Tusepelelei Kupāna Bukamoni Bukunkane
1 Umo ne umo umbukata mwetu usenswe kulonga bintu byakokeja kulonga senene. Mungya Mako 7:37, bibumbo bya bantu byēsambile padi Yesu amba: “Uloñanga byonso biyampe’tu.” Nanshi ke kya kutulumukapo, Yesu wādi usepelela kulonga kiswamutyima kya Yehova! (Tala Mitōto 40:8.) Shi tulanguluke senene pa madingi alonda’ko, netu tukekala na nsangaji itambanga ku kukōkela ku musoñanya wa Yesu wa kusapula ku bantu ne kwibapāna bukamoni bukunkane. (Bilongwa 10:42) Mu kweji 2, tukapāna dibuku dyo-dyonso dya mapaje 192 dyālupwilwe kumeso kwa 1985, shi dikidi mu kibīko kya pa kipwilo, nansha dibuku Kwikala ne būmi bwanyeke. Le i muswelo’ka otukokeja kuleta bukamoni bukunkane na ano mabuku?
2 Bantu bavule byobatele mutyima bininge ku bukomo bwa ngitu yabo, tukokeja kunena’mba:
◼ “Nansha byokudi kwendelela kukatampe mu myanda ya bundapi, ino ayo misongo ikyendelela ne pano na kususulañana bininge. Molangila i mwanda waka? [Muleke akulondolole.] Yesu Kidishitu wānene amba misongo, bipupo bya mba, byo bikayukanya’mba ketudi mu mafuku a ku mfulo. (Luka 21:11) Ino Bible aye i munene amba kudi kitatyi kikatalulwa’ko misongo. [Tanga Isaya 33:24.] Tala buluji bwa kukulupidila mu buno bufundiji bwa pa kitako bwa Bible bwitupa dino dibuku.” Tela milangwe imoimo mifwaninwe idi mu dibuku dyolombola mwisambi nobe, kupwa mupe’dyo, umulombole ne lupoto lwa panopano.
3 Potulonga busapudi bwa kiponka na ponka kubwipi na kobapoteja bintu, tukokeja kwimuna muntu kampanda ne kumwipangula’mba:
◼ “Mwene nobe ubamone’tu amba būmi bubakoma ano mafuku, kusokola bya kudya na bana kweji mutuntulu ke bulwi, ke amopo? [Muleke akulondolole.] Molangila, kudi difuku dyotukekala’tu babwanye bintu byonso bya kungitu senene shē?” Muleke akulondolole. Kupwa tela kisonekwa kya Bible kifwaninwe kidi mu dibuku dyopāna. Bweja’ko amba: “Dino dibuku dishintulula muswelo ukapwija Leza makambakano akomeja būmi dyalelo, kupityila ku Bulopwe bwandi.” Pāna dibuku. Kupwa ukokeja kumulombola kutendela kowatendela ino mīsambo, ne kumwipangula’mba: “Lelo bibwanika tukendeleje ino mīsambo difuku dikwabo?” Papo, tubwanya padi kumulomba yandi adelese.
4 Shi twingidija dibuku “Kwikala ne būmi bwanyeke,” tukokeja padi kumona mukenga wa kutompa ino ntwelelo itala pa ndoe ya pano pantanda:
◼ “Molangila, mwanda waka kutūla’ko ndoe pano pantanda i kukomo bininge? [Muleke akulondolole, kupwa mulombole kifwatulo kya pa paje 20-21.] Kino kifwatulo kyelekeja kinkumenkume kya mu Bible kisekunwinwe mu mukanda wa Kusokwelwa. [Tanga Kusokwelwa 12:7-9, 12 mu musāngo 17. Kupwa tanga bilembwa bidi kunshi kwa kifwatulo.] Dyabola wāelelwe pano panshi, ne kimo kya mu bipa bibi byālupukile ku kino kinkumenkume i kujimina kwa ndoe pano pantanda. Dino dibuku dileta malondololo ku bipangujo bivulevule bya kamweno. Nkasangela kukushila’dyo shi usaka kwiditanga.”—Shi usaka kuyuka ntwelelo mikwabo mifike’po ya kulonda pa kupāna dibuku Kwikala ne būmi bwanyeke, pituluka mu paje wamfulo wa Mwingilo Wetu wa Bulopwe wa kweji 3, 1995, kweji 3, 1994 ne kweji 1, 1993.
5 Shi tubajoka kutala boba bālombwele kusepelela, tukokeja kutompa kushilula kifundwa kya Bible na kwingidija ntwelelo ya uno muswelo:
◼ “Mu mīsambo yotwesambile nobe, waletele mulangwe umo usangaja mpata. [Tela mulangwe walupwile mwisambi nobe.] Naikele kulanguluka’po, pano nsaka kukulombola byontene mu kukimba kutyetye konakimbile. [Bandaula nandi kisonekwa kampanda mu Bible kifwaninwe.] Twifundanga na bantu ku bitupu, bino bifundwa ke bikwashe midiyo mivule ya bantu ku kutamija bufundiji bwa pa kitako bwa Bible mu bula bwa kitatyi kityetye. Buno bubandaudi bwa Bible bukokeja kukupa kikulupiji amba binebine milao yabine ya Leza ikafikidilanga.” Tela bipangujo bimobimo bikalondololwa mu kifundwa. Shi wapele uno mulangwe, mushintulwile’mba kudi monka kifundwa kya pa bula kya bukidibukidi, kilomba’nka minite 15 kete pa yenga, kīfundwanga mu bula bwa mayenga 16. Lombola mukanda Kisaka Leza, pūtula’o pa kifundwa kibajinji kupwa lomba mwisambi nobe shi ukokeja kumushintulwila muswelo otwifundanga na bantu mu kino kifundwa.
6 Wivwane tuvuije mwingilo wetu na bwino, tukamwena’mo nsangaji. ‘Tutei mutyima nyeke’ ku kupāna bukamoni bukunkane, twikalei na nsangaji ya kutambila mu bipindi byonso bya mwingilo.—1 Tem. 4:16.