‘Ikalai ne Mutyima wa Kufwija’ko’
1 Yesu wāundapile ba makopo dikumi, ino umo kete ye wājokele kumufwija’ko. Yesu wāipangwile amba: “Lelo ke dikumi dyo mwapwibwa? Ino kitema badi kwepi?” (Luka 17:11-19) Bine, i kya mvubu kwikala bantu basangela ne bafwija’ko ponso potupebwa kyabuntu kyo-kyonso kibwane ne kya kupānwa kilumbuluke kudi Yehova Leza Tata wetu wa mūlu, muyule buswe ne buntu!—Kol. 3:15; Yak. 1:17.
2 Lelo i bintu’ka byotufwaninwe kufwijija’ko Leza? Tufwijanga’ko Leza pa mwanda wa kyabuntu kikatakata kya kikūlwa kyapele bantu. (Yoa. 3:16) Kadi tufwijanga’ko Yehova pa kwitukokela kwadi. (Yoa. 6:44) Buluji bukwabo botufwaninwe kufwijija’ko i bumo bwa Bwine Kidishitu botudi nabo. (Mit. 133:1-3) Ke enkapo bino, ukokeja kadi kulangulukila pa byabuntu bikwabo bivule bitamba kudi Yehova. Bine, ketusakilepo kwikala pamo bwa Bene Isalela bampikwa kufwija’ko bāidilwe bintu byēbalongēle Yehova.—Mit. 106:12, 13.
3 Ikala na Mutyima wa Kufwija’ko: Nansha ba makopo dikumi byobāsangele pa byēbalongēle Yesu, ino umo kete ye wamufwijije’ko. (Luka 17:15) Mo monka netu tukafwija’ko na kupyasakena mu mwingilo. Shi binebine tudi na mutyima wa kufwija’ko pa bitulongela Tata wetu wa buswe udi mūlu, nankyo mityima yetu iketutonona netu twikale na buswe ne buntu na kusapwila bakwetu myanda yandi. (Luka 6:45) Pakwabo napo, buswe ne mutyima wetu wa kufwija’ko Yehova ukatama ponso potulombola bakwetu ‘bilongwa bya Yehova ne mifwatakanyo yandi ya kutendelwa potudi.’—Mit. 40:5.
4 Kwasha Bakwenu Balombole Mutyima wa Kusangela: Tufwaninwe kuboya mukenga wa kukwasha betu bana ne befundi ba Bible batamije mutyima wabo wa kusangela. Bambutwile badi na mikenga mivule ya kulonga kino, kimfwa pobatala bupangi bwa Yehova pamo na babo bana. (Loma 1:20) Potwendeja kifundwa kya Bible, tukokeja kwipangula mwifundi amba: “Le kino kifundija bika pa mwikadile bumuntu bwa Yehova?” Mutyima wa kusangela wa mwifundi powenda utama, ne buswe ne kusumininwa kwandi kwa kusangaja Leza nako kukenda kutama.
5 Mu ano mafuku a mfulo, bantu bampikwa kufwija’ko ne kusangela bintu bendanga bavula. (2 Tem. 3:1, 2) Bine Yehova ukasangala pa kumona bengidi bandi balombola mutyima wa kufwija’ko na kupyasakena mu mwingilo!—Yak. 1:22-25.