‘Lekai Mwinya Wenu Weñenye’
1 Ntanda itujokolokele idi mu fukutu mu mwikadilo ne ku mushipiditu. Mwinya wa bubinebine usokwelanga patōka ‘mingilo yampikwa bipa’ ya mu fukutu mwanda wa twepuke ino mingilo ileta bikukaja bya lufu. O mwanda mutumibwa Polo wākankamikile bene Kidishitu amba: “Nangilai umbubāna [ba] mwinya.”—Ef. 5:8, 11.
2 “Kipa kya mwinya” i kishile kulampe na mfindi idi’mo ino ntanda. (Ef. 5:9) Shi tusaka kwikala na kino kipa, tufwaninwe kwikala bifwa byeñenya mu būmi bwetu bwa bwine Kidishitu, kwikala bantu betabijibwe na Yesu. Kadi tufwaninwe ne kulombola ngikadilo miyampe, kifwa kwikala na mutyima umo, kubulwa budimbidimbi, ne kwikala na buzanzamuke mu kusapula bubinebine. Bino bipa bifwaninwe kulombolwa bukile bukya mu būmi bwetu ne mu mwingilo wetu.
3 Tweñenyei Ponso Potumona Mukenga: Yesu wānene bandi bana-babwanga amba: ‘Lekai mwinya wenu weñenye ku bantu.’ (Mat. 5:16) Netu twiulanga Yesu, tweñenya mwinya wa Yehova na kusapula Bulopwe bwandi ne mpango yandi. Tweñenyanga bwa bimuni ponso potupempulanga bantu ku mobo abo ne potusambakanyanga bubinebine ku kaji, ku masomo, ku balondakani, ne ponso potumonanga mukenga.—Fid. 2:15.
4 Yesu wānene amba bantu bamo bakashikwa mwinya. (Yoa. 3:20) O mwanda ketupungilangapo shi tumona bavule bapela “mwinya wa myanda-miyampe ya ntumbo ya Kidishitu” weñenye mu mityima yabo. (2 Kod. 4:4) Yehova uyukanga bidi mu mityima ya bantu, upelele banonga-bibi kutanwa’bo umbukata mwa bandi bantu.
5 Shi tulonda mashinda a Yehova ne kusangela mwinya wa ku mushipiditu, nabya netu tubwanya kwiumunika ku bakwetu. Shi bajingulule mu mwiendelejo wetu amba bine ‘tudi na mwinya wa būmi,’ nabo kebakabulwepo kwalamuka mu būmi bwabo mobifwaninwe mwa kwikadila’bo basedi ba mwinya.—Yoa. 8:12.
6 Kuleka kotuleka mwinya wetu weñenye i kutumbija kotutumbija Umpangi wetu ne kukwasha bantu ba mityima myoloke nabo bamuyuke, bekale ne na lukulupilo lwa kukamona būmi bwa nyeke. (1 Pet. 2:12) Byotudi na mwinya, tumunikilei’o bakwetu badi mu mfindi ya ku mushipiditu nabo bamone dishinda dya kutamba’mo, bekale kwingila mingilo ya mu mwinya.