Tuletei Bukamoni Na Mwiendelejo Wetu Mulumbuluke
1 Dyalelo mu ino ngikadilo itala bantu kilomonyeka, bansongwanzele bavule bapupakane bonakanyanga būmi bwabo na dyamba, busekese, butomboki ne bupolapola. Inoko mwiendelejo mulumbuluke wa bansongwanzele badi mu kipwilo kya bwine Kidishitu uletanga nsangaji pa kwiumona ne kadi i buya bwabinebine ku meso a Yehova. Uno mwiendelejo uletanga bukamoni bukatampe bukokeja kukoka bantu bamobamo ku bubinebine.—1 Pet. 2:12.
2 Myanda mivule imonwamonwa ilombola’mba mwiendelejo mulumbuluke wa bansongwanzele bene Kidishitu uteñanga mpata mityima ya bantu bebamona. Lolo umo mwadimu wesambile padi wandi mwanā masomo nsongwakaji Kamoni wa Yehova amba Yehova, Leza wa uno nsongwakaji, ye Leza wabine. Wanene namino mwanda uno nsongwakaji udi na mwiendelejo wa bulēmantu. Mwadimu mukwabo watumine Sosiete mukanda’mba: “Nemufwija’ko pa mwanda wa bankasampe balumbuluke bomudi nabo mu kyenu kipwilo. . . . Bine bankasampe benu badi na mwiendelejo muyampe. Balēmekele batame, badi na bulēme kadi bavwala pa mvwadilo. Pakwabo kadi, bayukile Bible biyampe shē! Bine kino kyo kipwilo!”
3 Lolo umo mwadimu watengelwe na mwiendelejo muyampe wa wandi mwanā masomo mwanuke, mwanā Batumoni wa myaka 7. Wakokelwe na kutalala ne buyampe bwa mutyima bwa uno mwanuke, bwishidile kulampe na mwikadilo wa banuke bakwabo. Kintu kyamukunkile ku mutyima i kusumininwa kulonda nkulupilo ya kipwilo kwa uno mwanuke, kwishila na bakwabo ku nkulupilo yandi kekwadipo kumufityija mutyima. Wamwene’mba uno mwanuke wadi na mutyima wamundamunda mufundijibwe kadi wadi uyukile ‘kushiyañanya biyampe ne bibi.’ (Bah. 5:14) Mwenda mafuku, inandya uno mwanuke wakapempwile uno mwadimu, washilula nandi kifundwa kya Bible. Mwenda mafuku, mwadimu wabatyijibwa, ku mfulo waikala pania walonso!
4 Nsongwalume umo watengelwe na mwiendelejo mulumbuluke wa mwana-mukaji umo Kamoni wa Yehova obadi nandi ku masomo amo. Wadi mwishile mpata na bakwabo: Wa bulēme, muninge na masomo, uvwala nyeke pa mvwadilo; kutupu kwenda kisense na mwana-mulume nansha umo. Uno nsongwalume wamona’mba uno mwana-mukaji ulondanga misoñanya ya mu Bible mu būmi bwandi. Ebiya wamwipangula bipangujo bitala pa nkulupilo yandi, byaamulondolwele byamutenga mpata. Washilula kufunda, kaijijepo ne kwija kwine wabatyijibwa, mwenda mafuku waikala pania kupwa ke mwingidi wa ku Betele.
5 Shi wi nkasampe mwine Kidishitu usaka kuleta bukamoni bulumbuluke ku bakwenu, nankyo tadija mwiendelejo obe mu myanda yonso. Kokadimbwa na byabulongelonge bya ino ntanda, milongelo yayo, milangwe nansha mikadilo yayo. Ikala kifwa kilumbuluke mu muneneno, mu muvwadilo, mu mutendelo nansha mu mubandilo, ku kupwila, mu busapudi, ku masomo ne konso koenda wipwija mukose. (1 Tem. 4:12) Bine, ukevwana nsangaji mikatampe pa kumona muntu kampanda usepelela bubinebine pa mwanda wa ‘bu-mwinya bobe busokokele ku bantu’ bwa mwiendelejo obe mulumbuluke!—Mat. 5:16.