Tumwenei Mu Masomo A Mwingilo Wa Teokratike Mu Mwaka Wa 1996—Kipindi 1
1 Lelo kodi mutange bulombodi butanwa mu “Mpangiko ya Masomo a Mwingilo wa Teokratike mu 1996”? Lelo wimutanemo kwishila kutyetye? Kushilwila kweji umbajinji kufika ku wabuná, mwisambo 3 ukemaninanga pa dibuku Kutoa Sababu, ne tamba mu kweji wabutano kutula ku wadikumi na tubidi, ukemanina pa dibuku dipya Buyuki. Mwisambo 4 ukesambilanga pa mitwe mikatampe ya bantu beshileshile batelelwe mu Bible, ku yenga ne yenga.
2 Misambo ya Bana-bamasomo : Mwisambo 3 ukapebwa kaka. Shi i mwimanine pa dibuku Kutoa Sababu, kifuko kifwaninwe kukwatañana na busapudi bwa ku njibo ne njibo nansha bwa kiponka na ponka. Shi myanda isambilwapo imilupulwe mu dibuku Buyuki, mwisambo ukapānwa pamo na kujokelamo kupya nansha na kifundwa kya Bible. Kino kikekalanga na mvubu mikatampe, pamwanda dibuku Buyuki dikengidijibwanga bininge mwanda wa kwendeja bifundwa bya Bible ku njibo.
3 Shi kifuko kitongelwe i kifundwa kya Bible, bakaka babidi’ba bakokeja kushikata. Pa kupwa kwa kwisamba bityetye mu binenwa bya ñanjilo, shilula nakampeja bukidi myanda imaninepo kishinte, kupwa ipangula bipangujo bisonekelwe mu dibuku. Mwisambi nobe ufwaninwe kupityija kipindi kyandi mu muswelo mupityilanga myanda. Mavese atelelwe afwaninwe kutangwa mu Bible shi kudi kitatyi. Kaka ukapityija kino kishinte ufwaninwe kwikala na bwino bwa kufundijija ne kwisambija mwisambi nandi kupityila ku bipangujo ne kulanguluka nandi pa mavese akengidijibwa.
4 Lelo tukalonga kika shi mu kipindi kitupelwe mudi mavese mavule oketukokeja kubandaula onso mu minite itano? Tonga mavese esambila pa myanda mikatampe. Shi kemudipo mavese mavule, nankyo ubwanya kwisambila bininge pa myanda mikatampe ne kwiishintulula senene. Kitatyi ne kitatyi, ukokeja kutanga musāngo umo nansha mulongo umo mu dibuku ne kwisambilapo na mwisambi nobe.
5 Shi mu kipindi kikupelwe mudi ne musāngo wamfulo wa shapita, mu dibuku Buyuki, ukokeja kubandaula mukīpi kapango kadi na mutwe wa mwanda unena’mba “Tompa Buyuki Bobe” katanwa kumfulo kwa shapita. Tupango tudi pabukata bwa misāngo ikupelwe, nato tufwaninwe kubandaulwa shi kudi kitatyi. Shi kapango kadi pabukata bwa bipindi bibidi bikesambilwa’po na bakaka babidi beshile, yewa ukapityija kipindi kibajinji ukokeja kukanenenapo. Bifwatulo bidi mu dibuku bikokeja kushintululwa kitatyi kyonso kyofika pa mulangwe mukwatañane nabyo.
6 Mwisambo 4 ukapānwa mu muswelo usangaja ne mwendelemo. Ku yenga ne yenga tukesambila pa muntu kampanda utelelwe mu Bible. Bandaula nakatentekeji kitufundija dibuku Auxiliaire pa uno muntu. Shintulula mwisambo kukwatañana na kishinte, ne tonga bisonekwa bya mu Bible bikakwasha bemvwaniki bakakokele milangwe pa uno muntu utelelwe mu Bible ne pa bumuntu bwandi, kutentekelapo ne ngikadilo miyampe nansha imbi yotufwaninwe kwiula nansha kwepuka. Tukokeja kutela mavese akubulwa kukwatañana na uno muntu shi alombolanga patōkelela muswelo umwene Yehova ngikadilo imo-imo miyampe nansha imbi, nansha shi imakwatañane na mutwe wa mwanda wa mwisambo.
7 Shi tumwene nakampata mu bufundiji botutambulanga ku Masomo a Mwingilo wa Teokratike, mu uno muswelo, tukekala bafwaninwe mwanda wa ‘kusapula kinenwa’ nakulonga mungya bukomo bwetu ne na ‘bwino bwa kufundija.’—2 Tem. 4:2.