Fikijai Luno Lwito Ku Muntu Ye-yense Udi Na Kyumwa
1 Dyalelo muzo wa muntu udi na ‘kyumwa, ino kino kyumwa ke kya memapo, ehe, i kya kwivwana binenwa bya Yehova,’ pamo na mwānenene mupolofeto Amose. (Amose 8:11) Muswelo otukwashanga bantu bapēpwa mityima na kyumwa kya kumushipiditu i uno, twibasapwilanga mpango ikwetwe na Leza ya kunyongolola bantu bakikōkeji ku bubi ne ku lufu, yelekejibwe mu shapita wamfulo wa Kusokwelwa bu “munonga wa mema wa būmi.” Tudi na dyese pa kupebwa kino kyepelo kya kufikijija muntu ye-yense udi na kyumwa kya boloke luno lwito lwa’mba iya “[u]yate’o, buntu bitupu, mema a būmi.” (Kus. 22:1, 17) Lelo i muswelo’ka otusaka kwela luno lubila mu kweji wabusatu? I na kupāna dibuku Ufunuo—Upeo Wao Mtukufu U Karibu! ku boba basepelela musapu byabinebine. Padi tukatompa kwingidija ino ntwelelo ilonda’ko.
2 Bantu bavule byobatele mutyima ku myanda itala bukomo bwa ngitu, padi ukokeja kumona ino ntwelelo bu mifwaninwe:
◼ “Bantu bavule batompolanga pa mwanda wa bundapi buyampe bwenda bukoma lupoto. Kepabulwe padi nobe kodi mulanguluke pa uno mwanda, ke amopo? [Muleke akulondolole.] Abe molangila kudi kintu kampanda kibwanya kupwija lonso ano makambakano? [Muleke akulondolole.] Ivwana būmi bulumbuluke botutengele.” Tanga Kusokwelwa 22:1, 2. Kupwa pūtula dibuku Ufunuo Upeo pa kifwatulo kidi pa paje 308-309, umushintulwile’kyo na musāngo 22 udi pa paje 311. Fudija namino amba: “Dino dibuku i dishintulule mukanda wa Kusokwelwa vese ne vese.” Shi mwisambi nobe walombola kusepelela kwabinebine, mushile dibuku, umulombole ne lupoto lodipotwa panopano. Mwipei nandi kilayeno kya kwimona dikwabo.
3 Mu kujokelamo kupya, ukokeja kuvuluja mu kīpi mīsambo yomwesambile namino amba:
◼ “Musunsa wamfulo otwesambile nobe, twabandawile mwanda utala kintu kibwanya kupwija misongo lonso. Lelo ulanga kukekala’tu kitatyi kekikekala muntu nansha umo na misongo? [Muleke akulondolole.] Ivwana bino binenwa bitenga ku mutyima.” Tanga Isaya 33:24. Kupwa pūtula pa kifundwa 5 mu mukanda Kisaka Leza, mwisambile pa musāngo 5-6, umwipangule ne bipangujo bikwatañene na misāngo bitūdilwe ku ngalwilo kwa kifundwa, mutange ne bisonekwa bimobimo mu bitelelwe’po. Mulombole amba kufundulwa kwa misongo ne lufu i kintu kikafikidijanga mpango yākwete Leza ku ngalwilongalwilo ya mwa kwikadila pa ino ntanda. Mwipei kilaeno kya kujoka kwisamba nandi myanda idi mu musāngo 1-4 ne 7 mu kifundwa kimo kyonka.
4 Shi kudi myanda ivwanwa ya lufu lwa mu kitulumukila lwa muntu kampanda, ukokeja kutompa ino ntwelelo:
◼ “Padi nobe wi mwivwane mwanda wa [tela musapu mwine]. Kitatyi kifwanga bantu mu kitulumukila pa kimpengele kampanda, bavule beipangulanga i busengi’ka bobakokeja kukasenga bisaka bitenwe na kino kizumba. Abe ulanga’po namani?” Muleke akulondolole. Kupwa pūtula pa paje 299 mu dibuku Ufunuo Upeo, lombola kifwatulo kya lusangukilo kilombwelwe’po. Endelela namino amba: “Bantu bavule batulumukanga pa kuyuka’mba boloke ne bampikwa koloka bakajokejibwa ku būmi mu Paladisa pano pantanda. [Tanga Bilongwa 24:15, kisonekwa kitelelwe mu musāngo 9 pa paje 297, kupwa mupe bushintuludi budi mu musāngo 10.] Dino dibuku i dikonkotole kamo ne kamo myanda mivule isangaja isambila pa mpango ya Leza itala pa mafuku akāya kumeso. Shi usaka kuyukila’ko bintu bikwabo bivule pa uno mwanda, ukokeja kushala na dino dibuku.” Mupe kilayeno kya kujoka kumutala, lemba bintu byasenswe ne bikwabo bimuseleja mutyima kūlu.
5 Pa kumupempula dikwabo, kwatañanya ntwelelo yobe na mwinē njibo. Padi ukokeja kunena’mba:
◼ “Musunsa wamfulo otwesambile nobe, natendele mpata mulangwe owaletele pa mpango ikwete Leza itala ino ntanda. [Pituluka mu wandi mulangwe.] Natene myanda imo, monangila isa kukusangaja.” Pūtula mukanda Kisaka Leza pa kifundwa 5. Tanga misāngo yonso ya mu kino kifundwa yolanga’mba ibwanya kusangaja mwisambi nobe. Shi mubapu kwipa kala kilayeno kya difuku dyokāya kwendelela na kifundwa, papo mupe mwisambi nobe kamukanda kalombola nsaa ya kupwila kwa pa kipwilo shi udi nako. Mushintulwile mupityilanga Kupwila kwa Bantu Bonso, ebiya mwite āye atanwe’ko.
6 Shi usaka ntwelelo ipēla ya pa kupāna trakte, ukokeja kutompa namino:
◼ “Nsaka nobe wikale na uno trakte udi na mutwe wa mwanda unena’mba Lelo tukokeja kukemona na bakena-betu bafwile?” Tambika’ye mwisambi nobe, musapwile akulonde potanga musāngo umbajinji. Muleke alondolole ku kipangujo kipangwilwe mu musemwa wamfulo. Tanga musāngo wabubidi, kupwa mulombole kifwatulo kidi pa paje 299 mu dibuku Ufunuo Upeo. Endelela namino amba: “Dino dibuku ditulombolanga myanda mivule itala pa lusangukilo ne pa milao mikwabo milumbuluke ya Bible ilombola mukekadila būmi bwa kumeso. Shi usaka kukatanga’dyo, nankyo nkokeja kukushila’dyo.” Mulombole lupoto lodipotwa panopano, kupwa mwipei nandi kilayeno kya kujokelamo kupya.
7 Luno lwito lukoka bantu lotwenda tufikijija bakwetu lukokeja kwibafwenya ku mema a būmi, atūdile’ko Yehova pano. Shi ke pano, twitei muntu ye-yense udi na kyumwa’mba, “Iya!”—Kus. 22:17, MB.