitala mukristu yense. I kipindi kyamvubu mikatampe mu mutōtelo wetu. (Loma 10:9, 10; 1 Kod. 9:16) Kitatyi kyotutambilanga mu uno mwingilo wa lupandilo, tutanwanga pavule na buñumauma ne kupangwapangwa. Nansha shi bantu bavule kebatengapo mutyima ku kidyumu kyetu, batwe tufwaninwe nyeke kwendelela kwikilonga. (Ezek. 33:8, 9) Buswe bwabine botusenswe Leza ne mukwetu buketusombela ku kūminina.
6 Kino ke kitatyi’po kya kwikala mu maloa. Ketufwaninwe’po kushīla malanga-tyima a difuku ne difuku mukenga wa kwitulabika, nansha kutweja mutwe enka mu byamazuwa bya ino ntanda byaikala ke dikinga kotudi. (Luka 21:34, 35) Dyalelo ye dyotufwaninwe kujingulula’mba tudi mu kitatyi kifwaninwe kusumininwa kwabine. Kitatyi kikatyiba Yesu Kristu butyibi bwa ino ngikadilo imbi, kibafwena pabwipi bininge. Enka boba batele mutyima, badyumuke ne batengele bo abo bakapanda. Shi tukokele ku misoñanya ya Yesu ne shi ‘tubakapande ku bino byonso,’ bine tukafwijako Yehova.—Luka 21:36.