Tupei Bakwetu Le Secret Du Bonheur Familial
1 Kisaka kyo kitako kine kibundile muzo wa muntu onso, kyo kibutwile bibundi byepele ne bikatampe, matanda ne mizo yonso ya bantu. Ino dyalelo, kisaka kyo kilondwalondwa bya kashāa. Pano kudi lupusa lukomo luleta kyaka, lubwanya nansha kujimija būmi bwa kisaka. Bine batwe tufwijanga’ko mpata Yehova, Mulongi wa kisaka, pa kwitufundija mwa kwikadila na nsangaji mu kisaka! Boba bengidijanga madingi andi bamonanga mwendela mutyepela makambakano ne mobekutyila umbumo mu kisaka kyabo. Omwanda tudi na nsangaji, mwanda mu kweji 10 tukabanya dibuku Le secret du bonheur familial. Tukwatei mpangiko ya kobolola bantu ne kwisamba nabo myanda itala pa būmi bwa kisaka. Twikalei bantu ba bulunda, bakulupile, bayukile kusansanya. Lelo tukesamba nabo bika?
2 Tubwanya kulupula kipangujo pamo bwa kino:
◼ “Lelo nobe ujingulwile amba bisaka bivule bikondanga mpata na buno būmi bwenda bukoma? [Muleke akulondolole.] I kyabine, bantu bavule badi na makambakano mu bisaka byabo. Molangila, i kika kikokeja kukwasha bisaka bikale bishikatyije na nsangaji mikatampe? [Muleke akulondolole.] Bikele Leza ye Mulongi wa kisaka, mwene i kyatunangu kubandaula madingi aetupa mu myanda itala kisaka? [Tanga 2 Temote 3:16, 17.] Buno bufundiji, buletelwe amba tumwene’mo biyampe, i busakaulwe mu dino dibuku Le secret du bonheur familial.” Kupwa mwipangule kine kyamwene aye bu kikoleja bisaka bininge, ebiya mulombole shapita wisambila’po ne kumuponeneja dibuku.
3 Potulonga kujokelamo kupya, kitungo kyetu i kushilula kifundwa kya Bible, omwanda tubwanya kunena’mba:
◼ “Ne mulanguluke bininge pa myanda yowaunombwele itala pa būmi bwa kisaka, omwanda nakupaila kintu kimo kyosaka kutendela mpata. [Mulombole mukanda Kisaka Leza, pūtula’o pa paje 16, tanga bipangujo bisamba bipangwilwe kūlu kwa paje.] Mungya buluji, muntu ne muntu wa mu kisaka ufwaninwe kwela’ko kuboko mwanda wa kutuntwila ku nsangaji ya mu kisaka. Shi ukidi’ko na minite mityetye, nkulombole muswelo wa kumwena kamweno mu binenwe pano pomputwile’pa.” Shilwididila kwifunda nandi kifundwa 8.
4 Muswelo mukwabo wa kushilula mīsambo i kukolomona mwanda kabidye, na kunena kintu pamo bwa kino:
◼ “I bine muntu yense wabilanga kushikata pa mfuko shē, muloelelwe, ino mobimwekela, bisaka bivule kebidipo na ano maloa. Molangila, i kika kikokeja kwibakwasha batane nsangaji yabinebine? [Muleke akulondolole.] Bible wālombwele tamba kalāa i makambakano a muswelo’ka afwaninwe kufikila bisaka dyalelo. [Tanga 2 Temote 3:1-3.] Inoko, Bible umo yenka i mushintulwile bisaka mwa kulongela mwanda wa kupwija makambakano ne kwikala na nsangaji yaendaenda. Bino byonso i bilombolwe mu dino dibuku Le secret du bonheur familial.” Kupwa, kokela milangwe yandi ku bipangujo bya kupituluka bipangwilwe ku mfulo ya shapita kampanda, tanga’byo, ebiya muponeneje dibuku.
5 Mu kujokelamo kupya, twingidijei mukanda “Kisaka Leza” mwanda wa kushilula kifundwa. Tubwanya kunena’mba:
◼ “Natendela bininge muswelo osenswe kubandaula misoñanya ya Bible itala pa būmi bwa kisaka. Bine, bintu bilongeka bilombola amba kulonda madingi mafike’po atanwa mu Bible kulupulanga bipa bilumbuluke. Tala buluji boalupwila bipa.” Tanga musāngo umbajinji wa kifundwa 1 mu mukanda Kisaka Leza, pamo ne Mitōto 1:1-3 nansha Isaya 48:17, 18. Shi ubamone amba kudi mukenga wa kwendelela, nankyo bandaulai kifundwa kyonso kituntulu. Mulaye kumujokela dikwabo mwiye mwisambile pa kifundwa kilonda’ko.
6 Pa Mwanda Utala Mabuku Etu: Byotuyukile amba mabuku etu i malēme kadi elelwanga lupeto luvule pa kwialupula, lelo twikalanga dimodimo twikaka kulombola mapepala, mikanda nansha mabuku ku bantu botutana? Lelo tukayuka namani amba mabuku otupāna ketupananga’opo ku bantu kebeana? Muswelo umo wa kuyuka i kwipangula muntu otushila dibuku etuyukije shi binebine ukatanga’dyo.
7 Kimfwa, shi tupāna dibuku “Bonheur familial,” tubwanya kunena namino:
◼ “Abe nena’tu amba nsa kutanga dino dibuku, ami nkushile’dyo ku kyabuntu kityetye. Kekubulwe padi wiipangula mwanda waka tulomba kino kyabuntu kityetye. I mwanda mwingilo wetu wendejibwanga na byabuntu bipānwa na mutyima tō. Bino byabuntu byomuletanga bitukwashanga’tu ku kufuta busedi bwao kete. Omwanda ndi mutōkwe ku mutyima kukushila dino dibuku dikakukwasha usokole lufungulo lwa būmi bwansangaji mu kisaka, nkakushila’dyo ku kyabuntu kityē kya . . . [Tela kyabuntu kyadyo kya panopano.]”
8 Tulongei buninge bwetu bonso tupe bakwetu lufungulo lwa būmi bwansangaji mu kisaka: kukōkela ku misoñanya ilombwelwe mu Kinenwa kya Leza.—Mit. 19:7-10.