Tusapulei Myanda Miyampe, Koku Tutele Mutyima Amba Kitatyi Kibatyepa
1 Tulombolanga kufwijako kwetu kukatampe pamwanda wa lukulupilo lwetu lwa Bulopwe bwa Leza na kutambila mu mwingilo wa bwine-kristu na mutyima wetu onso. Tufwaninwe kwiwingila, koku tutele mutyima’mba kitatyi kibatyepa. Mwanda waka? Mwanda bengidi i batyetye, mfulo ya ino ngikadilo imbi ya bintu nayo ibafwena, kadi būmi bwa bantu bavule ba mu mwaba wetu budi mu kyāka. (Ezek. 3:19; Mat. 9:37, 38) Kino kiselwa kya kamweno kyotupelwe kitulomba kwikivuija na bukomo bwetu bonso mu mwingilo. I muswelo’ka otukalombola’mba tutele mutyima ku kutyepa kwa kitatyi kya kusapula? I na kuteakanya bitwelelo biyampe bya kushilula nabyo busapudi, na kukimba ne kukonkotola bantu ponso pobatanwa, na kusoneka senene majina ne bifuko bya bonso balombola kusepelela, na kupeja kulonga kujokelamo kupya mwanda wa kutamija kusepelela kulombwelwe’kwa, kadi ne na kuvuluka’mba pano po pene potufwaninwe kukwata mwingilo wetu na kusumininwa, mwanda būmi bwa bavule budi mu kyāka. Madingi alonda’ko ano aketwikadila a kamweno shi tubeteakanya senene kumeso kwa kupāna musapu mu kweji 3, koku tutele mutyima amba kitatyi kibatyepa bininge. Tukapāna dibuku Ufunuo—Upeo Wao Mtukufu U Karibu!
2 Tukokeja padi kushilula mīsambo na kutela mu kīpi makambakano afikilanga bantu bavule ba mu kipindi motushikete, amba:
◼ “Bantu bavule i betabije mudi Leza, ino beipangulanga i kika kikebafikila mu būmi bwabo bwa kumeso. Ulanga’po namani? [Muleke akulondolole.] Lelo uyukile amba Bible witulombolanga patōka kiswamutyima kya Leza pa muzo wa muntu ne kyokya kyaloñanga mwanda wa kukafikidija’kyo?” Pūtula dibuku Ufunuo—Upeo Wao pa paje 301. Tanga mu musāngo umbajinji kisonekwa kya Kusokwelwa 21:1, ne bushintuludi bwakyo mu kipindi kyabubidi kya musāngo 2. Lombola kifwatulo kidi pa paje 302 kilombola muswelo mukekadila būmi bwetu mu mafuku akāya kumeso. Tanga Kusokwelwa 21:4 mu musāngo 6. Shi muntu’wa walombola kusepelela, mupāne dibuku na lupoto lutungilwe. Mwipei nandi kilayeno kya kukāya kwendeleja nandi mīsambo yenu.
3 Tukokeja kwendeleja mīsambo yaimanine pa Kusokwelwa 21:1, 4 namino amba:
◼ “Musunsa wamfulo onaile, twesambile pa mulao wa Leza wa kuteakanya kisaka kipya kya bantu kikekala pano pantanda. [Kokela dikwabo milangwe mu dibuku Ufunuo—Upeo Wao pa paje 302.] Lelo kusenswepo kumona kisaka kyenu kisepelela ino ngikadilo? [Muleke akulondolole.] Pano kipangujo i kino: Milao ya Leza lelo ifwaninwe kukulupilwa? Ivwana kyanena’po aye mwine.” Tanga Kusokwelwa 21:5, 6a mu musāngo 8 pa paje 303. Ipangula kipangujo kya musāngo 9, pa paje 303, kupwa tanga malondololo, ne mulongo wamfulo wa musāngo. Mulombe kushilula nandi kifundwa kya kubitupu kya Bible. Tukwatei mpangiko ya kwiya kumulombola motwikilongelanga.
4 Bantu bavule i bakamwe mwanda wa kwilundilako kwa makambakano aponena muzo wa muntu; omwanda mu bupempudi bwetu bubajinji, tukokeja kunena namino amba:
◼ “Bantu bavule i bakamwe pamwanda wa makambakano ebafikila. [Tela’ko amo-amo.] Pano ke papite makumi a myaka tamba baludiki bakipolitike bakulupija bantu amba basa kwiapwija lonso, ne bamo-bamo ke batompe kwikilonga. Molangila, mwanda waka ngikadilo pano po pene yenda yonekela’ko? [Muleke akulondolole.] Bible uletanga bushintuludi kebwabandawilwe na bantu bavule. Mukanda wa Kusokwelwa ulombola divita dyāikele kulongeka momwa mūlu. Tala bilupukile’ko mungya mwibinenena Kusokwelwa 12:9.” Tanga kisonekwa ne pūtula dibuku Ufunuo—Upeo Wao pa paje 182. Ingidija kifwatulo mwanda wa kulombola muswelo wielele Satana mu myanda ya bantu. Ikala kumupa dibuku. Mwipei nandi kilayeno kya kwiya kumulombola muswelo ukapwija Leza makambakano a muzo wa muntu.
5 Shi twalaile kwiya kushintulula mukapwijija Leza makambakano adiko dyalelo, tukokeja kutompa kunena’mba:
◼ “Naila’tu kukumona mwanda wa kwendeleja mīsambo yetu itala pa muswelo ukapwijibwa makambakano a muzo wa muntu. Musunsa wamfulo, twamwene mu Bible amba Satana ongolanga pano pantanda ponsololo pekelwe. Byadi kipangwa kya kumushipiditu kya bukomo bupite bwa bantu, molangila, lelo kudi muswelo wa kufundula lupusa lwandi? [Muleke akulondolole.] Ivwana kinena’po Bible.” Tanga ne kushintulula Kusokwelwa 20:1-3. Na bukwashi bwa kifwatulo kidi pa paje 4 ne 5 mu dibuku Buyuki, lombola mukekadila būmi kitatyi kikekala lupusa lwa Satana ke kutupu’lo. Mulombe kwanza nandi kifundwa kya Bible ne tompa kwikishilula ponka na ponka.
6 Bantu bavule batele mutyima ku ngikadilo ya bifuko bishiketwe’mo. Tukokeja kutompa kushilula mīsambo mu uno muswelo ulonda’ko:
◼ “Tubamone’mba kubwipi kwa bantu bonso baselele mityima kūlu pamwanda wa koneka kwa luvula, mema ne bidibwa. Mu matanda amo-amo, ngikadilo ya bifuko bishikete’mo bantu pano ikimba kōna ne būmi bwabo bwine. Molangila, Leza byadi Umpangi, i kika kyasaka kulonga’po? [Muleke akulondolole.] Bible unena’mba bantu bakeshintulwila ku meso a Leza pamwanda wa muswelo obengidija ntanda. [Tanga Kusokwelwa 11:18b.] Fwatakanya bidi shi wadi amba ushikete pa ntanda yakubulwa koneka!” Kokela milangwe pa mvubu ya mulao wa Leza wa kuleta paladisa, utanwa mu Kusokwelwa 21:3, 4. Lombola kifwatulo kidi pa paje 302 mu dibuku Ufunuo—Upeo Wao. Shi ubamone kusepelela kudiko, pāna dibuku ne kukwata mpangiko ya kumujokela.
7 Potujokela muntu walombwele kusepelela pa mwanda utala Paladisa ya pano pantanda, tukokeja kunena’mba:
◼ “Musunsa wamfulo, twaumvwañene’mba pano kilomba enka Leza atenge kuboko pa myanda ya bantu, mwanda wa kupwija makambakano a koneka kwa ntanda. Ino kipangujo kine i kino: I kika kyotufwaninwe kulonga tumone kukekala mu ntanda impya, yaboloke ilailwe na Leza?” Tanga Yoano 17:3. Mupe mwisambi nobe lwito lwa kushilula nandi bwifundi bwa Bible bwa kubitupu bukamupa buyuki bwa pabula.
8 Madyese bukata’o otudi nao a kwingidijibwa bu bengidi ba mu mwangulo wangulwa dyalelo, ne kutanwa mu mwingilo wa busapudi upandija myuya! Twikalei kuputumina mu kupāna myanda miyampe, koku tutele mityima amba kitatyi kibatyepa ne ‘pa mwanda otwayuka’mba, kuputumina kwa mu mingilo yetu kekudipo kwa bitupubitupu.’—1 Kod. 15:58.