‘Bu-Mwinya Bwenu Busokoke’

1. Le tudi na dyese dya kusambwila bantu bika?

¹ Tamba lubanga kutūla ku kyolwa, mwinya mulumbuluke umweka na meso utumbijanga Yehova Leza. Inoko Yesu wālombwele bandi bana ba bwanga bekale na mwinya wa muswelo mukwabo—ke “mwinya wa būmi” kadi. (Yoa. 8:12) Kwikala na kino kitōkeji kya ku mushipiditu i dyese dya pa bula dibadilwa’mo ne biselwa bikatampe. Yesu wāfundije amba: “Bu-mwinya bwenu busokokele ku bantu” amba bakwabo bamwene’mo. (Mat. 5:16) Mu ino fukutu ya ku mushipiditu idi’ko dyalelo, tufwaninwe kusambwila bantu uno mwinya, ne kadi pano bisakibwa bibavudila’ko kashā! Pamo bwa Kidishitu, i muswelo’ka ubwanya kusokoka bu-mwinya bwetu?

2. Le Yesu wālombwele muswelo’ka kamweno ka kupāna mwinya wa ku mushipiditu?

² Na Kusapula: Yesu wāingidije kitatyi kyandi, bukomo, ne bituntwa mwanda wa kuyukija bantu mwinya wa bubinebine ku mobo abo, mu mikenza ne ku ngulu—konso kobādi batanwa. Wādi uyukile kamweno ka nyeke kadi mu kupāna kitōkeji kya ku mushipiditu kya binebine. (Yoa. 12:46) Pa kusaka’mba bandi bana ba bwanga basapwile bantu bavule, Yesu wēbateakenye mwa kwikadila bu “mwinya wa panopantanda.” (Mat. 5:14) Bāsokwele bu-mwinya bwabo na kulongela bakwabo biyampe ne na kusapula bubinebine bwa ku mushipiditu.

3. Le i muswelo’ka otukalombola kufwija’ko kwa binebine pangala pa mwinya wa bubinebine?

³ Bantu ba Leza bakwete na kusumininwa kiselwa kya ‘kunangila mu bu bana bwa mwinya,’ kadi basapulanga konso kutanwa bantu. (Ef. 5:8) Kutanga Bible nansha mabuku makwabo a Bwine Kidishitu pa kitango kya bantu, kitatyi kya kukōkolokwa ku kaji nansha ku masomo, kukokeja kushitula mukenga wa kwisambila pa Bisonekwa. Na uno mukenga, kaka umo nkasampe washilwile kifundwa kya Bible ne kupāna mabuku 12 ku bobafundanga nabo!

4. Mwanda waka ‘kusokola bu-mwinya bwetu’ kutala ne mwiendelejo muyampe?

⁴ Na Mingilo Milumbuluke: Kusokola bu-mwinya bwetu kutala ne mwiendelejo wetu wa difuku ne difuku. (Ef. 5:9) Mwiendelejo wa Bwine Kidishitu umwekanga patōka ne kwituletela mikenga ya kusapula bubinebine ku kaji, ku masomo, ne mu bifuko bikwabo mudi bantu bavule. (1 Pet. 2:12) Kimfwa ngikadilo miyampe ya nkasampe umo wa myaka itano, yalengeje mwadimu wandi ete bandi bambutwile. Webanena amba: “Kashā nkyamwene mwanuke uyukile kusansanya biyampe ne bibi mu būmi na uno!” Bine, mwingilo wetu ne mwiendelejo wetu muyampe ukokelanga bantu ku “mwinya wa būmi” ne kutumbija Leza wetu.