Tumwenei Mu Masomo A Mwingilo Wa Teokratike Mu Mwaka Wa 1996​—⁠Kipindi 3

¹ Mutumibwa Polo wādi usaka bana babo balombele pamwanda wandi ekale kutambula bukomo bwa kusapula myanda miyampe pakubulwa moyo. (Ef. 6:​18-20) Nsangaji yetu i ya kutambula bukomo bwa uno muswelo. Omwanda tuloelelwanga bukwashi botutambulanga ku Masomo a Mwingilo wa Teokratike. Tukankamika boba babwenye bisakibwa, batanwanga ku kupwila, belembeje ku ano masomo.

² Bana-bamasomo batambulanga madingi atala muntu kasuku kandi ebakwashanga ku kwilemununa mu busendwe bwa kwisamba ne kufundija. (Nk. 9:⁠9) Tukokeja kadi kumwena mu ano masomo na kuteleka madingi apebwanga bana-bamasomo bakwabo, ne na kwingidija batwe bene myanda yotwifundanga. Kitatyi kyotuteakanya mwisambo, tufwaninwe kwifunda na katentekeji myanda idi mu kipindi kyotupelwe, mwanda wa kwikulupija na bubine’mba myanda yotunena i myendele’mo. Myanda mikatampe idi’mo ne mavese otukengidija bifwaninwe kukwatañana na bushintuludi bwa mutwe wa mwanda otukesambila’po. Shi kudi muntu mukwabo otusaka kukapityija nandi uno mwisambo, nankyo i kiyampe kupituluka’mo nandi pamo kumeso kwa kukanena’o ku masomo. Kitatyi kyotwendelela kumeso, tufwaninwe kulonga bukomo bwa kwībidija kunena mīsambo ya kiponka na ponka, ne kwingidija papye otusonekele’po mwisambo kupitako kutala mu dibuku mulupwilwe myanda imanine’po mwisambo.

³ Muntu yense udi na kipindi ku masomo ufwaninwe kufika kumeso kwa kitatyi, mwanda wa kuleta wandi fishi wa Madingi a Buneni kudi mutadi wimanine masomo ne kushikata ku mulongo wa kumeso mu njibo ya Bulopwe. Bakaka bafwaninwe kubadikila kulombola mutadi wimanine masomo kifuko ne shi batongele kupityija mwisambo wabo bemene bwimwa nansha bashikete. Shi twingile umbumo mu ino myanda mishileshile, tukakwasha bininge mwanda wa ino mpangiko ikekale kupita senene, kadi tukakwasha boba bemanine mingilo ya kuteakanya lukala nabo bekale kwilongolola kumeso kwa kitatyi.

⁴ Kuteakanya kwa Mwisambo wa No. 2: Kimo kya mu bitungo bifwaninwe kufikila’po mu butangi bwa Bible i kukwasha mwana-wamasomo aleulule mutangilo wandi. Lelo tukokeja kufikila’po namani? Muswelo utabukile buya i wa kutanga kipindi’kya misunsa mivule na diwi dikande. Mwana-wamasomo ufwaninwe kukakimba bishima bimukomene mu dibuku dishintulula bishima dilombola muswelo ufwaninwe kutangwa’byo ne mwa kutontela ludimi, kimfwa mu Le Petit Robert, mwanda wa kuyuka nshintulwilo yabyo ne muswelo ufwaninwe kutangwa’byo. Ufwaninwe kupotolola tuyukeno twa mwa kutontela ludimi twingidijibwe mu dine dibuku dishintulula bishima’dya.

⁵ Majina mavule a kikasuku adi mu Bible Traduction du monde nouveau atentwilwe tamba mu ludimi lwa Kihebelu, kadi i malembwe mu muswelo ufwenene bininge ku mwityilo wao udi mu bisonekwa bibajinji. Omwanda akisá wa katēbo udi pa mawi abadikila tumāma twamfulo, kimfwa ân, în nansha ôn ulombola’mba kamāma n kadi kumfulo kwa dijina kafwaninwe kutelwa pako bwapala (kimfwa “Salmôn” ukatelwa’mba Salmone). Diwi e (dyakubulwa akisá), shi ditanwa mu silabe wa ku ñanjilo nansha wa umbukata mwa dijina, ditelwanga pavule’nka bu e pamo bwa mu kishima “petit” nansha “parvenir.” Mo mukatangilwa majina amo-amo, kimfwa Nehémia, Tsephania ne Seroug. Kamāma s, kadi mu majina matentulwe tamba mu Kihebelu pakubulwa kwalamunwa’o (kimfwa “Yosek, Qosam”), kakatelwa kakomo pamo’nka bwa mu kishima “soleil”. Nabubine, majina mavule otuyukile senene omukamona mashale na mutelelo wa mu ludimi lwa Falanse tukeatela’nka na motwiatelelanga nyeke, kealamukilepo nansha patyetye (kimfwa “Isaac, Jérusalem”).

⁶ Bambutwile bafwaninwe kukwasha babo bana bankasampe pa kuteakanya butangi bwa uno muswelo. Bafwaninwe kwibateleka kitatyi kyobeteakanya ne kwibapa madingi akokeja kwibakwasha belemunune. Kitatyi kitungilwe i kibwane kyokokeja kunena bishima bya ntwelelo mīpi ne mfudijo mifwaninwe ikapituluka’mo mwana-wamasomo myanda mikatampe idi mu kyandi kipindi. Shi alonge namino, ukatamija bwino bwandi bwa kunena mwisambo wa kupebwa ponka na ponka pakubulwa kwilongolola.

⁷ Mulembi wa Mitōto wālombele kudi Yehova ino milombelo’mba: “A Mfumwami, mumunune milomo yami, kadi kyakanwa kyami kikalombolanga lutendelo lobe.” (Mit. 51:15) Shi ke pano, kwikala na kipindi ku Masomo a Mwingilo wa Teokratike kufwaninwe kwitukwasha netu tulombole mutyima wa kwabila wa muswelo umo na uno!