Twikalei Bengidija Kinenwa, Ketukikalai Bemvwaniki Bitupu
1 Mu ano etu mafuku, bakristu babine balamine umutyima musoñanya wibeta bekale bantu bengidija kinenwa, kupitako kwikala bemvwaniki bitupu. (Yak. 1:22) Mwikadilo wabo i mwishile nakampata na wa boba betelanga bu bakristu, bengidila Leza enka na milomo yabo bitupu. (Is. 29:13) Yesu walombwele patōka amba i enka boba ba kulonga kiswamutyima kya Leza, ye abo kete bakapanda.—Mat. 7:21.
2 Mutōtelo wakubulwa kulonga mingilo ya bwine-Leza keudipo na buluji nansha bumo. (Yak. 2:26) Twiipangulei nanshi: ‘Lelo mingilo yami ilombolanga amba lwitabijo lwami i lwabine? Lelo neendejanga umbūmi kukwatañana na nkulupilo yami? Lelo i muswelo’ka onkokeja kwiula pakatampe Yesu? ‘ Shi twikale kulondolola na boloke ku bino bipangujo, tukajingulula kwendelela kumeso koketudi kala balonge pamwanda utala kulonga kiswamutyima kya Leza ne byobya bikitushadile kulonga.
3 Byotudi bana-babwanga ba Yesu, kitungo kyetu kibajinji kifwaninwe kwikala kimo kyonka na kilombwelwe na Mulembi wa mitōto’mba: “Mudi Leza e mo twisweja dyuba dyonso ne bukata; kadi tukafwijangako ku dijina dyobe nyeke.” (Mit. 44:8) Mu bintu byonso byotulonga, bwine-kristu i mwikadilo ufwaninwe kumweka difuku ne difuku umbūmi bwetu. Tukamwenangamo nsangaji mikatampe na kulombola mu kipindi ne kipindi kya mingilo yetu, kilokoloko kyetu kyabine kya kusaka kutendela Yehova.—Fid. 1:11.
4 Kutendela Yehova Kekufudilepo Enka pa Kwikala na Būmi Boloke : Shi kyādi’mba Leza ulombanga twikale enka na mwiendelejo muyampe kete, twadi ba kulonga bukomo bwa kwilemununa. Ino mutōtelo wetu wimanine ne pa kusapula bulumbuluke bwa Yehova ne kupāna musapu ku bantu bonso utala pa dijina dyandi.—Bah. 13:15; 1 Petelo 2:9.
5 Mwingilo mukatampe wa kuvuija otudi nao, i busapudi bwa myanda miyampe ku bantu bonso. Yesu wepēne nakampata ku uno mwingilo, mwanda wādi uyukile’mba ukaletanga būmi bwanyeke ku boba bakeumvwana. (Yoa. 17:3) Dyalelo nadyo, ‘kufundija kinenwa’ ke kintupo kya mvubu mityetye; ye kintu kimo kete kikaletela bantu lupandilo. (Bil. 6:4 ; Lom. 10:13) Pa kuyuka byabuyabuya bitulongolwedilwe, kino ikitukwashe tujingulule mwanda waka Polo witupānga uno musoñanya wa’mba ‘sapulai kinenwa’ ne ‘kwikilonga na bupyasakene.’—2 Tim. 4:2.
6 Kutendela Yehova kufwaninwe kutūlwa pa kifuko’ka umbūmi bwetu ? Mulembi wa mitōto wānene amba kyo kyādi utele mutyima bininge umbula mwa dyuba dyonso. Mwene uno o ufwaninwe kwikala mwiivwanino wa umutyima wetu ? Bine i amo. Tukamona kipwano kyetu na bakwabo pamo na mikenga ya kwisambila pa dijina dya Yehova. Tusakanga misambo yetu ikale kwimanina nakampata pa myanda ya kumushipiditu. Kadi tufwaninwe kulonga bukomo bwa kutambila kitatyi ne kitatyi mu mwingilo wa busapudi pamo na kipwilo. Ku boba badi na muswelo, bakokeja kushilula mwingilo wa bu pania, upānanga muswelo wakutula busapudi pa kifuko kilēme difuku ne difuku umbūmi bwetu. Kinenwa kya Leza kitupānanga kikulupiji kyaba’mba boba balonga kiswamutyima kya Leza kitatyi ne kitatyi badi na nsangaji.—Yak. 1:25.