Batumoni Ba Yehova—Basapudi Babine
1 Yesu Kidishitu wāpele bandi bana-babwanga bonso kiselwa kya kusapula, wēbasoñanya patōkelela kwenda kukasapula myanda miyampe ya Bulopwe. (Mat. 24:14; Bil. 10:42) Pa kino, bandi bana-babwanga babajinji bāshile kifwa kiyampe, mwanda bādi banena myanda ya Bulopwe pakubulwa kukōka, kebādipo basapula’nka mu bifuko mwādi mutōtelwa, ehe, i konso kobādi batana bantu, pobongwidile kibumbo ne ku njibo ne njibo. (Bilongwa 5:42; 20:20) Dyalelo, batwe Batumoni ba Yehova twiyukanyanga bu basapudi babine na kusapula kotusapulanga musapu wa Bulopwe mu matanda 232 ne na kubatyija kotubatyijanga bana-babwanga bapya, abafikila pa mudiyo umo ne musubu, babatyijibwe’nka mu myaka isatu yapityile’i! Mwanda waka mwingilo wetu wa busapudi witwitabanga?
2 Tuzanzamunwanga na Myanda Miyampe: Basapudi i bedi ba lubila, mikendi ya myanda miyampe. Pa kino, tudi na madyese makatampe kashāa a kusapula Bulopwe bwa Yehova, myanda miyampe imo kete yabine yabila muzo wa muntu ubinza. Tudi na nsangaji mpata pa kubadikila kuyuka amba madiulu mapya akabikala na boloke ntanda impya ya bantu bakikōkeji bakekala mu Paladisa īya kumeso’i. (2 Pet. 3:13, 17) I enka batwe kete bo badi na luno lukulupilo, kadi twabilanga bininge kwiluyukanya ku bakwetu.
3 Buswe Bwabine Bwitutononanga: Busapudi i mwingilo wa lupandilo. (Loma 1:16) O mwanda twivwananga nsangaji mpata pa kusambakanya uno musapu wa Bulopwe. Byotudi basapudi babine, tusenswe bantu, o mwanda twielelanga’ko mwanda wa kuyukanya myanda miyampe ku bisaka byetu, ku balondakani netu, ku balunda netu, ne ku bantu bakwabo bavulevule. Kwingila uno mwingilo na muya wetu onso i umo wa mu miswelo milumbuluke yotulombolanga buswe bwetu bwabine botuswele bakwetu.—1 Tes. 2:8.
4 Mushipiditu Sandu wa Leza Witukwashanga: Kinenwa kya Leza kitukulupijanga’mba, potwendanga tukuna nkunwa ya Bulopwe ne kusangila’yo mema, Yehova mwine ye ‘utamijanga’yo.’ Kino kyo kyotumona dyalelo mu bulongolodi. (1 Kod. 3:5-7) Mushipiditu wa Leza o witukwashanga mu mwingilo wetu wa busapudi ne kwangula’mo bipa bivulevule.—Yoe. 2:28, 29.
5 Shi ke pano, byotuyukile kala kukankamikwa kwitukankamika 2 Temote 4:5 ‘kwingila mwingilo wa bu musapudi’ ne byotuswele bantu netu, tusepelelei kusapula ino myanda miyampe ya Bulopwe ponso potumona mukenga, koku tukulupile amba Yehova ukendelela na kwitwesela dyese mu mwingilo wetu.