Malondololo Ku Bipangujo Byenu

◼ Lelo tufwaninwe kwifunda na muntu dibuku Buyuki umbula bwa mafuku anga?

Yehova i mwesele bantu bandi mu ano mafuku. Bubinga botudi nabo pa kino i kibalwa kivule kya bapya batonga kulamata ku mutamba wa bubinebine mwaka ne mwaka. Myanda yotumona ilombola’mba dibuku Buyuki i kingidilwa kifike’po mwanda wa kufundija bubinebine. Kiteba kya Mulami kya 1 kweji 2, 1996 kyakokele milangwe yetu pa dino dibuku amba i dilupwilwe kukwasha yewa otwifunda nandi Bible ekale kwendelela bukidi-bukidi kumeso; mu myeji mityetye afikile pa kubatyijibwa.

Omwanda ino nimero ya Kiteba kya Mulami yalombwele pa paje 11 amba: “Shi muntu wapwija kwifunda myanda yonso idi mu dibuku Buyuki kadi wabatyijibwa, padi kekikalombepo kwifunda nandi dibuku dyabubidi.”

Tukalonga kika shi tubapu dibuku Buyuki, ino muntu otwifunda nandi kafikile pa kubatyijibwa? Mwingilo Wetu wa Bulopwe wa kweji 7, 1996 pa paje 6, mus. 23, wetuvulwije madingi adi mu Kiteba kya Mulami a kuleka kwifunda dibuku dyabubidi na muntu mupwe kala kwifunda dibuku Buyuki. Lelo kino kishintulula’mba tufwaninwe kuleka kukwasha bantu botwifunda nabo kwendelela kumeso? Mhm. Tusaka bantu batambule buyuki bwa pa kitako bwa bubinebine. Inoko, i kyendelemo kulanga’mba, divule dine, mwendeji wa kifundwa mufwaninwe ubwanyanga kukwasha muntu obefunda nandi, mu kitatyi kityetye, wamona kwendelela kumeso kufika ne pa kutyiba mbila ya kwingidila Yehova ku kusaka kwa aye mwine. Befundi bamo-bamo balombanga kwifunda nabo nansha misunsa mivule pa yenga, mwendele ngikadilo yabo.

Tufwaninwe kujingulula’mba befundi bamo-bamo kebendelelangapo kumeso bukidi-bukidi pamo bwa bakwabo. Omwanda shi muntu wapu dibuku Buyuki, ino umbula bwa kitatyi kampanda kutupu kutyiba mbila ya kwilunga ku kipwilo, kikekala kiyampe musapudi obefunda nandi akayukije uno mwanda kudi mukulumpe umo wa mu komite wa mingilo. Kadi shi udi mu ngikadilo ilomba bukwashi bwa pabula, nabya bukaletwa kukwatañana na misoñanya idi mu Kiteba kya Mulami kya 1 kweji 2, 1996 pa paje 11, mus. 11-12.

Mwifundi shi i mukwashibwe, wayuka bubinebine, nansha shi mwaimanine nandi pa myanda mikatampe, ufwaninwe kutengwa pa mutyima ne kutanwa ku kupwila kwa bwine-kristu, mwanda wa kulombola kufwija’ko kwandi. Kino kikokeja kumutwala ku kulombola patōka’mba wabilanga kwingidila Yehova. Shi pa kupwa kwifunda nandi kitatyi kilampe dibuku Buyuki, umweka bu kakwetepo bintu bya kumushipiditu na bulēme bukatampe, i kiyampe kwimika kifundwa.