Lelo Usaka Kulongela’ko Bivule?
1 Yesu wādingakenye Bulopwe na byabulēme bya lupoto luvule. (Mat. 13:44-46) Ne mwingilo wa kusambakanya myanda miyampe ya Bulopwe nao i kyabulēme kya mvubu mikatampe. Uno mwingilo ufwaninwe kutūlwa pa kifuko kibajinji mu būmi bwetu, nansha byoulomba kwipela kwabinebine. (Mat. 6:19-21) Lelo ukimbanga kulongela’ko bivule mu mwingilo wa Bulopwe?
2 Bandaula Bino Bintu bya Kamweno: Kudi bintu bivule bifwaninwe kulonga pa kuputumina bininge mu mwingilo: (1) kwikala musumininwe kutangidija kumeso tumweno twa Bulopwe mu būmi (Mat. 6:33); (2) kulombola lwitabijo ne kukulupila mudi Yehova (2 Kod. 4:1, 7); (3) kukimba bukwashi bwa Leza mu milombelo yabinebine ne ya kininga (Luka 11:8-10); (4) kwendelela na kulonga bilongwa bikwatañene na milombelo yetu.—Yak. 2:14, 17.
3 Miswelo ya Kutandabula Mwingilo Wetu: Umo ne umo ukokeja kwitungila’ko kitungo kya kyalwilo, kya kupityija kitatyi kampanda mu mwingilo kweji ne kweji. Ino lelo kodi ne mulange kukwatakanya mukenga o-onso wa kupāna bukamoni bwa kiponka na ponka, koku wielela’ko kujadika misapwilo yobe ikale mipotoloke, kuneñenya kujokela’mo kupya kobe, ne kulonga buninge bwa kwendeja bifundwa bya Bible byendelela kumeso? Le kubwanyapo kwikala pania mukwashi nansha walonso, nansha kukengidila kokwa kukimbwa bengidi bavule? Shi wi tutu mubatyijibwe, lelo ubulwe’po kubwanya bisakibwa mwa kwikadila mwingidi wa mingilo nansha mukulumpe? (1 Tem. 3:1, 10) Lelo kukokejapo kutandabula mwingilo obe na kubwanya bisakibwa bya kukengila ku Betele, kukafunda Masomo a Bufundiji bwa Mwingilo, nansha Masomo a Ngileade a bamishonele?—Luka 10:2.
4 Mwanetu umo wadi wingila kaji ka nshikije-dyuba kadi wadi ujimija kitatyi kivule mu makayo a kwitamuna bidyoma, ino bamukankamika ekale pania walonso. Nandi waitabija, washilula kwingila bu pania mukwashi, kupwa wasendulula ngikadilo yaadi’mo, watwela mu mwingilo wa kitatyi kyonso. Mwenda mafuku wafunda Masomo a Bufundiji bwa Mwingilo, amuteakanya ku mwingilo wapelwe pano wa bu mutadi wa kipindi. Pano i musangale mpata mwanda wa kulonda kwaalondele madingi a kumukankamika obamupele, kadi uyukile amba udi mu nsangaji ya kasha ilupukile ku kutyiba kwaatyibile mbila ya kulongela’ko bivule mu mwingilo wa Bulopwe.
5 Yehova weselanga boba betabija kutumwa. (Is. 6:8) Shi ke pano, kekwakekala kintu nansha kimo kya kukukankaja uleke kutandabula mwingilo obe ne kumwena’mo kuloelelwa ne kusengwa pa mutyima bikatampe.