Yehova I wa Kutendelwa Pakatampe Pene
Bidibwa bya ku Kyolwa bya Mfumwetu Bikavulukwa mu Mafuku 16 Kweji 4
1 Pano potwenda tulumba ku mafuku 16 Kweji 4, 2003 po pene kipyupyu kyenda kilundila’ko. Mu kine kyolwa kya bufuku’ki, tukavuluka lufu lwa Yesu, kadi tukatumbija dijina dya Yehova pamo na midiyo ne midiyo ya batōtyi netu kujokoloka ntanda yonso. Yehova ufwaninwe kutendelwa mitendelo yetu yonso pangala pa kikūlwa, kyabuntu kikatampe mpata kyaetupele. I kupityila ku kino kikūlwa kwakapungulwila bantu ba kikōkeji madyese a ntanda ne miseke. O mwanda twilunga na mutyima umo pamo na mulembi wa mitōto mu kwela kabobo amba: “Yehova i mukatakata wa kutendelwa pakatampe pene.”—Mit. 145:3.
2 Kino kyo kitatyi kya kulanguluka pa buyampe bwa Yehova Leza ne pa mushike wa kufwija kotumufwija’ko pangala pa kutuma kwaātumine “Mwana wandi wa bunka panopantanda amba tumwene būmi ponka padi aye.” (1 Yoa. 4:9, 10) Kuvuluka na kikōkeji Bidibwa bya ku Kyolwa bya Mfumwetu kwituteñanga ku mityima yetu twayuka amba “Yehova i wa buntu, muyūle lusalusa; . . . kadi i wa kanye kakatampe.” (Mit. 145:8) Bine, kikūlwa kyo kintu kikatampe kutabuka kilombola buswe bwa Yehova bwaswele bantu bonsololo. (Yoa. 3:16) Ponso potulanguluka pa buswe bwa Leza ne kubandaula būmi bwa Yesu bwa kulama bululame na kikōkeji, mutyima witukunkanga ketutendela Yehova. Bine tukamutendela nyeke ne nyekeke pa buswe bwandi bwakubulwa mfulo bwalombwele na kwitupa kyepelo kya būmi bwa nyeke.—Mit. 145:1, 2.
3 Tukwashei Bakwetu Nabo Batendele Yehova: Mutyima wa kufwija’ko Leza pa kyabuntu kipityile byonso kya kikūlwa kyaetupele witutononanga twite bakwetu nabo bāye batendele netu Yehova. Mulembi wa mitōto wāpelwe bukomo bwa mushipiditu wālemba’mba: “Bakēsambanga kivulukilo kya būmuntu bobe bukatampe, kadi ne kwimbila boloke bobe.” (Mit. 145:7) Mwaka wapwile’u bunka bwao, Batumoni ba Yehova pano pa ntanda ponso bapityije nsaa mudiyala ne bya pangala mu mwingilo wa busapudi. Bukomo bobalongele bwalupwile bika? Yenga ne yenga, kwadi kintu kya bantu 5 100 ne musubu badi babatyijibwa mwanda wa kulombola kwipāna kwabo kudi Yehova. Kadi ku Kivulukilo kwatenwe bantu 15 597 746, mu bano mudi ne bantu midiyo 9 ne kupita kebashilwile kutendela Yehova bu basapudi ba myanda miyampe. Bine tutengele kadi kwilundila’ko kukatampe kumeso’ku! Byotudi basapudi ba Bulopwe, tukwete makasa abidi madyese otupelwe a kusapula myanda miyampe ne kwalamuna mityima ya bakwetu itale kudi Yehova, kudi wandi Mwana, ne ku Bulopwe.
4 Muswelo mulumbuluke wa kukankamika bakwetu nabo batendele Yehova i kwibeta bāye bavuluke netu pamo Bidibwa bya ku Kyolwa bya Mfumwetu. Lelo kodi kala mulembe mulongo wa majina a boba bosaka kwita ne boba basakilwa padi kuvulujibwa difuku ne nsaa? Le kodi mupe bonso bolembele majina tukanda twa lwito? Shi kwebapele’to, nankyo wikwate’ko na kwibapa’to mu kino kitatyi kyashala’ko. Wibakwashe nabo bayuke kitungo kivulukilwa dino difuku. Ta mutyima ku kwimuna betwa ku kivulukilo. Wibatundaile na kizaji, wibayukanye ku banabetu bakwabo, kadi wibafwije’ko pangala pa kwiya kobaiya.
5 Kutanwa ku Kivulukilo kukokeja kupa bapya mutyima wa kusaka kwendelela ku mushipiditu. Mwifundi umo wa Bible udi na misongo ya kuvutakanibwa mutyima, imukoleja kutambila pa bantu bavule, waile ku Kivulukilo. Pa kupwa bamwipangula mwalangila pa kuno kupwila, nandi wanena’mba: “Buno bo bufuku bujila kupita bonso, nami natanwa’ko.” Tamba papo, washilwididila kutanwa ku kupwila.
6 Kupwa kwa Kivulukilo: I bika byotukokeja kulonga mwa kukwashisha bano bantu basangela musapu nabo bekale batendedi ba Yehova? Bakulumpe bakata mutyima ku bapya batanwa ku Kivulukilo, kupwa bakakwata mpangiko ya basapudi ba bwino bakebapempule kinondanonda na pobapwa kwisambila nabo pa bintu biyampe byobafundile’ko ne byobamwene’ko. Padi bamo bakasaka kwifunda nabo Bible. Kadi bafwaninwe kwitwa kwiya kutanwa ku kupwila konso kwa pa kipwilo kwa ku yenga ne yenga, mwanda kutanwa’ko kitatyi ne kitatyi ko kukavudija buyuki bwabo bwa Bible.
7 Pano i kukwatwe mpangiko ya kukankamika banabetu bonso basapula na dimodimo ne boba kebakisapulanga nabo bashilule kutanwa ku kupwila kitatyi ne kitatyi. Shi bakulumpe abakunena kukwasha mwanetu kampanda kakisapulanga amba nandi ashilule monka kutambila mu mwingilo wa budimi, kokekaka kwitabija. Kuta mutyima na buswe namino ku banabetu kukwatañene na musoñanya wāsoñenye mutumibwa Polo amba: “Monka mo twakamwena mwakulongela, tulonge biyampe ku bakwetu bonso, ino ku boba badi mu kipango kya kwitabija bo bene.”—Ngat. 6:10.
8 Batwe bonso tulongei bukomo bwa kutanwa ku Kivulukilo mu mafuku 16 Kweji 4. Ketufwaninwepo kubulwa uno mukenga ujila wa kutendela Yehova. Bine, pano ne mafuku onso nyeke ne nyeke, tutendelei Yehova pangala pa mingilo yandi mikatampe!—Mit. 145:21.