Malondololo Ku Bipangujo Byenu

◼ Pano byoketudi na dibuku Buyuki Butwala ku Būmi Bwanyeke, lelo i umbula bwa bitatyi binga bifwaninwe kwendejibwa kifundwa kya Bible kya ku njibo?

Mwingilo Wetu wa Bulopwe wa kweji 9, 1993 wādi usoñanya kwendeleja kifundwa kya Bible kya ku njibo na muntu umpya kufika’nka ne kitatyi kyakapwa bitabo bibidi. Pano poketudi na dibuku Buyuki, kifwaninwe kwalamuna uno muswelo otwadi twikilonga, kukwatañana na binena Kiteba kya Mulami kya 1 kweji 2, 1996 pa paje 7 ne 8.

Dibuku Buyuki i dilupulwe mwanda wa kukwasha boba “badi mu ngikadilo ifwaninwe mwanda wa kutambula būmi bwanyeke” befunde byobya bibasakilwa mwanda wa kwipāna kudi Yehova ne kubatyijibwa. (Bil. 13:48) Shi kepano, pakupwa kupwija’tu dino dibuku dipya, kekikalombepo kwifunda dibuku dikwabo dyabubidi. Kitatyi kyobenda batama mu buyuki, tukokeja kwibakankamika bakumbanye buyuki bwabo na kutanwa ku kupwila kwa ba Tumoni twa Yehova ne na kutanga Bible ne mabuku meshileshile a bwine-kristu.

Kadi tufwaninwe kwiibidija senene na bipangujo bidi pa paje 175 ku wa 218 mu dibuku Tumefanywa Tengenezo Tutimize Huduma Yetu. Nansha byoketukanyemenapo ku bino bipangujo nansha kwibibandaula na muntu yetwifunda nandi, ino i kiyampe kwimanina bininge pa ino myanda mikatampe ya mu dibuku Buyuki mwanda ikamupa muswelo wa kulombola buyuki bwandi butala pa bubinebine bwa pa kitako bwa mu Bible kitatyi kikabandaula nandi bakulumpe bipangujo bitala pa lubatyijo.

Kekidipo na mvubu kubweja ku myanda ya dibuku Buyuki na myanda kampanda ya mu mikanda mikwabo nansha na nshintulwilo ya ntentekelo mwanda wa kuningija bufundiji bwa mu Bible nansha kuponeja bufundiji bwa bubela. Kikalepeja kifundwa bitupu. Kifwaninwe kwifunda dibuku dyonso pakubulwa kwija, nansha umbula bwa mweji 6. O mwanda tufwaninwe kwifunda dibajinji myanda idi’mo na mushike, tukedipāne na bwino senene ne na binenwa bīpi byūbaka. Mwifundi nandi ufwaninwe kukankamikwa mwanda wa ekale kuteakanya kifundwa, kutanga mavese atelelwe ne kulonga bukomo bwakukwata bufundiji bupāna shapita ne shapita.

Kiteba kya Mulami kyesambile pakatampe pa buluji bufwaninwe ba Tumoni twa Yehova kwendeja bifundwa bivule umbula bwa kitatyi kityetye. (Tala Isaya 60:22.) Na kwingidija senene dino dibuku Buyuki, tukokeja kukwasha bapya mwanda wa batane buyuki butwala ku būmi bwanyeke ne kwiendeja monka mwendele buno buyuki.​—⁠Yoano 17:⁠3.