Bankasampe Bamunika bwa Bimuni
1. Bible ulombola namani amba bene Kidishitu bamonwanga na bantu, ne kino kitala namani bankasampe bene Kidishitu dyalelo?
1 Yesu wālombwele bandi bana ba bwanga’mba: “Mudi mwinya wa panopantanda.” (Mat. 5:14, 16) Ko kunena’mba bamonwanga kulampe pamo bwa kibundi kitenteke pa lūlu, kyeñenya ku mwinya. Dyalelo, bankasampe bene Kidishitu bavule bamunikanga “bwa bimuni panopantanda,” na mwiendelejo wabo moloke ne na busapudi bwabo bupyasakane.—Fid. 2:15; Mal. 3:18.
2. I miswelo’ka imo yokokeja kusapwila’mo badimu ne bakwenu ku masomo?
2 Ku Masomo: I muswelo’ka omukokeja kusapula ku masomo? Bankasampe bamo baboyanga mikenga kitatyi kīsambwa mu masomo myanda pamo bwa kutoma bintu bileta lunjingwe, lufundijo lwa kwalamuka, ne mānga ya Mukubo wa bantu ne bikwabokwabo. Kaka umo, mu yandi devwala itala pa butumbula, waletele bukamoni butala pa Bulopwe bwa Leza amba lo lukulupilo lumo kete ku bantu. Mwadimu watendela ino myanda ilanguluja, kadi kino kyatwala ku kusapwila’ko bukamoni bukwabo.
3. Le i muswelo’ka omukaleka mwinya weñenye ku masomo kupityila ku mwiendelejo wenu?
3 Muswelo mukwabo wa kumunika bwa kimuni i mwiendelejo wenu, muvwadilo wa bumvubumvu, ne mwidyangwilo. (1 Kod. 4:9; 1 Tem. 2:9) Shi bana ba masomo ne badimu bamona mwikadilo wenu amba i mwishile, bamo bakakokwa na bubinebine pangala pa mwiendelejo wenu mulumbuluke kadi uno ukekala mukenga wa kwibasapwila bubinebine bwa mu Bible. (1 Pet. 2:12; 3:1, 2) Kwikala na mwiendelejo wa bwine Leza ke kintupo kipēla, ino Yehova ukemwesela bikatampe. (1 Pet. 3:16, 17; 4:14) Pa kusaka bantu bate mutyima ku myanda miyampe, ubwanya padi kutanga Bible nansha mabuku pa kukōkolokwa nansha kushiya’o pantu pabwanya kumona bakwenu.
4. I byabuyabuya’ka bimwenwa mu kusapula ku masomo?
4 Kweñenya bu mwinya ku masomo kukomejanga lwitabijo lwenu ne kukemukwasha mwikale kwitemba bwingidi bomwingidila Yehova. (Yel. 9:24) Bine, kino kikemulama. Kaka umo wānene amba, “Kamweno komwena mu kwisamba nkulupilo yami i kano: bana ba masomo kebaningilangapo kulonga bintu byakubulwa kukwatañana na byobya binena Bible.”
5. (a) Le bankasampe bamo i babaije namani mwingilo wabo? (b) Le nobe i bitungo’ka byowitungile?
5 Kubaija Mwingilo: Muswelo mukwabo ukokeja kumunika bankasampe pamo bwa bimuni i na kubaija mwingilo wabo. Tutu umo wapwile masomo makatampe, wavilukila kokwa kwadi kukimbwa basapudi ba Bulopwe bavule. Washikata mu kakipwilo katyetye kadi enka na mukulumpe umo kete. Penepa watumina mulunda nandi mukanda amba: “Būmi i buyampe kuno kotudi. Mwingilo nao onka usangaja! Ku kibelo ne kibelo twisamba na bantu kintu kya minite 20 mwanda bantu baswele kwivwana byonso byosaka kwibasapwila.” Ubweja’ko amba: “Nadi ngabila amba nkasampe yense alonge kyonongele mwanda wa nandi eivwanine aye mwine moñivwanina. Kekudipo kitabukile kwingidila Yehova na byonso byotudi nabyo.”
6. Le i kika kikutonona nobe witembe bankasampe ba mu kyenu kipwilo?
6 Bine, twitembanga pangala penu, banwe bankasampe bamunika bwa bimuni pano pa ntanda! (1 Tes. 2:20) Pomwingidila Yehova na mutyima wenu onso, na muya wenu onso, na ñeni yenu yonso, ne bukomo bwenu bonso, kemukabulwepo “kumona ponka pano katwa . . . ebiya myaka ya kukāya būmi bwa kulādila nyeke na nyeke.”—Mako 10:29, 30; 12:30.