Kikōkeji Kipalwanga Mpalo
1 Tutanga mu Bahebelu 11:6, amba Leza “upala mpalo boba bamukimba ne mikeketo.” Nakampata upalanga mpalo bengidi bandi bepāne ‘bakōkele mu bintu bityetye’ na ‘kwibabīka bu kalama pa bingibingi bine.’ (Mat. 25:23) Mu muneneno mukwabo, Yehova upanga Batumoni bakikōkeji mpalo mu mwingilo wabo muyampe na kwibapa madyese mapya a mu mwingilo.
2 Mutumibwa Polo, pamwanda wa kikōkeji kyandi, wāpadilwe mpalo na kupebwa mwingilo wāmufikije ku kunanga mu bibundi bikatampe ne bityetye bya mu Bulaya ne mu Azia Minele. (1 Tem. 1:12) Nansha byokyādi kimulomba kulonga bukomo mwanda wa kuvuija uno mwingilo kufikija ne pa mfulo, inoko Polo wādi ukwete nyeke na mutyika ano madyese aāpelwe. (Loma 11:13; Kol. 1:25) Bine, kupityila ku mwingilo wandi wa bupyasakane, Polo wālombwele patōkelela amba būmi bwandi bwādi bukwatañane na lwitabijo lwandi. Kimfwa kyandi kitukankamika tukwate na makasa abidi madyese a mingilo etupelwe.
3 Yehova i Mwitupe Mwingilo: I muswelo’ka otukalombola netu amba tumwene ino mpalo, ano madyese, monka mwādi mwiamwena Polo? I na kukimba miswelo yonso ya kuvudija bwingidi bwetu mu uno mwingilo. Na kukwatakanya mikenga yonso yotumona mwanda wa kupāna bukamoni bwa kiponka na ponka ne bwa ku njibo ne njibo. Na kujokela bantu bonso boketwatene ku mobo abo, ne kupempula boba basepelela musapu. Kadi monka, i na kulēmeka bilayeno byotwipa na bantu mwanda wa kukefunda nabo Bible.
4 Pa mwanda utala mwingilo, Polo wāletele uno musoñanya amba: “Sapula’o ne kinyinga.” (2 Tem. 4:2, MB) Kininga kishintululwanga bu kutyityija kutyityijibwa kintu kampanda. Lelo netu tutyityijanga mwingilo wetu na kwiutūla pa kifuko kibajinji mu būmi bwetu? Kimfwa, ketufwaninwepo kuleka kwipwija mukose nansha mingilo yetu ya kikasuku yotwingilanga ku mfulo kwa yenga itujimijije kitatyi kyotufwaninwe kutambila mu mwingilo wa busapudi. Byotukulupile amba mfulo ya ino ngikadilo ya bintu ibafwena pabwipi nakampata, tukulupilei kadi amba busapudi bwa myanda miyampe ya Bulopwe o mwingilo wa mvubu otufwaninwe kwingila.
5 Kikōkeji kyetu kudi Leza kimwekanga mu kwingila kitatyi ne kitatyi mwingilo waetupele. Tuvuijei’o kufikija ne pa mfulo, Yehova uketupala mpalo mikatampe mwanda wa kikōkeji kyetu.