‘Buno Bo Būmi Bwanyeke’
1 Binenwa bya Yesu bitanwa mu Yoano 17:3 bifwaninwe kukwatwa na mutyika. Mungya buluji bishintulula’mba: kwifunda kuyuka Leza ne Kristu bo būmi bwanyeke! Ino lelo pa kusaka kutambula mpalo ya uno muswelo, kifwaninwe enka kuyuka Yehova ne Yesu kete? Mhm. Bene Isalela bādi bayukile Yehova bu Leza wabo, ino mwikadilo wa umbūmi bwabo wādi upatanya lukulupilo lwabo. Omwanda bābudilwe kwitabijibwa na Leza. (Hos. 4:1, 2, 6) Dyalelo nadyo, bantu bavule padi “badi ne bukankamane bwa kusaka Leza, ino kebwendelepo mu [buyuki, NW], mhm.” (Loma 10:2) Kifwaninwe bafike pa kuyuka Yehova, “Leza wabinebine kasuku,” ne kuyuka muswelo mufwaninwe wa kumwingidila. Pa kino, tukapāna dibuku Buyuki Butwala ku Būmi Bwanyeke mu kweji wadikumi-natubidi. Lelo tukekilonga muswelo’ka? Madingi amo-amo alonda’ko akekala a kamweno kotudi.
2 Mulangwe wa kwikala na būmi bwanyeke pano pantanda byoudi wakubulwa kuyukana ku bantu bavule, kino kitwelelo kikokeja kusamuna milangwe yabo:
◼ “Twipangulanga balondakani netu kino kipangujo. Shi abakwite kukekala na būmi bwanyeke mu ntanda idi pamo bwa ino, lelo uketabija luno lwito? [Koku umulombola kifwatulo kidi pa paje 4-5 mu dibuku Buyuki. Muleke akulondolole.] Tala būmi bwansangaji bukutūdilwe. Molangila, i kika kyofwaninwe kulonga mwanda wa kukebumona? [Muleke akulondolole.] Tala kitulombelwe mu Yoano 17:3. [Tanga uno vese.] Dino dibuku ke dikwashe bantu bavule mu kutambula buno buyuki bwa pabula. Lelo mwene nobe usenswe kwikala nadyo? [Muleke akulondolole.] Ponsaka kwiya ku kupempula musunsa mukwabo, nkāya kukulombola mwanda waka i kyendelemo kwitabija’mba tukokeja kwikala na būmi bwanyeke pano pantanda.”
3 Shi twendela kukamona boba botwesambīle nabo pa Yoano 17:3, tukokeja kushilula namino’mba:
◼ “Musunsa wamfulo, nakutangile binenwa bya Yesu bya kutendelwa bitanwa mu Yoano 17:3, byaetukulupije nabyo amba kwifunda kwibayuka, aye ne Shandi, bo būmi bwanyeke. Ino bantu bavule bakulupile’mba i enka mūlu kete mo motutengele kukekala na būmi bulumbuluke. Le abe nobe ulanga’po namani? [Muleke akulondolole.] Shi udi na dibuku dyonakushidile, nsepelele kukulombola mavese amo-amo a mu Bible aleta bubinga’mba Paladisa ikajokejibwa monka pano pantanda. [Mwisambilei pa misāngo 11-16 idi pa paje 9-10 mu dibuku Buyuki.] Musunsa mukwabo, nkāya kukulombola mwanda waka tukokeja kwikala na kikulupiji mu ino milao ya mu Bible. Inoko pano, shala utange shapita 2 mu dibuku dyobe, mwene i amo?”
4 Tala muswelo muyampe wa kushilula nao busapudi, shi tubatana muntu mwitabije:
◼ “Twisambilanga na balondakani netu pa buluji bwikadile’ko bipwilo bivule pano pantanda kadi bishileshile. Enka mu Amerika kete, mudi bipwilo kubwipi kwa 1 200, shi tukumankanye matanda onso, bidi buvule bwa 10 000 ne kupita. Inoko kudi enka Bible umo kete. I muswelo’ka okokeja kushintulula kuno kuvula kwa bipwilo? [Muleke akulondolole. Pūtula dibuku Buyuki pa shapita 5 ne tanga musāngo 1.] Usa kutana malondololo malumbuluke ku bino bipangujo shi utange uno shapita. Nsangela kukushila dino dibuku shi usaka twiye tubandaule uno shapita.” Shi mwisambi nobe waitabija, mwitungilei nandi kilaeno kipotoloke ne fudija’mba: “Ponsaka kwiya dikwabo, tukāya kumona shi bipwilo byonso i mashinda bitupu meshileshile atwala ku kifuko kimo.”
5 Potujoka kwendelela na mīsambo itala pa buluji bwikadile’ko bipwilo bivule, tukokeja kunena’mba:
◼ “Potwemwene musunsa wamfulo, nalupwile kipangujo kya kusaka kuyuka shi bipwilo byonso i mashinda’tu pala pala atwala ku kitungo kimo. Wipalanga namani? [Muleke akulondolole.] Nsenswe kukulombola kyānene Yesu pa uno mwanda mu dibuku dyonakushidile. [Pūtulai dibuku Buyuki pa shapita 5 kadi tangai misāngo 6-7, popa palembelwe myanda idi mu Mateo 7:21-23.] Padi ukokeja kwiipangula mwanda waka i kyamvubu kuyuka senene kiswamutyima kya Leza. Ukamona’mba misāngo ilonda’ko idi na bufundiji bukatampe. Shala utange kipindi kyashala ku uno shapita; ponsaka kwiya dikwabo kukupempula, nkasangela kukulombola mvubu mine ya buyuki bwabinebine bwa Bible.”
6 Divule kitwelelo kya kusabidila’tu mwanda kikalanga kilumbuluke pa kushilula bifundwa bya Bible. Ntwelelo ya mu mīsambo ilonda’ko i milupulwe pa paje 10 mu dibuku “Kutoa Sababu”:
◼ “Naiya kukupempula, mwanda twifunde nobe Bible kuno ku yobe njibo ku bitupu, pakubulwa kufuta. Shi bibwanika, nkokeja kukulombola umbula bwa minite mityetye, muswelo wifundanga bantu Bible ku mobo abo mu kisaka, kubwipi kwa mu matanda 200. Tukokeja kwingidija mutwe wa mwanda o-onso mu ino idi pano bu kishinte kya kwisambila’po. [Mulombole kifunka mu dibuku Buyuki.] I kishinte’ka kikusangaja nakampata?” Leka muntu mwine atonge. Pūtula shapita wamusangaja ne kushilula kifundwa tamba ku musāngo umbajinji.
7 Tala musapwilo mukwabo wa kusabidila’tu mwanda, otukokeja kupima kushilula nao bifundwa:
◼ “Mfundijanga bantu Bible ku bitupu, kadi nakidi na kyaba kya kwifundila’ko na bantu bakwabo. Ñingidijanga dino dibuku. [Koku umulombola dibuku Buyuki.] Kwifunda’dyo kulomba myeji mityetye kete, kadi kuletanga malondololo ku bipangujo, kimfwa amba: Mwanda’ka Leza ulekele masusu? Mwanda’ka tununupanga ne kufwa? I kika kifikilanga bakena betu bafwa? Nansha ku kino, amba: Muswelo okokeja kwīfwenya kudi Leza.” Penepa mwipangule’mba: “Lelo nkokeja kukulombola muswelo odifundwanga?” Shi muntu’wa kasepelelepo kifundwa, mwipangule shi usenswe kwikala na dibuku Buyuki mwanda wa kushala kutanga’dyo aye mwine. Shi waitabija bu ukeditanga, muponeneje’dyo ne kumulombola lupoto lwadyo lwa pano-pano.
8 Bine, i kintu kyabulēme kwikala na buyuki bwabinebine bwa padi Leza ne padi Kristu! Kwifunda kwibayuka bo būmi bwinebwine bwanyeke mu ngikadilo mibwaninine. Umbula bwa kweji wadikumi-natubidi, tukimbei mikenga ya kupāna ku bakwetu buyuki butwala ku buno būmi.