Mwa Kuvudijija Mwingilo Wetu
1 Myaka 40 ne musubu kunyuma, kishinte kimo kinena’mba, “Lelo Bilumbuluke Byolonga Bikubwene?” kyālupukile mu Kiteba kya Mulami kya 1 Kweji 6, 1955, Falanse. Kino kishinte kyālombwele na buswe bonso muswelo ubwanya bantu ba Yehova kubweja’ko bukomo bobalonga mu mwingilo mwa kuvudijija mwingilo wabo wa Bulopwe. Dyalelo, ano madingi mayampe akidi na mvubu ne kotudi batwe bekankila kulonga nyeke kyokya kilumbuluke.
2 Mwingilo wetu onso ufwaninwe kushinsakanibwa na uno musoñanya mukatampe mpata unena’mba, “Ukasanswa Yehova Leza obe ne mutyima obe onso, ne muya obe onso, ne ñeni yobe yonso, ne bukomo bobe bonso.” (Mako 12:30) Tulombolanga buswe bwetu bonso botuswele Yehova na kukwatakanya ne pa mfulo mikenga yonso yotumona mwanda wa kwendeleja mwingilo wa Bulopwe. Shi ke pano, tubandaulei miswelo imoimo yotukokeja kuvudija’mo mwingilo wetu.
3 Tuvuijei Biselwa Byetu: Batutu bepāne bakokeja kulonga buninge bwa kubwanya bisakibwa bya kwikala bu bengidi ba mingilo, ne bu bakulumpe mwenda mafuku. Kishinte “Le Wabilanga Kusela Biselwa?” ne “Lelo Ubwenye Bisakibwa mwa Kwingidila?” byalupukile mu Kiteba kya Mulami kya 1 Kweji 9, 1990 (Falanse), byakankamikile batutu bavule beelele’ko mwa kuselela biselwa pa kipwilo. Lomba madingi ku bakulumpe ba pa kyenu kipwilo umone kwendelela kumeso ne kubwanya bisakibwa.
4 Bakulumpe ne bengidi ba mingilo bakidi bankungulume bakankamikwa kulanguluka bininge pa mukenga wibashidilwe wa kudinga fomu wa Masomo a Bufundiji bwa Mingilo. Ukokeja kuyuka bivule bitala pa ano masomo na kutanga myanda inenwe mu mutwe wa mwanda “Masomo a Bufundiji bwa Mingilo” mu Index des publications de la Société Watch Tower (1986-1990, 1991-1994 ne 1996). Mwene ubamone “kibelo kikatampe kya mīngilo” kyobakushidile pululu? (1 Kod. 16:9a) Batutu bavule balondele ano masomo kebadipo bafwatakanya’mba bakapebwa madyese mavulevule mu mwingilo na obapelwe pano. Ino panenwa pano bamo bengilanga ku Betele, bakwabo i bapania ba pa bula, bamishonele nansha batadi ba bipindi.
5 Tukaninei Kwingila Mwingilo wa Kitatyi Kyonso: Bankasampe bapwija masomo, bakaji basonge, ne banabetu batambwile pasho babwanya kulanguluka bininge pa mwingilo wa bupania. Pituluka myanda idi pa dyani dya ntentekelo dya Mwingilo Wetu wa Bulopwe wa Kweji 8, 1998, kupwa wisambe na bapania bādi mu ngikadilo iifwene na yodi’mo. Kepabulwe padi ukakunkwa mutyima wa kuvudijija’ko mwingilo obe na kwingila bupania pamo bwa abo. (1 Kod. 11:1) Le i bika bikukomena kupityija nsaa 70 pa kweji mu mwingilo ne kwikadidila pania walonso?
6 Kudi batutu ne bakaka 17 000 ne kupita bengila pano ku Betele kujokoloka ntanda yonso. Mwingilo Wetu wa Bulopwe wa Kweji 9, 1995, i mwisambile pa bisakibwa bya kubwanya mwa kwingidila ku Betele. Ubulwe’po kwiutanga ne kwiipangula shi nobe ubwenye bisakibwa bya kupebwa ano madyese a pa bula?
7 Twingilei Kokwa Kudi Kusakibwa Kukatampe: Lelo ushikete mu mwaba wingilwa’mo kitatyi ne kitatyi nansha kokwa kudi banabetu bavule babwanya kwiangula biselwa mu mwingilo? Le kodi kala mulanguluke ne pa muswelo wa kuvudijija’ko mwingilo obe na kuvilukila kokwa kudi kusakibwa kukatampe? Padi kikalomba kuvilukila ku kibundi kya kubwipi na kyodi’mo, kusakibwa bengidi bavulevule. (Mat. 9:37, 38) Ino ke mbilapo ya kutyiba na kampeja-bukidi. Kikalomba kulangulukila’po mu milombelo. (Luka 14:28-30) Wisambe na bakulumpe ne na mutadi wa kipindi pangala pa ngikadilo yobe. Bakalanguluka nobe pamo ne kuyuka shi i biyampe uviluke panopano nansha shi kikakulomba kwiteakanya bidi mwa kuvilukila mwenda mafuku. Shi usaka kulembela Sosiete akulombole kokokeja kwenda, nankyo Komite wa Mingilo wa pa kipwilo kyenu ukalemba mukanda ukatumwa pamo na obe.
8 Tulumbululei Mwingilo Wetu: Batwe bonso tubwanya kuputumina bininge mu mwingilo na kulumbulula mwingilo wetu wa busapudi. Lelo utambilanga mu miswelo yonso ya mwingilo, kifwa kupāna bukamoni bwa ku njibo ne njibo, bwa kiponka na ponka, kulonga kujokela’mo kupya ne kwendeja bifundwa bya Bible? Shi wendejanga kifundwa, ubulwe’po kulumbulula mufundijijo obe? I kiyampe upituluke myanda idi pa dyani dya ntentekelo dya Mwingilo Wetu wa Bulopwe wa Kweji 7, 1996, ipāna madingi mayampe a mwa kuludikila befundi bafikile pa kwipāna kudi Yehova ne ku lubatyijo.
9 Shapita 9 wa dibuku Huduma Yetu i mwisambile pa kamwanda ne kamwanda kalombola muswelo wa kuvudija mwingilo wetu ne kwiulumbulula. Na bubine, batwe bonso tusakanga kulonga bukomo bwetu bonso mu mwingilo wa Leza. Ubulwe’po kulanguluka pa bitungo kampanda bya kumushipiditu? Londa musoñanya ukusoñanibwe mu 1 Temote 4:15 amba: “Pyasakena ku bino bintu bino’bi; wielelele monka; amba bantu bonso bamone mōendela utamina.”