Malondololo Ku Bipangujo Byenu

◼ Shi kipwilo kibaitwe kukateakanya myanda itala muntu wafwa, dimodimo bipangujo pamo bwa bino bilonda’ko bikokeja kwiipangulwa:

I ani ukapityija kishinte kya pa lufu? Buno i butyibi bufwaninwe kutyibwa na ba mu kisaka kya ufwile. Babwanya kutonga mwanetu mubatyijibwe uyukene bu udi na mwikadilo mulumbuluke. Shi abalombe muneni ku kitango kya bakulumpe, i kyendelemo kitango kitonge mukulumpe wa bwino bwabinebine wa kukapityija kino kishinte, nandi ukemanina pa dishikulu dya Sosiete. Ke kiyampepo kwisamba bilabila bya kusaka kutumbija yewa ufwile, ino padi kifwaninwe kukokela milangwe pa ngikadilo imoimo milumbuluke yaadi nayo.

Lelo Njibo ya Bulopwe ikokeja kwingidijibwa? Kikokejika shi kitango kya bakulumpe kibaitabija, ne shi kino kekikalakanyapo mpangiko ya nyeke ya kupwila. Mukokeja kwingidija Njibo ya Bulopwe enka poso ufwile’wa wadi na mwikadilo mulumbuluke, ne shi wadi umo wa pa kipwilo, nansha shi wadi mwana mutyetye wa umo wa pa kipwilo. Ino shi i kiyukane patōka’mba muntu’wa kadipo na mwiendelejo wa bwine-kristu, nansha shi pamwanda wa buluji kampanda, bimweka bu bikokeja kupunikija kipwilo, nankyo bakulumpe kebafwaninwepo kupāna lupusa lwa kwingidija Njibo ya Bulopwe.​—⁠Tala dibuku Huduma Yetu p. 62.

Pavule, Njibo ya Bulopwe keingidijibwangapo pa lufu lwa muntu wa panja, ke Kamoni, wa mu kisaka kya bwine-kristu. Ino poso’nka shi yewa ufwile, wa mu kisaka kya basapudi babatyijibwe ne bepāne mu mwingilo, wādi uyukene senene ku batutu ne ku bakaka bu muntu wadi na mumweno muyampe wa bubinebine, ne shi mwiendelejo wandi wadi mulumbuluke, ne kadi shi byonso bisaka kupita pa lufu kebikwatañenepo na bibidiji bya bwine-ntanda.

Nansha shi bakulumpe abaitabija amba njibo ingidijibwe, ino bafwaninwe bidi kwiipangula shi i kya tunangu kuleta ne kitalu (sanduku) pa kifuko papityijibwa myanda itala lufu. Shi i amo, bakokeja kwitabija balete’kyo mu njibo.

Kikekala namani shi i lufu lwa bantu ba bwine-ntanda, ke ba Tumoni twa Yehova? Shi muntu ufwile wadi na mwikadilo wanibwa mu kibundi, mwanetu ukokeja kukapityija kishinte kimanine pa Bible ne kikankamika, ku kifuko kudi ufwile nansha ku kibundu. Kipwilo kekiketabijapo kwipapila mīsambo ya pa kujīka ufwile wadi uyukene biyampe bu wa mwiendelejo wa kiboja, nansha wakubulwa kukwatañana na bijila, nansha kadi shi mwikadilo wandi wa umbūmi wadi wakubulwa kukwatañana na misoñanya ya mu Bible. Tutu kafwaninwepo nansha patyetye kukuta nkuku na mwendeji wa Kipwilo kya Ki-kristu, ya kukwatañana nandi mu mutōtelo nansha ya kusaka kuludika nandi myanda ya mufwe mu kipwilo kampanda kya Babiloni Mukatakata.

I kika kifwaninwe kulonga shi ufwile wadi mupangwe? Mokyendele, kipwilo kekikemaninapo mawi a pa lufu lwandi, ne Njibo ya Bulopwe mine keifwaninwepo kwingidijibwa. Shi muntu’wa wadi ke mulombole kwisāsa kwandi ne wadi wabila kwalujibwa, padi mutyima wa mundamunda wa mwanetu kampanda ukamutonona kupityija kishinte kimanine pa Bible ku kifuko kudi kitalu kya ufwile nansha ku kibundu, mwanda wa kupāna bukamoni ku bantu ke ba Tumoni bakatanwa’ko, ne pamwanda wa kusenga kisaka kya ufwile. Inoko, kumeso kwa kutyiba ino mbila, kikekala kya tunangu uno tutu akesambe bidi na kitango kya bakulumpe ne kukalonda madingi obakamupa. Shi kadi abamone amba kekyendelemopo uno tutu akapityije kishinte, padi kikafwaninwa tutu umo wa mu kisaka kya ufwile akapityije kino kishinte mwanda wa kusenga balongo bandi.

Mukatana bulombodi bukwabo mu manimelo a Kiteba kya Mulami kya mu Falanse kya 15 kweji 10, 1990, p. 30-31; kya 15 kweji 12, 1981, p. 29-30; kya 15 kweji 6, 1980, p. 5-7; kya 1 kweji 9, 1978, p. 5-8; kya 1 kweji 9, 1977, p. 539-540; kya 1 kweji 1, 1971, p. 31-32; ne mu manimelo a mu Falanse a Amkeni! wa 8 kweji 9, 1990, p. 22-23; ne wa 22 kweji 7, 1977, p. 12-15.