Tusapulei Myanda Miyampe Na Kikulupiji
1 Muntu yense umbukata mwetu usenswe kutana nsangaji ne kuloelelwa mu byalonga, nakampata mu mwingilo wa kulonga bana-babwanga. I kwepi kulupukanga kuno kuloelelwa? Kulupukanga dibajinji ku kikulupiji kyotwikalanga nakyo kitatyi kyotuputuminanga mu mwingilo mwanda wa—kukwasha bakwetu—ke-pantu ye akyo kifwaninwe. (Nk. 11:25) Muswelo otusapula myanda miyampe ufwaninwe kulombola’mba bine tukulupile mu byotunena. Shi myanda yotunena ikale ishiluka ku mutyima wetu, bubinebine bwetu ne kusumininwa kwetu kukamweka patōka. (Luka 6:45) Shi tuteakanya byotukanena, ketukakolelwapo kitatyi kyotukesamba na bantu ba mu wetu mwaba. Kino kikekala kyabine mu uno kweji 10, potukapāna dibuku La vie: comment est-elle apparue ? Évolution ou création? Milangwe ilonda’ko ifwaninwe kwitukwasha tusapule myanda miyampe na kikulupiji.
2 Kitatyi kyotupāna dibuku “Création,” tukokeja kunena namino mu kupita kwetu kubajinji:
◼ “Pa kupwa kwisamba na balondakani nobe, tubamone’mba bantu bamo-bamo batūdile kikulupiji kyabo mudi Leza, ino bakwabo bamona bu i kikomo kwikala na lwitabijo mudi Aye. Abe ulanga’po namani? [Muleke akulondolole.] Teleka munena Bible pa uno mwanda. [Tanga Loma 1:20.] Tukokeja kumona bukamoni bwa ‘bukomo bwanyeke ne bwa bu-Leza’ bwa Leza na kubandila bintu byapangile.” Tanga mu dibuku Création musāngo wamfulo pa paje 48 ne kokela milangwe pa bintu bikomo kujingulula bidi mu selile. Nansha ingidija musāngo 18 udi pa paje 147, mwanda wa kulombola mwikadile mutyi, ne munangila bunanga bwao bya kutendelwa, bintu bilombola mingilo ya Umpangi. Pāna dibuku shi waitabija kwiditanga. Shi weditambula, muyukije lupoto lwadyo lwa pano-pano ne kyotulombela’lo.
3 Shi tujoka kukatala boba botwesambile nabo pa myanda itala kwikalako kwa Umpangi, i kiyampe kunena namino’mba:
◼ “Ponaile dyamfulo, twesambile pa bintu bileta bukamoni bwa kwikala’ko kwa Leza, amba i bupangi bwandi bwakutendelwa. Lelo umona bu i kikomo kwitabija’mba Yewa wāpangile diulu ne ntanda ukokeja kuta mutyima ku būmi bwetu bwa mafuku akāya kumeso? [Muleke akulondolole.] Tala, Umpangi uyukile kala būmi bwa muntu bukaya kumeso.” Tanga Isaya 46:9, 10. Ingidija bifwatulo bidi pa paje 19 mu dibuku Création ne myanda ikwatañene nabyo, mungya kusangela musapu kwa mwisambi netu, mwanda wa kulombola ngikadilo milumbuluke ilailwe na Leza. Kupwa, tanga musāngo 1 mu shapita 20 ne kumulomba kifundwa kya Bible. Shi waitabija, shilula nandi kifundwa mu dibuku Buyuki.
4 Shi tupāna dibuku “Création,” tukokeja kwingidija uno mupēlo mukwabo amba:
◼ “Mu kwisamba na bantu bodi nabo kubwipi, namone’mba bavule bābila bininge kwikala na mutyima-ntenke mu ntanda ya ndoe. Molangila, mwanda waka bantu i bakomenwe kutūla’ko ino ngikadilo? [Ivwana kilondololwa.] Padi baludiki bamo-bamo ba kipolitike bengilanga ne mutyima umo, kadi baloñanga biyampe, ino ivwana ano madingi a tunangu adi mu Bible.” Tanga Mitōto 146:3, 4, kupwa ipangula’mba: “Lelo kudi muntu nansha umo ukokeja kuvuija bisakibwa bya bantu bonso?” Tanga vese 5 ne 6. Lombola kifwatulo kidi pa paje 251 mu dibuku Création, ne kokela milangwe pa byabuyabuya bitamba ku kubikalwa na Leza. Pāna dibuku ne kumulombola buvule bwa lupeto lodipotwa.
5 Shi twesambile musunsa umbajinji pa umbikalo wa Leza, tukokeja kutompa uno mupēlo mu kujokelamo kulonda’po:
◼ “Mafuku matyetye ponapityile, twesambile amba muntu kakokejapo kutūla’ko ndoe yabinebine pano pantanda. Padi ukivulukile buluji botwasokwele mu Bible bulombola kuno kukomenwa. [Tanga dikwabo Mitōto 146:3.] Ubaivwana kitusoñaninya Leza kuleka kutūla lukulupilo lwetu mu bana ba bantu? [Muleke akulondolole.] Nobe uketabija’mba yewa ukapwija makambakano lonso i enka Leza kete. Mitōto 146:10 witulombola buluji botufwaninwe kwikadila na kikulupiji. [Tanga vese.] Lelo i kika kyotufwaninwe kulonga shi tusaka kukekala bu bene kibundi mu Bulopwe bwa Leza?” Pūtula dibuku Création pa paje 250, tanga musāngo 13 ne wisambile pa Yoano 17:3. Mulombole mwisambi nobe muswelo utambulanga bantu bavule buyuki butwala ku būmi bwanyeke, kupityila ku kifundwa kya Bible. Shi waitabija, mupāne dibuku Buyuki ne kushilula nandi kifundwa.
6 Tukokeja kupāna dibuku “Création,” potusapula ku mangajini ne mangajini, na kino kitwelelo kīpi amba:
◼ “Dyalelo tudi na mwingilo wa pabula wa kupempula bansunga. Batwe bonso tujiñwanga mutyima pangala pa kwilundila’ko kwa bupupakane ne bukalabale bulongeka kuno kwetu. Molangila, lelo kudi muntu ukokeja kupwija uno mwanda? [Muleke akulondolole.] Leza ukapwija’o.” Pūtula dibuku Création pa paje 196, kupwa tanga ne kushintulula Nkindi 2:21, 22 utelelwe mu musāngo 19. Lombola mutwe wa mwanda wa shapita 16 ne mupāne dibuku.
7 Shi tujokela kukatala nsunga otwashidile dibuku “Création,” tukokeja kunena’mba:
◼ “Ponaile dyamfulo, nakulombwele’mba enka Leza kasuku ye ukokeja kupwija makambakano a buñonaona ne bukalabale. Mwendele mulao wandi, tufwaninwe kukulupila na bubine amba ndoe ikekalanga’ko byabine pano pantanda. Jingulula butongi botutūdilwe kumeso.” Tanga pa paje 250 mu dibuku Création, musāngo 11, utela Mitōto 37:37, 38. Leta nshintulwilo pa kifwatulo kidi pa paje 251 ne kutanga musemwa umbajinji wa musāngo 14. Mulombe kifundwa kya Bible ku bitupu, ku yandi njibo, nansha ku kifuko kyandi kya mingilo mwendele kusaka kwandi.
8 Byotudi “bakwingila mīngilo pamo na Leza,” tudi na bubinga bwa kwikala na kikulupiji kitatyi kyotusapula myanda miyampe. (1 Kod. 3:9) Kwikala nyeke na uno mulangilo kuketuletela madyese mavule a kudi Yehova.