Tupānei Milami Kitatyi Kyonso Kyotumona Mikenga
1 Tudi na buluji buvule bwa kukwatyila Kiteba kya Mulami ne Amkeni! na buleme bwa mushike. Lelo kudipo kadi majulunale makwabo asangaja bantu pamo bwa milami? Mu uno kweji yense, tukāpana nakampata milami; myanda idi mu milami ya kweji wadikumi itenga bantu pa mityima bininge. Mafuku mavule, tupānanga milami mivule mu mwingilo wa busapudi bwa ku njibo ne njibo, ino pano twiteakanyei mwanda wa kukapāna’yo kitatyi kyonso kyotukamona mikenga milumbuluke.
2 Shi tudi na “Kiteba kya Mulami” kya kweji 10, tukokelei milangwe pa kishinte kinena’mba: “Ntanda Yakubulwamo Divita—Ikekalako Kitatyi’ka?,” na kunena namino’mba:
◼ “Bantu bavule beipangulanga’mba, nansha biloñanga bantu bukomo bwabo bonso, mwanda waka kimweka bu kutūla ndoe pano pantanda i kwibakomene. Lelo ulanga namani pa bino binenwa bidi pa paje 5 wa kino Kiteba kya Mulami kya mu kweji 10? [Tangai musemwa umbajinji mu musāngo umbajinji ne mu musāngo wabubidi idi munshi mwa kamutwe ka mwanda kanena’mba “Mutōtelo—Kijika Kikatampe,” muleke akulondolole.] Eyo, kino kekishintululapo amba kukekalanga mavita nyeke, mhm. Ivwana uno mulao wa Leza usonekelwe mu Isaya 9:6, 7.” Tangai kino kisonekwa mu Bible nansha mu muswelo okitelelwe mu Kiteba kya Mulami. Wisambe mu kīpi amba Kiteba kya Mulami kilombola’mba Bulopwe bwa Yehova lo lukulupilo lumo kete lukatūla ndoe pano pantanda, ne kankamika mwisambi-nobe atange kino kishinte.
3 Shi tupāna “Réveillez-vous!” wa mafuku 22 kweji 10, tukokeja kunena’mba:
◼ “Lelo ulanga namani pa kino kipangujo kidi pa paje umbajinji wa uno mulami, kinena’mba: ‘Pourquoi la vie est-elle si courte?’ [Muleke akulondolole.] Uno mukanda ulombola myanda inena bantu ba sianse ne bañeni bakwabo pamwanda utala kununupa, kupwa wimanina bininge pa mulao wālailwe na Umpangi, ke būmi bwanyeke kadi. Nsenswe kukushila uno mulami, shi usaka kutanga’o.”
4 Shi tubatana bantu basenswe kwisambila pamwanda utala mutōtelo, mwene tukokeja kwimanina bininge pa kishinte kidi mu “Kiteba kya Mulami” kya kweji 11? Padi kikamukwasha bininge?
◼ “Nsaka kuyuka mulangwe odi nao pa kino kipangujo kinena’mba: Lelo kikokejika kusanswa Leza ne kumwakamwa ponka?” Muleke akulondolole, kupwa tangai myanda inenwe mu kishinte kinena’mba: “Mwanda Waka Kifwaninwe Kwakamwa Leza Tamba’nka Pano?” (Mus. 12:13) Ingidija kimfwa kimo pa byobya bidi mu dibuku Kutoa Sababu pa paje 427, penepo pāna mulami shi uwamone’mba uno muntu usangedile musapu.
5 Umbusapudi bwa ku njibo ne njibo, ketwakakongolokapo mangajini nansha tubūtike. Boba basapulanga kitatyi ne kitatyi mu mangajini banenanga’mba uno mwingilo usangaja bininge kadi ulupula bipa. Tutompe kwingidija kitwelelo kīpi pamo bwa kino, kitatyi kyotupāna “Réveillez-vous!” wa mafuku 8 kweji 10:
◼ “Tuyukile’mba bantu bepēne mu myanda ya byabusunga pamo bwa banwe basenswe bininge kuyuka myanda ipita koku ne koku. Omwanda nkulupile bu bino bishinte bikakusangaja.” Kupwa leta bushintuludi pa mulangwe udi munshi mwa mutwe wa mwanda unena’mba: “Familles monoparentales: comment réussir?”
6 Shi muntu yetutene udi mu mingilo binebine, tukokeja kumulombola milami, kupwa tukamusapwila’mba:
◼ “Namone bu dyalelo kwadipo utengele bu kudi beni basaka kwiya kukunangila, omwanda nami nkisakepo kuvudija binenwa. Nkusakila nobe utangepo uno mwanda wa mvubu.” Wisambile pa kishinte kyowadi utongele kala, kupwa mupāne milami.
7 Tusonekei pa fomu wa njibo ne njibo dijina ne njibo yashikete’mo na bunwa, ne tujoke kukapempula muntu yense waitabije mukanda. Shi tubamone’mba mwisambi-netu i musangele musapu na mutyima umo mu kujokelamo kwetu kupya, nankyo tumulombolei amba ukokeja kudinga fomu wa abonema mwanda wa kutambula ku kweji ne kweji mulami umo nansha ibidi. Twikalei beteakanye ne kwikala na kampeja-bukidi ka kupānina yetu milami kitatyi kyonso kyotumona mukenga mulumbuluke.