Tunangei Na Lwitabijo
1 Bantu bavule i bemike būmi bwabo pa byabupeta, na kutūla pampikwa tunangu kikulupiji kyabo mu bukomo bwa budimbidimbi bwa bupeta. (Mat. 13:22) Kikalanga kyabulanda shi lupeto lwabo lubajimina, lubaibwe, nansha polwikalanga kelukidipo na mvubu. Twi bakankamikwe kulonda dishinda dya tunangu, na kukimba na kampeja-bukidi lupeto lulēme lwa kumushipiditu. (Mat. 6:19, 20) Kino kilomba ‘tunange na lwitabijo.’—2 Kod. 5:7.
2 Kishima “lwitabijo” kitambanga ku kishima kya Kingidiki kidi na buluji bwa kukulupila, kwitabija kwabinebine. Kunanga na lwitabijo kushintulula kulwa na makambakano na kutula kikulupiji kyobe mudi Leza, na kukulupila mu bukomo bwandi bwa kuludika matabula etu ne mu kiswamutyima kyandi kya kwitupa bisakibwa byetu. Yesu wētupele kimfwa kibwaninine; wāshele utele mutyima ku byobya byadi na mvubu mikatampe. (Bah. 12:2) Ne batwe netu mo monka, tufwaninwe kuta mutyima wetu ku bintu bya kumushipiditu, ke byobya byampikwa kumweka kadi. (2 Kod. 4:18) Tuyukei nyeke, ne mutyima wa munda-munda’mba buno būmi i bwalupito ne twitabijei’mba būmi bwetu bonso budi mu makasa a Leza.
3 Tufwaninwe kadi kwitabija na kusumininwa’mba Yehova wituludikanga kupityila ku bulongolodi bwandi bumweka na meso, bwendejibwa na “umpika wabinebine ne wamanwa.” (Mat. 24:45-47, NW) Tulombolanga lwitabijo lwetu ‘potukōkelanga boba baludika’ kipwilo. (Bah. 13:17) Kulonga bintu na kwityepeja kukwatañana na mpangiko ya Kiteokratike kulombolanga lukulupilo lwetu mudi Yehova. (1 Petelo 5:6) Tufwaninwe kukwatakanya pampikwa kwikaka mwingilo upēlwe bulongolodi. Mu uno muswelo, tukekala mu kipwano kya pabwipi na banabetu, twilungile mu buswe ne umbumo.—1 Kod. 1:10.
4 Muswelo wa Kukomeja Lwitabijo Lwetu: Ketwakilekai lwitabijo lwetu lwikale lwenda lutalala. Tufwaninwe kulwa bulwi bukomo mwanda wa kwilutamija. Kwifunda kitatyi ne kitatyi, kulombela kitatyi kyonso, ne kutanwa nyeke ku kupwila, biketukwasha tukomeje lwitabijo lwetu lukabwanya, na bukwashi bwa Yehova, kwimanija mu matompo nansha a muswelo’ka. (Ef. 6:16) Lelo twitūdile’ko mpangiko milumbuluke ya butangi bwa Bible bwa difuku ne difuku ne ya kuteakanya kupwila? Le tulangulukanga divule pa byobya byotwifunda, ne kwifwenya kudi Yehova mu milombelo? Lelo twibidile kutanwa ku kupwila konso ne kulondolola’ko ponso potumona mukenga?—Bah. 10:23-25.
5 Lwitabijo lukomo lumwekanga kupityila ku mingilo miyampe. (Yak. 2:26) Muswelo umo mulumbuluke wa kulombola lwitabijo lwetu i kusapula lukulupilo lwetu ku bakwetu. Lelo tukimbanga mikenga ya kusapula myanda miyampe? Mwene bulongolodi kampanda mu ngikadilo yetu umo ne umo, bukokeja kwitupa kyaba kya kusapula bininge? Lelo tulondanga madingi otutambulanga mwanda wa kulemununa musapwilo wetu wikale mulumbuluke ne mwingilo wetu wikale ulupula bipa? Le twitungilanga umo ne umo bitungo bya kumushipiditu ne kwikankila kufikila’po?
6 Yesu wētudyumwine ku kyaka kya kukuja mutwe mu myanda ya umbūmi, ne kya kusakasaka byabupeta nansha byakamweno ka kwisakila bitupūte kafi, tujimije kumona kwetu kwa kumushipiditu. (Luka 21:34-36) Tufwaninwe kutadija muswelo otunanga, kutyina’mba twakalobela mu myanda itala lwitabijo lwetu. (Ef. 5:15; 1 Tem. 1:19) Yense umbukata mwetu ukulupile kukanena difuku dimo’mba: “Napu kulwa divita dilumbuluke, nafikija ponka pamfulo pa lubilo lwami, ndaminine ne lwitabijo.”—2 Tem. 4:7.