Tukwashei Bisaka Bikale Kwiteakenya Būmi Bwakulādila Nyeke
1 Muyuki wa myanda itala lupeto umo wāsapwidile bantu bātambwile mapolome ku nivelesite ya mu Amerika amba: “Makomwa-meso apandijañana. Muntu ukokeja kwikala na makomwa-meso, ino aye ushikete na mutyima-ntenke.” Kano i kayukeno ka mu ino ntanda, mulombolwa kwisakila bu muswelo nao pabula wa kwiteakenya būmi bwa kumeso. Kino i kishile kulampe na bufundiji bwa Yesu, Yesu wāfundije amba mukristu ufwaninwe ‘kwipela aye mwine, shi muntu amune pano pantanda ponso ke pandi, ino muya wandi umujimine ponka, lelo kyakamwena’mo i kika?’ (Mat. 16:24-26) Kwiteakenya būmi bwaendaenda i kutūla būmi bonso butuntulu mu kuvuija kiswamutyima kya Leza, ye akyo kifwaninwe kwikala kitungo kikatampe kya bisaka dyalelo. (Mit. 143:10; 1 Tem. 4:8) Uno ye mulangwe ulombolwa mu shapita wamfulo mu dibuku Le secret du bonheur familial. Dino dibuku dipya dikwasha bantu bamone i kika kya kamweno kabinebine mu būmi ne i muswelo’ka wa kulonga mwanda wa kūbaka bisaka byabo. Potwenda tusapula myanda miyampe konso, i kika kyotukokeja kunena mwanda wa kukankamika boba botutana, nabo batange dibuku Bonheur familial? Ivwana milangwe imoimo:
2 Ku bibelo nansha mu bipito, tukokeja kushilula mwisambo na bukwashi bwa trakte “Une vie de famille agréable.” Tubwanya kwipangula namino:
◼ “Būmi bwa dyalelo i nsulo ya bintu bivule bizumbijazumbija mityima, ino lelo ulanga amba, nansha byokidi uno muswelo, bibwanika dyalelo kwikala na būmi bwa kisaka bulumbuluke? [Muleke akulondolole.] Uno trakte ulondolola amba eyo bibwanika. Mwene usenswe kukamutanga?” Shi waitabija, ukokeja kwendeleja’ko namino: “Monka mwakusangeja uno mwanda, padi ukasangela ne dino dibuku dipāna madingi mafike’po atala pa muswelo wa kutana nsangaji mu kisaka.” Lombola kifunka kya dibuku Bonheur familial. Kokela milangwe pa mashapita a mitwe ya myanda isangaja. Pūtula dibuku pa paje 10, tanga musemwa wamfulo mu musāngo 17 ne musāngo 18 onso. Pāna dibuku ne kulombola lupoto lwadyo lwa panopano. Kupwa mushintulwile amba tukokeja kwisamba bivule pa uno mwanda, umwipangule ne kitatyi kyokokeja kwimona nandi dikwabo.
3 Tukokeja kwendeleja mīsambo imbajinji yaimanine pa mwanda wa būmi bwansangaji mu kisaka na kunena bino bilonda’ko amba:
◼ “Nsenswe kukokela ñeni yobe pa mulangwe umo utanwa mu dibuku dyonakushidile; nanga bu uno mulangwe ukakusangaja nobe. Shapita wamfulo wisambila pa lufungulo lwa būmi bwansangaji mu kisaka. [Tanga musāngo 2 pa paje 183.] Ubamone, lufungulo lwa būmi bwansangaji i kwingidila pamo mu kuvuija kiswamutyima kya Leza. Tusakila bantu bekale kwifunda Bible mu kisaka mwanda wa bayuke kiswamutyima kya Leza ne kwingidija’kyo mu kyabo kipango. Pano tuidile kushilula kifundwa kya Bible na bantu, kya ku bitupu umbula bwa myeji mityetye kete. Shi usakile, nkulombole mokilongelwanga.” Tujokelei’ko na mukanda I Kika Kisaka Leza Kotudi? nansha na dibuku Buyuki, tonga pa bino bibidi kyokya kifwaninwe.
4 Shi twisambanga na bakwetu ba mu ketu kalasa ku masomo, nansha na bansongwanzele ba mu mwaba wetu, tukokeja kulupula kino kipangujo kilonda’ko amba:
◼ “I mvubu’ka idi mu kwisambila pamo kwa bambutwile na babo bana? [Muleke akulondolole.] Ivwana munenena dino dibuku pa mwanda utala ‘mīsambo yakubulwa kafinda kadi ya patōkelela.’ [Tanga musāngo 4 onso mutuntulu ne musemwa umbajinji mu musāngo 5 pa paje 65 mu dibuku Bonheur familial.] Misāngo ilonda’ko ino ileta milangwe mifwaninwe ilombola mwa kulumbulwila kwisambila pamo kwa mu kisaka. Dino dibuku didi na mutwe wa mwanda unena amba Le secret du bonheur familial. Shi uswile kwikala na dyobe dibuku ne usaka na bubine kwiditanga, nkōkeja kukushila’dyo ku lupoto lutyetye lwa . . . ” Shintulwila mwisambi nobe amba ukāya dikwabo mwanda wa kuyuka milangwe yandi pa byakatanga.
5 Tukokeja kushimika pa kyalwilo kyotwaadile na mīsambo yetu imbajinji yotwashilwile na nkasampe, yadi itala pa kwisambila pamo kwa bambutwile na bana, na kunena’mba:
◼ “Natendele pa kumona amba uyukile mvubu ya kwisambila pamo kulumbuluke mu kisaka. Molangila, i mwanda’ka mukatampe ufwaninwe kwisambila’po bambutwile na babo bana?” Muleke alondolole. Pūtula dibuku Bonheur familial pa paje 68, ebiya tanga malondololo aleta’po kipindi kibajinji kya musāngo 11. “Muswelo mulumbuluke wa kutambula buyuki bwa Leza i kwifunda Bible ku yenga ne yenga.” Mupāne mukanda I Kika Kisaka Leza Kotudi? Shintulula amba bifundwa 16 bidi’mo bilombola myanda mikatampe idi mu Bible. Tanga ntwelelo idi pa paje 2, kadi bandaulai nandi kifundwa kibajinji.
6 Shi tudi mu busapudi bwa ku njibo ne njibo, bwa mu kiwanza nansha mu kikailo kampanda, tubatana shabana nansha inabana, tukokeja kusamuna kusepelela kwandi na kunena’mba:
◼ “Nkulupile amba, ne ami ne abe, batwe bonso tuyukile amba kulela bana mu ano mafuku i kikomo. Molangila, i kika kikokeja kukinga kyobe kisaka ku lupusa lubi? [Muleke akulondolole.] Tala madingi a tunangu onaikele nami kusepelela.” Kokela milangwe pa kimfwa kiletelwe pa paje 90 mu dibuku Bonheur familial, mu musāngo 1, tanga ne musāngo 2. Lombola i mu muswelo’ka wikele ano madingi majalale adi mu dino dibuku mafwaninwe mu kukinga bisaka ku lupusa lubi. Mwipangule shi ubwanya kumushila dibuku ne kwiya kumumona mwanda wa kulondolola ku bipangujo byakepangula.
7 Shi tubaiya kutala shabana nansha inabana waitabije dibuku “Bonheur familial,” tukokeja kwendelela na kwisamba mu uno muswelo, amba:
◼ “Potwesambile nobe musunsa umbajinji, namwene amba utele bobe bana mutyima bininge, ne usaka kulonga bukomo bobe bonso mwanda wa kwibakinga ku lupusa lubi. Padi kwatangile dibuku dyonakushidile, ino didi na milangwe isangaja yonsaka kukuyukija. [Tanga musāngo 19 pa paje 59.] Pa kusamba kipwano na Leza, tufwaninwe kwifunda kumuyuka kupityila mu Kinenwa kyandi kisonekwe, Bible. Lelo usaka nkulombole muswelo otwifundanga Bible mu kisaka?”
8 Badingidi ba ino ntanda i bakomenwe kulombola bisaka mashinda a būmi bwansangaji; shi kutadije bikajoka’ko byenda bialakanya. Tupānei bininge dibuku Bonheur familial, mwanda wa Kinenwa kya Leza kikwashe bantu ba miswelo yonso, nabo bamone kwiteakenya būmi bwaendaenda.—1 Tem. 6:19.