‘Twikalei Ba Mityima Ya Kufwijako’
1 Pa bwanuke, bavule umbukata mwetu twāfundijibwe kunena “nkikupuñenye bidi,” ne “wafwako,” ku muntu witulongele kintu kampanda kilombola buswe nansha kanye. Polo witusoñanya ‘kwikala nyeke ba mityima ya kufwijako,’ nakampata, tufwaninwe kwikala na kibidiji kya kufwijako Yehova. (Kol. 3:15, 16) Ino i muswelo’ka otukokeja kulombola kufwijako kwetu kudi Umpangi wetu Mukatakata? I buluji’ka bwa pabula botufwaninwe kumufwijijako?
2 Mutumibwa Polo wāsonekele’mba: “Afwijibweko Leza wakwitupa bushindañani bwa padi Mfumwetu Yesu Kidishitu.” (1 Kod. 15:57) Mwaka ne mwaka, kitatyi kya Kivulukilo, tuvulukanga buswe bwaendaenda bwētulombwele Leza ne Kristu, pa kutūla’ko kinkūlwa kitushitwidile dishinda dya kukekala na būmi bwanyeke. (Yoano 3:16) Tudi kadi na mityima ya kufwijako bikatampe pamwanda wa lusangukilo lulailwe na Yesu, mwanda bavule umbukata mwetu ke bafwilwe muntu obasenswe. Mityima yetu iyulanga bā, yonka milangwe ya kufwijako, kitatyi kyotulangulukanga pa kyepelo kyotupelwe kya kukapanda kumfulo kwa ino ngikadilo, pampikwa kumona lufu. (Yoano 11:25, 26) Bine, twi babulwe’nka ne bishima bya kufwija nabyo pangala pa madyese malumbuluke otukatambula kudi Yehova mu Paladisa yotutengele. (Kus. 21:4) Mwene buno bo buluji bukokeja kwitutakika ‘twikale ba mityima ya kufwijako’ kudi Leza?
3 Muswelo wa Kulombola Kufwijako Kwetu Kudi Leza: I kyendelemo bininge kufwijako Yehova mu milombelo pamwanda wa buyampe bwandi. (Mit. 136:1-3) Mityima yetu itutononanga tumulombole kufwijako kwetu mu miswelo mikwabo nayo. Kadi twikalanga na nsangaji ‘potulēmekanga Yehova na bintu byetu byabulēme,’ mwanda wa kukwatakanya kipwilo kyetu ne mwingilo wingilwa pano pantanda ponso na bintu byetu bya kungitu. (Nk. 3:9) Tukwete bakulumpe na makasa abidi, kadi twingidilanga nabo umbumo, uno i muswelo mulumbuluke otulombolanga kufwijako kwetu kudi Yehova pangala pa bukwashi bwaetupa kupityila kobadi. (1 Tes. 5:12, 13) Difuku ne difuku, tuloñanga buninge bwa kwikala na mwiendelejo moloke utumbija dijina dya Leza. (1 Pet. 2:12) Ino miswelo yonso yotulombolanga kufwijako isangajanga Yehova.—1 Tes. 5:18.
4 Muswelo Wetu Mulumbuluke Kutabuka Otulombolanga Kufwijako: Kusapula Bulopwe na muya wetu onso, kupa dijina dya Yehova bulēme, kulombola kufwijako kwetu mu milombelo, kubingija bubinebine na kikōkeji, byonso bino’bi bidi mu mulongo wa miswelo milumbuluke ilombola kufwijako kutamba mu mityima yotukokeja kufwijako Umpangi wetu pamwanda wa bintu byonso byaetulongela. Yehova “usakila bantu bonso kupanda,” kadi usepelelanga pa kwitumona tumwingidila mwingilo ukola wa kufikidija kiswamutyima kyandi. (1 Tem. 2:3, 4) Omwanda basapudi bavule badi na muswelo i betabe ku lwito lwaelelwe mu Mwingilo Wetu wa Bulopwe wa kweji wabusatu, na kwikala bapania bakwashi umbula bwa kweji umo nansha myeji mivule, tamba kweji wabutano kutūla ne ku wabusamba. Muswelo mulumbuluke mpata otukokeja kulombola ‘mutyima wa kufwijako’ Leza i kwipāna na kininga mu mwingilo. Lelo mukekala bapania mu kweji wabutano ne wabusamba?
5 Twi bapebwe lukulupilo lwabine lwa kukekala na būmi bwanyeke. Pano potwelumona kelukafikidila, po pene potufwaninwe kwendelela difuku ne difuku na kufwijako Yehova na nsangaji.—Mit. 79:13.