Tutendelei Yehova ‘Umbula Bwa Difuku Dyonso’
1 Tutana mulao wālailwe Yehova na mulopwe Davida mu Mitōto 145:2, amba: “[Umbula bwa difuku dyonso] nkakutōtanga; kadi nkatendelanga dijina dyobe nyeke na nyeke.” Netu tudi na buluji bwa kutendela ne kutumbija Tata wetu wamūlu. Ino, lelo tukokeja kwiula Davida ne kutumbija bubikadi bwa Yehova budi peulu pa byonso ‘umbula bwa difuku dyonso’ muswelo’ka?
2 Tuyujei Mityima Yetu na Kufwijako Yehova: Kwifunda Kinenwa kya Leza kitatyi ne kitatyi kuningijanga mutyima wetu wa kufwijako Yehova pamwanda wa bintu byāetulongele, byaetulongelanga panopano ne byaketulongela mu mafuku akāya kumeso. Kitatyi kyotwenda tujingulula bityetye bilongwa bya kutendelwa bitulongelanga Yehova, mutyima wetu nao utonda kufwijako kukatampe ne tusapula buyampe bwandi. (Mit. 145:7) Kino kiketusombela ku kutendela Yehova kitatyi kyonso.
3 Tutendelei Yehova mu Mīsambo Yetu ya Difuku ne Difuku: Kitatyi kyotwisamba na bekalwa netu, na balunda netu, na bengidi netu, ne na bantu bakwabo botwitananga nabo difuku ne difuku, tukokeja kukwatakanya kitatyi kyonso kyotumona mikenga mwanda wa kwibalombola lukulupilo lwetu. Padi mwikalwa netu umo ukokeja kwitusapwila malangatyima adi nao pamwanda utala buñonaona budi mu wetu mukenza; padi kadi mulunda netu uzumbijazumbija mutyima pamwanda utala mfwanka, dyamba ne bitomibwa bikwabo bileta lunjingwe nansha ke pa busekese; pakwabo mwingidi netu ukokeja kuleta mulangwe kampanda utala pa myanda ya kipolitike. Pa kino, tufwaninwe kukokela milangwe yabo pa misoñanya ne milao idi mu Kinenwa kya Leza ne kwibalombola mumweno muyampe obafwaninwe kwikala nao tamba pano, kadi ne malondololo alombola muswelo ukapwa makambakano abo. Binenwa bya uno muswelo shi i bisambwe ‘mu kitatyi kyabyo’ bikokeja kwikala madyese makatampe kobadi.—Nk. 15:23.
4 Tunenei Myanda Itala Padi Yehova Kitatyi Kyonso: Yewa udi na mutyima wa kufwijako Yehova pakatampe wabilanga kusapula myanda miyampe ku bantu bavule bene. (Mit. 40:8-10) Twīpangulei pa kino’mba: ‘Lelo noñanga bukomo bwami bonso kukwatañana na ngikadilo yondi’mo?’ Bavule i bajingulule’mba shi bekale kwalamuna bityetye kwingidija kwa kitatyi kyabo, bakokeja kwikala bapania ba kitatyi kyonso. Shi ngikadilo yotudi’mo dyalelo keitupepo muswelo wa kwikala bapania ba kitatyi kyonso, lelo twabulwapo kwikala nansha bapania bakwashi? Kitatyi kya Kivulukilo i kitatyi kilumbuluke bininge kitupa muswelo wa kubweja’ko mwingilo wetu. Kweji wabusatu ne wabuná i myeji milumbuluke kotudi yotufwaninwe kwipāna bininge mu mwingilo na kwikala bapania bakwashi.
5 Tukwashei Bapya Belunge Kotudi mu Mwingilo Wetu wa Kutendela Yehova: Kupityijibwa kwa Kivulukilo kya lufu lwa Yesu, kilongibwanga ku mwaka ne mwaka, kwituvulujanga buluji botufwaninwe kufwijijako Yehova ne kutumbija dijina Dyandi. I kitatyi kya pabula kifikile’po byabinebine mwanda wa kukankamika bantu befundanga Bible belunge kotudi mwanda wa kusapula ku bantu bonso bulopwe bwa Yehova. Twibakankamikei bekale kulanguluka mu milombelo yabo pa myanda idi mu dibuku Buyuki Butwala ku Būmi Bwanyeke, pa paje 173-175, musāngo 7-9. Shi i babwanye bisakibwa, nankyo kepadipo buluji bobafwaninwe kwelaijija, na kusumbika’mba kebaikele na bwino. Basapudi babwino babwanya kwibalombola muswelo wa kusapula Bulopwe. Wivwane bapya badi na bupyasakane bwa kusapula myanda miyampe, i bine bafwaninwe kukulupila’mba Yehova ukebakwashako.—Bil. 4:31; 1 Tes. 2:2.
6 Shi tulonge buninge bwa kutendela Yehova umbula bwa difuku dyonso dituntulu, bine kukalupukanga byabuyabuya byanyeke ne nyeke kadi bya kamweno kotudi ne kudi bakwetu.