Tuningijei mu Mwingilo Wetu
1 Mutumibwa Polo wānene Bene Kidishitu amba nangilai mu dishinda dya Leza kadi amba “ningijaimo.” (1 Tes. 4:1) Le kino kitutala netu namani? Dibajinji bidi tufwaninwe kukimba nyeke miswelo ya kuningija mu mingilo ya ku mushipiditu, kulonga kitatyi kyonso bukomo bwa ‘kuvuija bwingidi bwetu ne pa mfulo.’—2 Tem. 4:5.
2 Kukanina kwa Mutyima: Kuningija mu mwingilo wetu kutambanga ku mutyima otudi nao wa kwingidila Umpangi wetu ne pa mfulo. Tusakanga kutama ku mushipiditu ne kukimba miswelo ya kulumbulula mwingilo wetu. O mwanda bibidiji biyampe ne kukanina kwa mutyima kuyampe biketukwasha tufikile pa bitungo bya kiteokratike.—Mit. 1:1, 2; Fid. 4:6; Bah. 10:24, 25.
3 Pa kusaka kutandabula mwingilo bitulomba kutamija mushipiditu wa kupāna ne wa kwisuminwa. Ino uno mushipiditu ukokeja kutamijibwa na kulangulukila mu milombelo pa kimfwa kilumbuluke kya Yesu. (Mat. 20:28) Yesu wāmwenine nsangaji mikatampe mu kwingidila bakwabo mu mwingilo wandi onso. (Bil. 20:35) Tukokeja kwiula Yesu na kuta bantu mutyima ne na kuboya mikenga yo-yonso ya kuningija mu mwingilo wetu.—Is. 6:8.
4 Mwingilo wa Bambutwile: Mutyima wa kwingidila bakwetu ne wa kusaka kutandabula mwingilo wetu ukokeja kukunwa mu bana pobakidi banuke. Bana bakajingulula kininga kya ba mu kisaka ne muswelo obengila na bukankamane pa kutandabula mwingilo wabo. Tutu umo wakunkilwe mutyima wa kuninga mu bitungo bya kiteokratike paadi usapula mu bunkasampe na nkambo wandi. Pa kumona kininga ne nsangaji ya nkambo wandi watononwa nandi akimbe mikenga ya kwingidila banababo. Panenwa pano i mwingidi wa mingilo.
5 Tusakilwa Batutu: “Wivwane muntu usaka . . . nankyo nabya i mwingilo muyampe wāsaka.” (1 Tem. 3:1) Bino binenwa bikankamika batutu basake kubwanya bisakibwa bya kwingila mu madyese a mingilo adi mu bulongolodi bwa Yehova. Kusaka uno muswelo kekulombepo kwikala na manwa a pa bula nansha bwino butyikukwa. Tutu usaka mingilo ufwaninwe kukimba bidi Bulopwe ne kwipāna mu mwingilo na bupyasakane. (Mat. 6:33; 2 Tem. 4:5) Ukalonga buninge bwa kuleta kimfwa kilumbuluke ku bakwabo.
6 Ntanda Yonso: Yehova upelakanyanga mwingilo wa kungwija bantu. (Is. 60:22) Pano bonso balonda kimfwa kya Yesu bafwaninwe kuningija mu mwingilo wabo. Lapolo ya ntanda yonso ya mu mwaka wa mingilo wa 2006 ilombola amba kwādi bantu 248327 babatyijibwe. Ko kunena’mba i mwayene wa bapya 680 bebweja’ko difuku ne difuku! Nanshi twendelelei na kukimba miswelo ya kuningija mu mwingilo wetu.