Kinenwa Kya Leza Kituludikanga
1 “Ino ntanda i miyule makambakano, ino bya kupwija’o byo bisakane. Bantu bavule badi mu nzala; bakwabo i bapika ba bitomibwa bileta lunjingwe, kadi bakilundila’ko. Bisaka bisansane byenda bibwejeja’ko, papo busula-malwa ne bukalabale ‘bwa mu bufyafya’ bibebweja ku myanda itelekwa difuku ne difuku. Bintu bya bulembe nabyo byenda biyudila’ko mu luvula lotwesa ne mu mema otutoma. Pampikwa kwilwa bupolapola, bukyendelela kutukija bantu betujokolokele.”
2 Bino ye bishima bishilwilwe nabyo dibuku Biblia—Neno la Mungu au la Binadamu? Ntwelelo yadyo ikidi monka na mvubu ne dyalelo, pamo’nka na moyadi ikadile nayo podyalupukile myaka isamba-ibidi kunyuma. Bantu bafwaninwe kuyuka’mba Kinenwa kya Leza kituludikanga ne kadi kitupanga muswelo wa kunekenya makambakano onso etufikila. Mu kweji 1, tukalonga bukomo bwa kwibakwasha na kwibashila Traduction du monde nouveau ne dibuku Biblia—Neno la Mungu au la Binadamu? Eyo, kushila muntu dibuku bitupu ke nsambupo ya kwitukulupija’mba uketabija buludiki bwa Leza. Tufwaninwe kujokela bantu na kitungo kya kukashilula nabo bifundwa bya Bible. Tukulupilei’mba tukakwashibwa shi tulonge buno bukomo. (Mat. 28:19, 20) Tala bitompekejo bimo-bimo byotukokeja kulondela’po:
3 Shi tubatana muntu mununu, tukokeja kutompa kino kitwelelo:
◼ “Nkwipangulepo bidi kino kipangujo: Powakidi nkasampe, lelo bantu bādi muswelo’ka umo ku mukwabo? [Muleke akulondolole.] Dyalelo ngikadila ibeshila, mwene i amo? Molangila, mwanda waka bintu bibaalamuka? [Muleke akulondolole.] I bine, kuno i kufikidila kwa bupolofeto bwa Bible kotumonanga na meso. [Tanga 2 Temote 3:1-5.] Bible kemaninepo enka pa kulombola na bubine mwikadile ntanda dyalelo; ulaijanga kadi ne ntanda milumbuluke isa kwikala’ko pano-pano ponka. Omwanda tukankamikanga bantu bonso batange’ye. Lelo uyukile’mba bwalamuni bonaingidija bwa Traduction du monde nouveau, i bwingidije muneneno wabinebine?” Kadi yuka’mba uno Bible i mwandikwe mu Falanse ya pano-pano, ipēla kwivwanija myanda isonekelwe’mo. Lombola dibuku Biblia—Neno la Mungu au la Binadamu? kadi kokela milwangwe pa shapita 10, ulombola kamo ne kamo bupolofeto botumwene bwenda bufikidila. Pāna Bible ne dibuku pamo.
4 Kitatyi kyotujoka kukatala muntu mununu otwashidile Bible ne dibuku, tukokeja kunena’mba:
◼ “Musunsa wamfulo, twamwene’mba mwikadilo wa bantu dyalelo ubabipa mu myanda mivule, kudingakanya na būmi bwa myaka mityetye ya kunyuma. Inoko, pano najoka kukulombola mulao wa Bible utala pa ntanda milumbuluke ikāya’ko. [Tanga Kusokwelwa 21:3, 4.] Kuyuka’mba Kinenwa kya Leza kinene bino, kufwaninwe kwitutonona tutale ne bikwabo byokitusapwila.” Pūtula dibuku Neno la Mungu? pa shapita 14, kadi tanga mis. 3-4. Munene mushilule kifundwa kya Bible ku bitupu.
5 Shi tusaka kushilula mīsambo na nkasampe, tukokeja kunena’mba:
◼ “Nsaka kukwipangula kino kipangujo: Banwe bankasampe, mulanga’mba tudi na bubinga bwa kukulupila’mba būmi bwa mu mafuku akāya kumeso bukekala bulumbuluke? Lelo abe ulanga’po namani? [Muleke akulondolole.] Bine, tudi na bubinga bwabinebine bwa kwikikulupila. [Tanga Mitōto 37:10, 11.] Bantu bavule badi na milangwe mishileshile kadi īpatanya pa mwanda utala Bible ne bisonekelwe’mo, omwanda i kulupulwe dino dibuku, Biblia—Neno la Mungu au la Binadamu? Tala bubinga boditukankamikila kutanga Bible. [Tanga mis. 16-17, paje 10-11.] Tamba kitatyi kyotwitabijanga na bubine’mba Bible unenanga byabine, twikalanga tutambula lukulupilo lwabine lwa būmi bukāya kumeso. Shi usaka kutanga dino dibuku, nkaloelelwa kukushila’dyo ku lupoto lutyetye.”
6 Potujoka kukatala nkasampe waitabije dibuku “Neno la Mungu?,” tukokeja kushilula na kunena namino:
◼ “Nasepelele bininge pa kukumona’mba utele mutyima ku būmi bobe bwa mu mafuku akāya kumeso. Ukivulukile, nakulombwele kisonekwa kimo mu Bible kyetulaije mulao wa būmi bwa nsangaji bukāya kumeso. Pano tala kikwabo. [Tanga Kusokwelwa 21:3, 4.] Dibuku dyonakushidile dileta bubinga bukulupija’mba Bible i Kinenwa kya Leza ke kya muntupo, mhm. Uno mwanda i wa kamweno kakatampe. Ivwana kyonanenena namino. [Tanga mis. 1-2, paje 184.] Shi uswile, nkasepelela kwifunda nobe Bible ku bitupu.” Shi nkasampe waitabija kifundwa, mwipangule shi udi na Bible. Shi kadipo nandi, muponeneje Traduction du monde nouveau.
7 Muntu udi na makambakano, kadi na wa kumukwasha mwanda wa kupwija’o, ukokeja kutengwa na bino:
◼ “Mu kino kitatyi, nalanga kubwipi kwa bantu bonso batanwanga na makambakano makomo. Bavule banyemenanga ku badingidi ba miswelo ne miswelo. Bamo banyemena ku bambuki. Molangila, i kwepi kotukokeja kutana madingi mafwaninwe byabinebine, a kamweno kotudi? [Muleke akulondolole.] Bible ulombwele mwanda wabine ufwaninwe umo ne umo kuta’ko mutyima.” Tanga Yelemia 10:23. Pūtula dibuku Biblia—Neno la Mungu au la Binadamu? pa paje 187, tanga musango 9. “Dino dibuku dikakukwasha wivwanije mukapwila makambakano etu onso kupityila ku Bulopwe bwa Leza. Mwene ukasangela kwiditanga?”
8 Shi musunsa umbajinji twesambile’mba muntu ufwaninwe kwikala na wa kumuludika, nabya mu kujokelamo kupya tukendeleja mīsambo uno muswelo:
◼ “Musunsa wamfulo, twaitabije batwe bonso’mba tusakilwa buludiki bwa Leza shi tusaka kupwija makambakano a umbūmi. Pa uno mwanda, nanga’mba ukaloelelwa binenwa byamfulo byotukokeja kutanga mu dibuku dyonakushidile. [Tanga mis. 12-13, paje 189 mu dibuku Neno la Mungu?] Nsenswe kushilula nobe kifundwa kya Bible kya ku njibo ku bitupu, kadi nsepelele kukulombola ne mokifundilwanga enka pano.”
9 Yehova uketwesela pangala pa bukomo botulonga mwanda wa kukwasha bankasampe ne banunu, bayuke mvubu ya Kinenwa kya Leza, kalombwe kabinebine umbūmi bwetu.—Mit. 119:105.